Bible in duytsche (Delftse bijbel 1477)

§ Ca .xxxvij.

1

ENde des heren hant wert op mi ghedaen:

2

ende hi leyde mi wt inden gheest des heren. ende hi liet mi in midden een velt dat vol beenre was: ende hi leide mi al omme ende omme die beenre. Want het wasser herde vele op dat aensichte vanden velde ende anxteliken droghe.

3

Ende hi seide tot mi. Des menschen sone. Waenstu iet of dese beenre leuen? Ende ic seide. Here god du weetstet.

4

Ende hi seide tot mi. Prophetere van desen beenren. Ende du sultste hem segghen. Droghe beenre: hoert des heren woert.

5

Dit seit die here god desen beenren. Siet ic sal in v senden enen gheest. ende ghi sult leuen:

6

ende ic sal op v gheuen zenuwen. ende ic sal op v doen vleysche wasschen: ende ic sal daer bouen in v spreiden een vel: ende ic sal v gheuen den gheest ende ghi sult leuen. ende ghi sult weten dat ic die here bin.

7

Ende ic propheteerde also hi mi beuolen hadde. Ende doe ic propheteerde so wort een gheluyt ghemaect: ende siet daer wort een berueren. Ende die beenre ghingen ten beenre elc aen sijn let.

8

Ende ic sach. Ende sich op hem quamen zenuwen ende vleysch: ende daer bouen wort in hem een vel ghespreyt ende si en hadden ne ghenen gheest.

9

Ende hi seide tot mi. Prophetere ten gheeste: prophetere des menschen sone: ende du sultste tot den gheest segghen. Dit seit die here god. Geest coemt vanden vyer winden: ende blase in op dese verslaghenen: ende si worden weder leuende.

10

Ende ic propheteerde alsoe hi mij beuolen hadde: ende in hem quamen die gheesten ende si leefden: ende si stonden op hare voeten. een alte groten heer.

11

Ende hij seide tot mi. Des menschen sone: alle dese beenre is dat huys van israhel. Si segghen. Onse beenre sijn verdroecht ende onse hope is verloren: ende wi sijn afghesneden.

12

Hier om prophetere: ende segt tot hem. Dit seit die here god. Siet ic sal uwe graue opdoen: ende mijn volc ic sal v leiden wt uwen grauen: ende ic sal v leiden in dat lant van israhel

13

Ende ghi sult weten dat ic die here bin. als ic v graue op sal hebben ghedaen: ende als ic v wt sal hebben gheleit wt uwen grauen mijn volc:

14

ende als ic mijnen gheest in v sal hebben ghegheuen ende ghi leuen sult. Ende ic sal v doen rusten op v lant ende ghi sult weten dat ic die here ghesproken heb ende hebt ghedaen: seit die here god.

15

Ende des heren woert wrot tot mi ghedaen ende hi seide.

16

Ende du des menschen sone neem di een hout: ende scrijf daer op. iudas ende der kinder van israhel sijnre gesellen Ende neem een ander hout: ende daer op scrijf. ioseph effrayms hout: ende al dat huys van israhel ende alle sijnre ghesellen.

17

Ende die houte sultstu voghen die een aen die ander di te enen houte: ende in een vergadert sullen si in dijn hant wesen.

18

Ende als dijns volcs kinder tot di segghen sullen sprekende. en seitstu ons niet wattu in die houten di wiltste.

19

so sultstu

[p. *569]

tot hem spreken. Dit seit die here god Siet ic sal aen nemen iosephs hout. dat in effrayms hant is ende die ghegheslachten van israhel die mit hem gheuoget sijn: ende ic sal dat te gader geuen mit iudas houte ende ic salse maken in een hout: ende si sullen een hout sijn in sijn hant.

20

Ende die houten daer du op ghescreuen hebste sullen voer haer oghen in dijn hant wesen:

21

ende du sultste tot hem segghen. Dit seit die here god. Siet ic sal aen nemen die kinder van israhel van midden den nacien daer si toe wech ghegaen sijn: ende ic salse van allesins vergaderen ende ic salse brengen te haren lande

22

Ende ic salse een volc maken int lant inden berghen van israhel: ende een coninc sal bouen hem allen regneren Ende en sullen voertmeer niet twe luden wesen: noch si en sullen niet meer ghedeelt worden in tween riken.

23

noch si en sullen niet besmet worden in haren afgoden ende in haren onwaerdicheden. ende in allen haren quaetheden: ende ic salse behouden maken van alle haer sittenen daer si in sondichden: ende ic salse suueren. Ende si sullen mi volc wesen ende ic sal hem god wesen:

24

ende dauid mijn knecht sal coninc bouen hem wesen: ende een herde sal haerre alre here wesen Si sullen wandelen in mijnen vonnissen ende si sullen mine ghebode hueden. ende doense.

25

Ende si sullen wonen op dat lant dat ic gaf iacob mijnen knecht daer hare vaderen in woenden: ende si sullenre op wonen si ende hare kinderen ende hare kinder kinderen tot inden eweliken ende dauid mijnen knecht sal hare prince wesen ewelike.

26

Ende ic sal hem slaen die belofte van paeyse: ewelike paeys sal hem wesen. Ende ic salse fonderen ende menichfoudighen: ende ic sal mijne gheheylichtheit gheuen in midden hem ewelike.

27

Ende mijne tabernacule sal in hem wesen. ende ic sal hem god wesen ende si sullen mij volc wesen.

28

Ende die heyden sullen weten dat ic die here bin der heiligher van israhel: als mijne geheilichtheit in midden hem wesen sal ewelike.