Bible in duytsche (Delftse bijbel 1477)

§ Capit .xl.

1

INden vijf ende twintichsten iaer onser oueruaert int beginne van den iare opten thienden dach vander maent inden veerthiensten iare na dat die stat van iherusalem geslagen was: in desen seluen daghe soe was des heren hant op mi ghedaen: ende hi brachte mi darwaert

2

in gods visioenen. Ende hi brachte mij in dat lant van israhel. ende hi liet mi op enen seer hoghen berch daer op was als ghestichte van eenre stat die ghesterct was ten zuden waert

3

ende hi leide mi daer in. Ende sich een man wiens gedaente was als die gedaente van coper: ende in sijn hant was een linen coerde: ende een riet van maten in sijn hant Ende hi stont in die poerte:

4

ende die selue man sprac tot mi. Des menschen

[p. *573]

sone: sich mit dijnen ogen ende hore mit dijnen oren: ende sette dijn herte in alle dien dinghen die ic die thonen sal: want du biste hier ghehracht om datmense di toghen sal Boetscapt den huse van israhel alle dattu sietste.

5

Ende sich ene muyer was buyten allesins al omme dat huys: ende in des mans hant was een riet van maten dat lanc was ses cubitus ende een palme Ende hi mat die wide vanden ghestichte mit enen riede. ende die hoecheit oeck mit enen riede

6

Ende hi quam ter poerten die scouwede ten weghe waert van oest: ende hi ghinc op ende op hare trappen. Ende hi mat den dorpel vander poerten die wide mit ene riede. dat is den enen dorpel mit enen riede in die wide:

7

ende die zale die lenghede mit enen riede. ende in breetheit mit enen riede. ende tusschen die zale vijf cubitus:

8

ende den dorpel vander poerten neuen dat voerhuys vander poerten binnen mit enen riede.

9

Ende hi mat dat voerhuys vander poerten achte cubitus: ende dat voerhoeft daer of twee cubitus. Want dat voerhuys vander poerten was binnen

10

Voert die cameren vander poerten ten oesten weghe waert drie in die een zide ende drie in die ander zijde: een mate was vanden drien: ende een mate was vanden voerhoefden van beiden ziden.

11

Ende hi mat die wide des dorpels vander poerten thien cubitus: ende die lengde vander poerten derthien cubitus:

12

ende die lijste voer die cameren een cubitus: ende een cubitus was dat eynde van beiden. Ende die cameren waren van ses cubitus van hier ende van daer.

13

Ende hi mat die poerte vanden dake der cameren tot haren dake die wide vijf ende twintich cubitus: dore iegen dore.

14

Ende hi maecte dat voerhoeft tsestich cubitus verre: ende ten voerhoefde dat vrijthof der poerten allesins al omme ende omme:

15

ende voer dat aensicht der poerten die ghinc totten aensicht des voerhuys vander binnenster poerten vijftich cubitus:

16

ende cromme vensteren inden cameren ende in haren voerhoefden: die binnen der poerten waren allesins al omme ende omme. Ende oec waren inden voerhusen binnen al omme ende omme vensteren: ende voer die voerhoefde was ghepingeert die vrome van palmen

17

Ende hi leede mi wt ten butensten vrijthoue: ende sich inden vrijthoue waren tresoren cameren ende dat pauiment was ghepaueert mit stenen van binnen al omme ende omme. Dertich tresorie cameren waren al omme dat pauyment:

18

ende beneden was een pauiment int voerhoeft vanden poerten na die lenghede vanden poerten.

19

Ende hi mat die wide vanden aensichte der nederster poerten totten voerhoefden vanden binnensten vrijthoue buyten Hondert cubitus ten oesten waert ende ten noerden waert.

20

Hi mat oec die poerte die aensach den wech van noerden vanden butensten vrijthoue beide in die lengte ende in die wijde.

21

ende haer cameren drie in die een zide ende drie in die ander zide. ende haer voerhoefden ende haer voerhuys na mate vander eerster poerten: hare lengte vijftich cubitus: ende die wide vijf ende twintich cubitus.

22

Ende haer vensteren ende hare voerhuys ende

[p. *574]

die wtghehouden dinghen na die mate der poerten die ten oesten waert scouweden: ende haren opganc was van seuen trappen. Ende een voerhuys voer haer

23

ende die poerte vanden binnensten vrijthoue ieghen die poerte van noerden ende ieghen die oestpoerte. Ende hi mat van die een poerte tot die ander poerte hondert cubitus.

24

Ende hy leede mij wt ten zuden weghe: ende sich een poerte die scouwede ten suyden waert. Ende hi mat haer voerhoeft ende haer voerhuys na die maten van bouen.

