Bible in duytsche (Delftse bijbel 1477)

§ Ca .xlv

1

ALs ghi dat lant beghint te deylen mitten lotte: soe verscheit die primicien die den here gheheilicht sal wesen vanden lande: die lenghede vijf ende twintich dusent: ende die wide thien dusent. Dit sal gheheylicht wesen in des lants termine al omme ende omme

2

Ende het sal van elker ziden geheylicht wesen vijfhondert bi vijfhonderden ten vier ziden al omme ende omme: ende vijftich cubitus in haren buyten lande al omme ende omme.

3

Ende van deser maten sultstu meten die lenghede van vijf ende twintich dusent: ende die wide van thien dusent. Ende daer in sal den tempel wesen ende sanctum sanctornm:

4

dat geheilichde vanden lande sal den priesteren wesen den dienres vander sanctuarien: die tot des heren dienste gaen. Ende hem sal een stat der heylicheit wesen in dat huys ende in die sanctuarie.

5

Ende die leuyten die den huyse dienen sullen. toebehoren die vijf ende twintich dusent der lengde ende die thien dusent der wijde. Si sullen besitten twintich tresorie cameren:

6

ende ghi sult gheuen alle den huse van israhel possessien vander steden in die widen vijf dusent ende in die lengede vijf ende twintich dusent: na dat afgescheiden der sanctuarien alle den huse van israhel.

7

Ende den prince van hier ende van daer in ofscheidinghe vanden sanctuarie. Ende in die possessie vander stat ieghen dat aensicht des verscheidens vander sanctuarien ende ieghen dat aensicht der possessien vander poerte vander ziden vander zee totter zee: ende vander ziden van oest totten oesten.. Ende die lengde nae elke scheiden vanden delen vanden westen termine totten termine van oest:

8

vanden lande sal hem wesen possessie in israhel.. Eude die princen en sullen voertmeer mijn volc niet verwoesten mer si sullen den huse van israhel dat lant gheuen na haren geslachten

9

Dit seit die here god. Ghi princen van israhel v si ghenoech: laet aehter die quaetheit ende die rouen: ende duet vonnisse ende gherechticheit. Verscheit v lant van mijnen volcke seit die here god.

10

U luden sal wesen een gherechte waghescale ende een gherechte ephi ende een gherechte batus.

11

Ephi ende batus sullen gelike wesen ende van eenre maten so dat een batus bina dat thiendendeel van chorus nemen sal ende ephi oec dat thiedendeel van chorus. Nae die mate van chorus sal haer ghewichte ghelijc wesen.

12

Ende die sycle sal twintich hellinghe hebben. Voert twintich sicle ende vijf ende twintich sicle. ende vijfthien sicle maken en mijne.

13

Ende dit sijn die primicien die ghi nemen sult: dat sestendeel van ephi van enen chorus tarwen: ende dat sestendeel van ephi van enen chorus gersten.

14

Dit is oec die mate vander olyen. Een batus olyen is dat thiendendeel van chorus. Want thien batus vollen een chorus.

15

Ende enen ram vanden cudden van tweehondert scapen. van dien die israhel voet in sacrificie ende in holocauste ende in paeyseliken offerhanden: om te suueren ouer

[p. *583]

v seit die here god.

16

Al dat volc vanden lande sal ghehouden sijn in desen primicien den prince in israhel:

17

Op den prince sullen wesen holocauste ende sacrificien ende versche sacrificien inden hoghen feesten ende inden calenden ende inden saterdaghen: in allen den hoghen feesten des huys van israhel. Hi sal doen sacricie ouer die sonde ende holocauste ende paeyselike offerhande: om te suueren ouer dat huys van israhel.

18

Dit seit die here god. In die eerste maent in enen daghe vander maent sultstu nemen een onbesmet calf vanden vye. ende du sultste die sanctuarie suueren.

19

Ende die priester sal nemen vanden bluede dat ouer die sonde wesen sal: ende hi salt legghen aen die stilen vanden huys. ende inden vierhoeken vandes outaers cante ende in die stilen der poerten vanden binnensten vrijthoue

20

Ende aldus sultstu doen inden seuenden dage vander maent ouer elcken die ghedoelt heeft ende mit dolinghe bedroghen is: ende du sultste suueren ouer dat huys.

21

In die eerste maent inden vierthienden daghe vander maent sal v luden wesen die feeste van paesschen. Seuen daghe salmen derue broet eten.

22

Ende in dien daghe sal die prince doen ouer hem ende ouer alle dat volc vanden lande een calf ouer die sonde.

23

Ende inder feesten van dien seuen daghen sal hi den here holocauste doen: seuen calueren ende seuen rammen onbesmet elcs daghes seuen daghe lanck ende elcs daghes ouer die sonde enen boc vanden gheiten:

24

ende een ephi sacrificien telken calue. ende een ephi sal hi doen telkeu ramme: ende telken ephi sal hij doen een hin olyen.

25

In die seuende maent inden vijfthienden dage vander maent in die feeste sal hi doen die dinghen also die voerseit sijn seuen daghe: beide ouer die sonde ende ouer holocaust ende in die sacrificie ende in die olye