Bible in duytsche (Delftse bijbel 1477)

§ Ca. xxxix

1

DEs menschen sone prophetere du ieghen gog: ende du sultste segghen Dit seit die here god. Sich ic spreke op di gog prince van mosochs ende tubals hoefde:

2

ende ic sal di omleiden: ende ic sal di wtbrenghen. ende ic sal di doen opcomen vanden hoken van noerden: ende ic sal di brenghen op die berghen van israhel.

3

Ende ic sal dijnen boghe slaen in dijne luchterhant: ende dijne gescutten van dine rechterhant:

4

Ende ic sal di neder vellen. du sultste op die berghen van israhel vallen du ende alle dine scaren ende dat volke die mit di sijn Ic hebbe di ghegheuen teten den wilden beesten. den voghelen. ende alrehande gheuoghelten ende den beesten vanden lande

5

Du sultste op dat aensicht vanden velde vallen: want ic hebt ghesproken seit die here god.

6

Ende ic sal vyer in magog senden ende inden ghenen die in den eylande wonen betrouwelijc: ende si sullen weten dat ic die here bin.

7

Ende ic sal condt maken mijnen heilighen name in midden mijnen volke van israhel: ende ic en sal voertmeer niet besmetten mijnen heylighen name: ende die heydenen sullen weten dat ic die here bin heylich israhel:

8

siet het coemt. ende het is gedaen seit die here god. Dit is die dach daer ic of ghesproken hebbe.

9

Ende die ghene die wonen inden steden van israhel sullen wtgaen: ende sullen ontsteken ende sullen verbarnen die wapenen den schilt ende die speren den boge ende die ghescutten ende den stoc der hant ende die coluen: ende sullense seuen iaer inden vyer verbarnen.

10

Ende si en sullen niet draghen hout wt den lantscepe. noch ofhouden vanden busschen om te barnen: want si sullen die wapenen verbarnen inden vyere: ende si sullen rouen die ghene dien si in roue waren: ende si sullen vaen die gene die hem woesten seit die here god.

11

Ende het sal wesen: in dcen daghe sal ic gog geuen een stat een vermaert graf in israhel. der wegheganghers valeye ten oesten vander zee: die verwonderen duet die gene dier doer liden. Ende daer sullen si gog begrauen ende alle sine menichten: ende men salse heten der menichte van gogs valeye:

12

ende dat huys van itrahel sullense begrauen seuen maent om dat lant te suueren:

13

ende alle dat volc vanden lande sullense begrauen: ende hem sal wesen een ghenaemt dach daer ic in gheeert bin seit die here god.

14

Ende si sullen een paerlijc mannen setten die dat lant doersoeken sullen: diese begrauen ende soeken sullen die bleuen sijn bouen der aerden: om dat lant te suueren Ende na seuen maenden sullen sijse beginnen te soeken:

15

ende si sullen dat lant doer gaen al omme. ende als si sien sullen een been van enen mensche soe sullen si daer neuen setten enen tytel: tot dat die begrauers dat been begrauen sullen inder menichten van gogs valeyen.

16

Ende

[p. *572]

der stat name is amona: ende si sullen dat lant suueren

17

Hier om du menschen sone. Dit seit die here god. Segt alle den voghelen. ende alle den beesten vanden ackeren vergadert. Coemt voert loept te gader van allesins te mijnre offerhande die ic v offer. ene grote offerhande op die bergen van israhel: dat ghi dat vleysch eet ende dat bluet drinct.

18

Gi sult der starcker mannen vleysch eten ende ghi sult drincken der princen bluet vanden lande: ende vanden weders ende vanden lammeren ende vanden bucken ende vanden ghemesten stieren ende van allen vetten beesten.

19

Ende ghi sult dat ruet in satheden eten: ende dat bluet drincken in dronckenscap vander offerhande die ic v offer:

20

ende ghi sult op mijne tafele gesaedt worden vanden paerde ende vanden starcken ridere. ende van allen den mannen den vechters seit die here god.

21

Ende ic sal mijne glorie setten inden heydenen ende alle herdenen sullen sien mijne vonnisse dir ic gedaen hebbe. ende mijn hant die ic op hem gheleyt hebbe:

22

ende die husen van israhel die sullen weten dat ic die here haer god bin van dien daghe ende voertaen.

23

Ende die heydenen sullen weten dattet huys gheuaen was van israhel in hare quaetheit: ende om dat si mi lieten ende dat ic mijn aensicht van hem verbarch: ende lenerdse inder vianden handen ende si vielen allen inden zwaerde

24

Ic dede hem nae hare onsuuerheit ende na hare sonde: ende ic verbarch mijn aensicht van hem.

25

Hier om seit dit die here god. Nu sal ic iacobs gheuanghenisse wederbrenghen: ende ic sal alle dat huys van israhel ontfermen. Ende ic sal minen toerne an nemen om minen heylighen name:

26

ende si sullen hare scaemte dragen ende alle ouerdaet daer si mede ouerdet iegen mi ghedaen hebben. als si in haren lande betrouwelike wonen sullen nyemant ontsiende:

27

ende als icse wederbracht sal hebben vanden volken. ende ic sal vergadert hebben van haren vianden lande ende als ic in hem geheylicht wesen sal in veelre heydenen oghen.

28

Ende si sullen weten dat ic die here hare god bin. Om dat icse ouer gheuoert hebbe inden nacien: ende icse sal hebben vergadert in hare lant: ende als ic nyemant van hem luden daer ghelaten en hebbe.

29

Ende voertmeer en sal ic mijn aensicht niet verberghen van hem: om dat ic mijnen geest wtghestort hebbe op alle dat huys van isaahel seit die here god.