Bible in duytsche (Delftse bijbel 1477)

§ Ca .xlij.

1

HI leede mi wt in dat buytenste vrijthof den wech die leet ten noerden. Ende hi leede mi in die tresorie camere die was ieghen dat verscheiden ghesticht: ende ieghen dat huys dat ten noerden waert staet.

2

dat in dat aensichte der lenghede vanden doren van noerden hadde hondert cubitus: ende inder widen vijftich cubiten

3

ieghen die twintich cubitus vanden binnensten vrijthoue: ende ieghen dat pauement dat van stenen ghemaect was vanden buytensten vrijthoue. daer was een poerteal gheuoghet ant drieuoudich poertale.

4

Ende voer die tresorie cameren was een wandelinghe van thien cubitus wijdt siende totten binnensten des wechs van een cubitus. Ende haer doren waren ten noerden waert

5

daer waren die tresorie cameren vernedert inden hoechsten: want si droegen onder die portale die wt die schenen vanden ondersten ende vanden middelsten des gestichts.

6

Want het waren tresorie mit drien cameren: ende si en hadden ne ghene columnen alsoe die columpne vanden vrijthoue waren. Daer om ghinghen si opwaert vanden ondersten ende vanden middelsten vander aerden vijftich cubitus.

7

Ende die ommeganc van buyten ende die tresorie cameren die waren inden wege van den buytensten vrijthoue voer die tresorie cameren. Die lenghede daer of was van vijftich cubitus.

8

want die lenghede der tresorie cmeren vanden buytensten vrijthoue was van vijftich cubitus: ende die lengede voer dat aensicht vanden tempel hondert cubitus.

9

Ende onder die tresorie cameren was die inganc van oesten der geenre dier in quamen vanden buytensten vrijthoue:

10

ende in die wide des ommeganghes vanden vrijthoue dat ieghen den wech van oest was in dat aensicht vanden verscheiden ghesticht. Ende voer dat gestichte waren tresorie cameren:

11

ende die wech voer haer aensicht nae die ghelikenisse vanden tresorie cameren die inden wech van noerden waren. Na hare lenghede alsoe was oec hare wide: ende al haer inganc ende die ghelikenisse ende hare doren

12

na die doren vanden tresorie cameren. die waren inden wech die scouwede ten noerden waert: die dore was int hoeft vanden wege: welc wech was voer dat verscheiden voerhuys den ghenen die in quamen alden wech van oesten.

13

Ende hi seide tot mi. Die tresorie cameren van noerden. ende die tresorie cameren van zuden die sijn voer dat verscheiden ghestichte. dit sijn die heilige tresorie cameren: daer die piresteren in gheuoet werden die den here toenaken in sancta sanctorum. Daer sullen si legghen sancta sanctorum: ende die

[p. *578]

offerhande ouer die sonde ende ouer die misdaet. Want het is een heylige stat

14

Ende als die priesteren daer in ghegaen sijn: so en sullen si niet wtgaen vanden heyligen steden in dat buytenste vrijthof. Ende si sullen daer op legghen hare clederen daer si in dienen: want sij sijn heylich: ende si sullen mit anderen clederen ghecleet worden ende alsoe sullen si voertgaen ten volcke.

15

Ende doe si voldaen hadde die maten vanden binnensten huyse: soe leide hi mi wt alle den wech der poerten die scouwede ten wege waert van oest: ende hi matse allesins al omme ende omme.

16

Ende hi matse iegen den wint van oest mitten ride van maten: vijf hondert rieden: inden riede vanden maten al omme ende omme.

17

Ende hij matse ieghen den wint van noerden vijf hondert rieden: inden riede der maten al omme ende omme

18

Ende hi matse iegen den wint van zuden vijf hondert rieden: inden riede der maten

19

Ende hij matse ieghen den wint van westen vijf hondert rieden: inden riede der maten.

20

Ten vier winden waert mat hi den muyer vanden ghesticht allesins al omme ende omme: die lengde vijf hondert cubitus. ende die breetheit vijf hondert cubitus Ende die muyer die schiet ende deelde tusschen die sanctuarie ende des volcs stat.