Bible in duytsche (Delftse bijbel 1477)

§ Ca .xliiij

1

ENde ic keerde mi omme ten weghe waert vander buytenster poerten der sanctuarien die ten oesten waert scouwede: ende si was ghesloten.

2

Ende die here seyde tot mi. Dese poerte sal besloten wesen. ende men salse niet opdoen: ende ne gheen man en salre doer liden. want die here god van israhel quammer doer in: ende si sal den prince besloten wesen.

3

Die prince hi salre in sitten: dat hi broet eten sal voerden here. Alden wech des voerhuys der poerten sal hi incomen: ende bi dien weghe sal hi wtgaen.

4

Ende hi leeder mi toe alle den wech der poerten van noerden in dat aenscouwen vanden huys: ende ic sach ende sich. des heren glorie veruolde des heren huys. Ende ic viel op mijn aensicht: .

5

ende die here seide tot mij. Des menschen sone sette dijn herte ende sich mit dijnen oghen: ende hoer mit dijnen oren alle dat ic spreke tot di: van allen den oeffeninghen van des heren huys ende van allen sijnen wetten. Ende du sultste dijn herte setten inden wege vanden tempel tot alle den wtgangen vander sanctuarien:

6

ende du sultste segghen ten huse van israhel dat mi veronwaert. Dit seit die here god. Huys van israhel v sijn ghenoech alle v sonden:

7

om dat ghi inbringhet vreemde kinder die onbesneden sijn van herten ende onbesneden van vleysche dat si in mine sauctuarie sijn sullen ende mijn huys besmetten sullen: ende ghi offert mine brode dat ruete ende dat bluet: ende ghi breect mine belofte in allen uwen sonden:

8

ende ghi en hebt niet ghehouden die geboden van mine sanctuarie. ende ghi hebt tot uwes selfs behoef gheset die behueders van mijnen gheboden in mijne sanctuarie

9

Dit seit die here god Elc vreemt gheboren die onbesneden van herten is ende onbesneden inden vleysche die en sal niet comen in mijne sanctuarie: elc vreemt kint dat in die midden der kinder van israhel is.

10

Mer oec ende die leuiten die verre van mi wech ghingen inder kinder van israhels dolinghe. ende si van mi doelden in haren afgoden. ende droeghen hare quaetheit:

11

die sullen in mijne sanctuarie wesen wachters vanden huys ende doerwarers van des huys poerten: : ende die dienres vanden huys. Si sullen doden des volcs holocauste ende victimen: ende si sullen staen in haren aenscouwen om hem te dienen.

12

Om dat si dien dienden inden aenscouwen van haren afgoden. ende dat si worden den huyse van israhel in een verbelghen der quaetheit: hier omme heb ic mijne hant opgeheuen op hem seit die here god: ende si hebben hare quaetheit ghedragen.

13

Ende si en sullen mij niet naken dat si mijns priesterscaps ghebruken sullen: noch si en sullen niet toegaen te allen mijnen sanctuarien neuen sancta sanctoeum: mer si sullen hare scande draghen ende hare sonden die si ghedaen hebben

14

ende ic salse gheuen doerwachters vanden huys ende in alle sijnen dienste: ende in alle

[p. *581]

dien datmenre in doen sal.

15

Ende die priesters ende die leuiten sadochs sonen die hueden die oeffeninge van mijne sanctarie als die kinder van israhel van mi doelden. si sullen tot mi comen om mij te dienen: ende si sullen staen in minen aenscouwen: om mi te offeren dat ruete ende dat bluet seit die here god.

16

Sij sullen gaen in mijne sanctuarie: ende si sullen gaen in mijnre tafelen: om mi te dienen ende mijne oeffeninghe te hueden.

17

Ende als si ingaen sullen inden poerten vanden binnensten vrijthoue. soe sullen si lijnen clederen aendoen: ende op hem en sullen niet wollens cledes comen als si dienden inden poerten vanden binnensten vrijthoue ende daer binnen.

18

Linen huyfden sullen si op haer hoefden hebben: ende linen broken sullen wesen aen haer lendenen: ende si en sullen hem niet toegorden in zwete.

19

Ende als si wtgaen sullen dat buytenste vrijthof ten volke. so sullen si haer clederen wtdoen daer si in ghedient hadden: ende si sullense oplegghen in een tresorie camer vander sanctuarien. ende si sullen hem cleden mit anderen clederen: ende si en sullen dat volc niet heylighen in haren clederen.

20

Ende si en sullen haer hoeft niet scheren: noch haer hare voeden: mer scherende sullen sijt omtrent haer hoeft afscheren.

21

Ende en gheen priester en sal wijn drincken als hi gaen sal in dat binnenste vrijthof.

22

Ende een weduwe ende een wijf die versteken is die en sullen si niet te wiue nemen: mer magheden van des huses sade van israhel Mer oec sullen si nemen die weduwe die van euen priester is:

23

ende si sullen mijn volc leren wat dat is tusschen heilich ende besmet: ende tusschen suuer ende onsuuer sullen si hem togen.

24

Ende als gheschil wesen sal. soe sullen si staen in minen vonnissen ende oerdelen: si sullen wachten mijne wet ende mine geboden in allen mijnen groten feesten: ende si sullen heylighen mijne vierten vanden saterdaghen.

25

Ende si en sullen te ghenen doden mensche ingaen dat si niet besmet en worden: sonder ter vader ende ter moeder ende ten sone ende ter dochter ende ten brueder ende ter suster die den anderen man niet gehadt en heeft: in desen sullen si besmet worden.

26

Ende nae dat hi ghesuuert sijn sal. soe salmen hem seuen daghen tellen.

27

ende in dien daghe dat hi in die sanctuarie gaen sal ten binnensten vrijthoue vanden inganghe om mi te dienen in mijne sanctuarie: so sal hi offeren ouer sine sonden seit die here god.

28

Ende hem en sal ghene erfachticheit weesen.. Ic sal haere erueachticheit wesen. ende ghi en sult hem ghene possessie gheuen in israhel. Want ic sal hare possessie wesen.

29

Die victime ende die offerhande ouer die sonde ende ouer die misdaet sullen si eten: ende alle beloefte in israhel sal haer wesen.

30

Ende die voerbarichste van allen eerstgheboren ende alle verssche offerhanden van allen datmen offert: sal des priesters sijn. Ende die voerste van uwen spisen suldi den priesteren gheuen: dat hijt oplegghe ten benedictien sijnen huse

31

Die priesters en sullen niet eten enich croengie die ghestoruen is of dat van eni-

[p. *582]

ghen beeste gheuaen is vanden voghelen ofte van scapen ofte van vye.