Bible in duytsche (Delftse bijbel 1477)

§ Ca .xlvi

1

DIt seit die here god. Die poerte vanden binnensten vrijthoue die ten oesten waert scouwet sal besloten wesen ses daghen daermen in werck duet: ende inden saterdaghe salmense op doen:

2

ende die prince salder in comen al den wech vander poerten voerhuyse van buyten: ende hi sal staen opten dorpel vander poerten. Ende die priesters sullen doen sijn holocauste ende sijne paeyselike offerhanden: ende hi sal aenbeden opten dorpel vander poerten. Ende hi sal wt gaen. Ende men sal die poerte niet sluten voer des auonts.

3

Ende dat volc vanden lande sal aenbeden ter doren vander poerten inden saterdaghe ende inden calenden voerden here.

4

Ende die prince sal dit holocaust offeren den here inden saterdage ses onbesmette lammeren ende enen ram onbesmet:

5

ende telken ram een ephi sacrificien. Ende vanden lammeren die sacrificie die sijn hant vinden sal: ende telken ephi sacrificien een hin olyen.

6

Ende inden daghe sal hi offeren een onbesmet calf vanden vye ende die ses lammeren. ende die ram sal onbesmet wesen:

7

ende hi sal sacrificie doen telken calue een ephi: ende telken ramme een ephi. Ende ten lammeren sal hi sacrificie doen also sijn hant vinden sal op elken ephi een hin olyen.

8

Ende als die

[p. *584]

prince incomen sal. so sal hi incomen alden wech vander poerten voerhuse ende doer die selue poerte sal hi wtgaen.

9

Ende als dat volc vanden lande incomen sal in des heren aenscouwen inden hogen feesten: die incoemt doer die poerte van noerden om te aenbedene: hi gae wt alden wech der poerten van zuden Mer die in coemt doer den wech vander zwtpoerten: hij sal wtgaen alden wech ter poerten van noerden. Hij en kere niet weder alle den wech vander poerten daer hi doer inquam: mer hi sal rechte ieghen die poerte wtgaen

10

Ende die prince sal in midden hem luden wesen. Mitten ghenen die incoemen: sal hi incomen: ende mitten genen die wtgaen sal hi wtgaen:

11

ende inder iaermarcten ende inden hoghen feesten sal die sacrificie wesen een ephi telken calue. ende een ephi telken ramme: ende vanden lammeren sal die sacrificie wesen alsoet sijn hant vinden sal: ende telken ephi salmen doen een hin olyen.

12

Ende als die prince doen sal wt sijns selues wille holocaust of willighe paeysende offerhande den here: soe salmen hem die poerte opdoen die ten oesten waert scouwet: ende hi sal sijn holocaust doen ende sijn paeysende offerhande alsomen pleghet te doen inden saterdaghe.. ende hij sal wtgaen: ende men sal die poerte sluyten na dat hi wtghegaen is.

13

Ende hi sal alle daghe doen een lam onbesmet van dien seluen iaer. in holocaust den here. Altoes sal hij des morghens dat doen.

14

Ende hi salre sacrificie opdoen alle morghen dat sestendeel van ephi: ende van olyen dat derdendeel van hin: datmense menghe mitten blomen. Die sacrificie den here sal wittelijc eenpaerlijc ende ewelijc wesen.

15

Hi sal een lam doen in sacrificien ende olye alle morghen in ewelijc holocaust.

16

Dit seit die here god. Ist dat die prince geuet een huys enighen van sijnen sonen Die erueachticheit daer of sal sijnre kinder wesen: ende si sullent erueachtelijc besitten.

17

Ende gheeft hi ene ghifte van sijnre erueachticheit enen van sijnen knapen: so sal dat sijn wesen totten iaer van verlatenissen: ende het sal wederkeren ten prince. Ende sijn erueachticheit sal sijnre sonen wesen.

18

Ende die prince en sal ouer crachtelic niet nemen van des volcs erueachticheit ende van haere possessien: mer hi sal sijnen kinderen gheuen erueachticheit van sijnre possessien: dattet volc niet verscheiden en werde elc van sijnre possessien.

19

Ende hi leede mi in dore den inganc die was vander poerten ziden in die tresorie cameren vander sanctuarien ten priesteren. die ten noerden wart scouweden: ende daer was een stat die ten westen waert ginc

20

ende hi seide tot mi. Dit is die stat daer die priesters zieden sullen ouer die misdaet ende ouer die sonde: daer si die sacrificie zieden sullen: dat sijt niet wt en draghen in dat buytenste vrijthof ende dat volc geheylicht werde.

21

Ende hij leide mi wt in dat buytenste vrijthof: ende hi leide mi omme ten vierhoken vanden vrijthouen Ende inden hoecke vanden vrijthoue was een vrijthoefkijn:

22

inden vierhoeken vanden vrijthoue waren

[p. *585]

die vrijthoefkens ghemaect viertich cubitus waren si lanc: ende dertich cubitus wijt.

23

Die vier waren van eenre maten. Ende een want was al omme ende omme die die vier vrijthoefkens omme ghinc: ende onder die poertaelkens waren kokenen ghemaect al omme.

24

Ende hij seide tot mi. Dit is dat huys vanden kokenen: daer in dat die dienres van des heren huys sullen ziede des volcks offerande.