25

Ende hare ventsteren ende haer cameren al omme als die ander ventsteren: die lengte vijftich cubitus. ende die wide vijf ende twintich cubitus:

26

ende mit seuen trappen ghincmenre toe op. Ende een voerhuys was voer haer doren: ende daer waren ghesneden palmen aen haer voerhoeft een in die een zide ende die ander in die ander zide:

27

ende die poert vanden binnensten vrijthoue was inden wech zuytwaerts. Ende hi mat vander poerten totter poerten inden wech zuytwaerts. hondert cubitus.

28

Ende hi leede mi in dat binnenste vrijthof ter zuyt poerten: ende hi mat die poerte na die maten van bouen.

29

haer camere. ende haer voerhoeft ende haer voerhuys mit der selfder maten: ende haer ventsteren van haren voerhusen al omme ende omme in die lengte vijftich cubitus. ende in die wide wijf ende twintich cubitus:

30

ende dat voerhuys al omme ende omme die lengte wijf ende twintich cubitus: ende die wide vijf cubitus.

31

Ende haer voerhuys ten buytensten vrijthoue waert: ende haer palmen aen haer voerhoeft: ende daer waren achte trappen daermen ter poerten mede opghinc.

32

Ende hi leede mi in dat binnenste vrijthof alden oesten wech: ende hij mat die poerte na die maten van bouen

33

haer camere ende haer voerhoefde ende haer voerhuse also sy bouen ghemeten sijn: ende haer ventsteren ende haer cameren al omme ende omme die lengte vijftich cubitus. ende die wide vijf ende twintich cubitus:

34

ende haer voerhuys dat is vanden buytensten vrijthoue ende palmen waren gesneden aen haer voerhoeft in die een zide ende in dander zide ende haer opganc was in achte trappen.

35

Ende hi leede mi ter poerten die ten noerden waert scouwede. Ende hi mat nae die maten van voer hare cameren

36

ende haer voerhoeft haer voerhuys ende haer vensteren al omme ende omme die lengte vijftich cubitus. ende die wide vijf ende twintich cubitus:

37

ende haer voerhuys scouwede in dat buytenste vrijthof. ende bordure van palmen in haer voerhoeft in die een zide ende in die ander zide: ende haren opganc was in acht trappen:

38

ende aen elke tresorien cameren was die dore inden voerhoefden vanden poerten. Ende daer dwoghen si die holocaust

39

Ende in dat voerhuys vander poerten waren twee tafelen in die een zide ende in die ander zide: datmenre op offeren soude die holocaust ende ouer die sonde ende ouer die misdaet.

40

Ende ter butenster ziden die opgaet ter doren vander poerten die ten noerden waert gaet waren twee tafelen. ende ter anderziden voer dat voerhuys vander poerten

[p. *575]

twee tafelen.

41

Vier tafelen waren in deen zide ende vier tafelen in dander zide: ten ziden vander poerten waren acht tafelen daer si op offerden.

42

Ende die vyer tafelen ten holocauste waren gemaect vanden viercantsten stenen. die lanc waren enen cubitus ende enen haluen. ende die een cubitus ende enen haluen wijt waren. ende enen cubitus hoghe: ende op die tafelen setten si die vate daermen in offert holocaust ende victime.

43

Ende hare boorden waren een palme breet: inwaert geuouden al omme ende omme. Ende op vie tafele was dat vleysch vander offerhande.

44

Ende buyten der binnenster poerten waren die tresorie cameren der sanghers inden binnensten vrijthoue dat was in die zide der poerten die ten noerden waert scouwet: ende hare aensicht ieghen den zuden wech: die een vander ziden der poerten van oest die scouwede ten weghe waert van noerden.

45

Ende hi seide tot mi. Dese tresorie camere die scouwet ten weghe van zuden waert sal sijn der priesteren die waken inden hueden vanden tempel:

46

mer die tresorie camer die scouwet ten weghe van noerden sal wesen die priesteren die waken ten dienste vanden outare. Dit sijn sadochs sonen die van leui sonen ten here gaen: om hem te dienen.

47

Ende hi mat dat vrijthof die lengede hondert cubitus. ende die wide hondert cubitus. inden vier ziden: ende dat outaer was voer dat aensichte vanden tempel.

48

Ende hi leede mi in dat voerhuys vanden tempel. ende hi mat dat poertael vijf cubitus in die een zide ende vijf cubitus in die ander zide: ende die wide vanden poertale drie cubitus in die een zide ende drie cubitus in die ander zide:

49

ende die lengte vanden poertale twintich cubitus ende die wide elf cubitus. Ende mit achte trappen gincmenre toe op: ende columnen waren inden voerhoefden: enen in die een zide ende die ander in die ander zide.