Bible in duytsche (Delftse bijbel 1477)

§ Capittel .xliij.

1

ENde hi leede mi wt der poerten die scouwede ten weghe waert van oest

2

Ende sich gods glorie van israhel quam in alden wech van oest: ende hem was die stemme als die stemme van vele wateren: ende die aerde verlichte van sijnre mogentheit.

3

Ende ic sach dat visioen na die ghedaente die ic ghesien hadde als hi quam om die stat te destruerene ende na dat aensien dat ic ghesien hadde neuen die rinier cobar. Ende ick viel op mijn aensichte.

4

Ende des heren mogentheit ginc inden tempel: alden wech vander poerten die scouwede ten oesten waert.

5

Ende die gheest hief mi op: ende bracht mi in dat butenste vrijthof Ende sich dat huys wort veruolt vandes heren glorie.

6

Ende ic hoerden spreken te mi vanden huys. Ende die man die neuen mi stont seide tot mi.

7

Des menschen sone. dit is die stat mijns zetels ende die stat mijnre voeten: daer ic wone in midden den kinderen van israhel ewelike. Ende dat huys van israhel en sal voertmeer niet besmetten mijnen heylighen name: si ende haer coninghen in haren vernoeyeertheden ende in den vallen van haren coninghen ende inden hoecheden:

8

die ghemaect hebben haren dorpel neuen mijnen dorpel: ende haer stile neuen mine stilen: ende een muer was tusschen mi ende hem. Ende si besmetten mijnen heylighen name in haren onwaerdicheden dien si daden: ende hier omme heb icse verderft in mijne gramscap.

9

Nu hier omme so verdriuen si wech verre van hare vernoyeertheit. ende hare coninghen vallen verre van mi. ende ic sal altoes in midden hem wonen.

10

Hier om du des menschen sone: toech den huyse van israhel den tempel. ende sij scamen hem van haren quaetheden: ende si meten dat gestichte:

11

ende si scamen hem van allen dien dat si

[p. *579]

ghedaen hebben. Toech hem die figure vanden huys ende dan sijnen ghestichte vanden inganghe ende vanden wtganghe. ende alle des huys bescriuen ende alle sine gheboden: ende alle sijn ordinancie ende toecht hem alle sijn wet. ende du sultste dat bescriuen voer haren ogen. om dat si huden sullen alle dat huys bescriuen ende sine geboden: ende dat si die doen sullen.

12

Dit is die wet vanden huse opten top vanden berghe. Alle sijn eynden al omme ende omme. is dat heilighe der heylighen. Dit is dus die wet vanden huys

13

Dit sijn die maten vanden outaer inden ghewarighen cubitus: die hadde ene cubitus ende een palme in die lenghede. In sijnen bosem was een cubitus: ende een cubitus in die wide: ende die eynden tot sinen boorde al omme ende omme was een palme. Dat was oec die gracht vanden outare.

14

Ende vanden bodeme der aerden totten achtersten cante waren twe cubitus: ende die wide van enen cubitus. vanden meesten cante totten minsten cante waren vier cubitus. ende die wijde was van enen cubitus

15

Ende dat outaer was van vier cubitus: ende vanden outare tot bouen waren vier hoernen.

16

Ende die outaer hadde twaelf cubitus in die lengde ende twaelf cubitus in die wide: ende hi was viercantich mit geliken ziden.

17

Ende die cant hadde veerthien cubitus in die lenghede ende veerthien cubitus in die wide in sijne vierhoeken: ende een crone was al omme ende omme den outaer van enen haluen cubitus: ende haren bodem was van enen cubitus al omme ende omme Ende sine trappen waren oestwaerts.

18

Ende hi seide tot mi. Des menschen sone: dit seit die here god. Dit sijn die zeden vanden outaer in so wat daghe dat hi sal gemaect sijn: datmen daer op holocaust offere ende dat bluet daer op storte.

19

Ende du sultste gheuen den priesteren. ende den leuyten die van sadochs sade sijn die tot mi toegaen seit die here god: dat si mi offeren sullen een calf vanden vye ouer die sonde.

20

Ende du sultste nemen van sijnen bluede ende du sultstet legghen op die vier hoernen vanden outaer. ende op die vier hoken vanden cante. ende op die crone al omme ende omme: ende du sultste den outaer suueren ende suuer maken.

21

Ende du sultste nemen dat calf dat gheoffert is ouer die sonde: ende du sultste dat verbernen in een verscheyden stat vanden huys buyten der sanctuarien.

22

Ende inden anderen dage sultstu offeren enen boc vander gheyten onbesmet ouer die sonde: ende si sullen den outaer suueren also sijne suuerden inden calue.

23

Ende alstu voldaen hebste den outaer suuerende so sultstu offeren een onbesmet calf vanden vye: ende enen onbesmetten ram vanden cudden:

24

ende du sultstese offeren in des heren aenscouwen. Ende die priesters sullenre sout op werpen ende si sullense offeren den here in holocauste.

25

Seuen daghen sultstu elcs daghes doen enen bock ouer die sonde: ende een calf vanden vye ende enen ram vanden scapen alle onbesmet sullen sijse offeren

26

Seuen daghen sullen si den outaer suueren ende die suuer maken: ende sullen sijn hant vollen.

27

Ende als die daghen voldaen sijn inden achtensten dage ende voertaen:

[p. *580]

sullen die priesters opten outaer ghieten uwe holocauste. ende die si offeren ouer den paeys: ende ic sal v gepaeyt wesen seit die here god