Bible in duytsche (Delftse bijbel 1477)

§ Capittel .xxxviij.

1

ENde des heren woert wert tot mi ghedaen ende hi seide.

2

Des menschen sone keer dijn aensicchte iegen gog ende magogs lant den princen van mosoch ende tubals hoefde: ende prophetere van hem.

3

ende du sultste tot hem segghen. Dit seit die here god. Sich ic spreke tot di gog den prince van mosoch ende tubals hoefde.

4

Ende ic sal di ommeleden. ende ic sal in dijn wangen enen breidel doen ende ic sal di wtbringhen ende al dijn heer die paerden ende die riders die alle ghecleet sijn mit pansieren: die grote menichte die begripen die glauie ende den schilt ende dat zwaert

5

Die van persen ende die van ethiopien ende van libien mit hem: die alle mit schilden ende mit helmen ghewapent sijn.

6

Gomer ende alle sijn scaren: dat huys van togorma die ziden van noerden ende alle sijn macht: ende vele volcs mit di.

7

Berede ende lere ende besitte di ende alle dine menichte die vergadert is te di: ende du sultste hem wesen in ghebot.

8

Na vele dagen sultstu gheuisiteert worden. Inden achtersten iaer sultstu coemen ten lande

[p. *570]

dat wederghekeert is vanden zwaerde: ende dat venrgadert is van vele volcs: ten berghen van israhel die eenpaerlijc woest waren. Dit lant is wtgebracht vanden volcke: ende si woendenre alle in betrouwelike.

9

Ende opcomende sultstu comen als een tempeest ende als een wolke: om dat lant te ouerdecken. Du ende alle dijne scaren: ende vele volcs mit di.

10

Dit seit die here god. In dien dage sullen die redenen op dijn hert comen: ende du sultste alte quaden ghepens pensen:

11

ende segghen. Ic sal opgaen ten lande dat sonder mure is. Ende ic sal comen ten ghenen die rusten ende in sekerheden wonen: alle dese wonen sonder muyer Hem en sijn niet grendelen noch poerten.

12

Om dattu die roue rouen sultste ende den roef aenvaen sultste: ende dattu dijn hant op hem brenghen sultste die woest gheweest hadden ende daer na weder tot haren staet geset: ende op dat volc dat vergadert is ende wt den heydenen dat begonnen heeft te besitten. ende dat woent in die middewaert vander werelt.

13

Saba ende dedan ende die coepluden van tharsis ende alle haer liebaerden sullen di seggen. En coemstu niet om die roue te nemen? Sich du hebtste dijn menichte vergadert omden roef te rouene: om dattu nemen sultste siluer ende gout: ende dattu huys ghewant ende dat guet wech dragen sultste ende rouen ouertallike rouen.

14

Hier om prophetere des menschen sone: ende du sultste tot gog segghen. Dit seit die here god En sultstuut niet in dien dage als mijn volc van israhel betrouwelijc wonen sal weten

15

ende comen van sijnre stat van den hoken van noerden du ende vele volcs mitti: alle riders op paerden. een groet hoep ende een anxtelijc heer?

16

Ende sultstu comen op mijn volc van israhel als een wolke om dat lant te ouerdecken Inden achtersten daghen sultstu wesen: ende ic sal di bringen op mijn lant: dat die heydenen mij weten sullen als ic sal gheheylicht wesen in di in haren oghen gog.

17

Dit seit die here god. Hier om bistu die. daer ic of ghesproken hebbe inden ouden daghen in mijn knechte der propheten hant van israhel: die propheteerden inden daghen van dien tiden dat ic di bringhen soude op hem

18

Ende het sal sijn in dien daghe. dijnre coemsten gog op dat lant van israhel seit die here god: sal mijn ontwaertscap op comen in mijnre gramscap ende in mijnen toerne.

19

Inden vyer mijnre gramscap heb ict gesproken: want in dien daghe sal grote beruerynge sijn op dat lant van israhel:

20

ende van mijnen aensichte sullen beruert worden die visschen vander zee. ende die voghelen des hemels ende die beesten vandeu acker: ende elc crupende worm die beruert wort op die aerde: ende alle die menschen die sijn op dat aensicht vander aerden Ende die berghen sullen omgheworpen worden: ende die tuynen sullen vallen: ende elke mure sal ter aerder vallen.

21

Ende ic sal ieghen hem vergaderen in allen minen berghen dat zwaert: seit die here god. Elcs mans zwaert salmen steken in sijnen brueder.

22

Ende ic sallen vonnessen mit sterften ende mit bluede ende

[p. *571]

mit anxteliken reghene: ende mit harden groten hagelstenen. Ic sal op hem ende op sijn heere ende op vele volcs die mit hem sijn reghenen vyer ende sulphur

23

Ende ic sal werden verheuen ende gheheilicht: ende ic sal condt ghemaect werden in vele heydenre oghen: ende si sullen weten dat ic die here bin