Bible in duytsche (Delftse bijbel 1477)

§ Ca .xxxvi

1

ENde du des menschen sone prophetere op die bergen van israhel: ende du sultste segghen. Berghen van israhel hoert des heren woert.

2

Dit seit die here god. Om dat die viant van v gheseit heeft verblide. die ewelike hoecheden sijn ons in erueachticheden ghegheuen:

3

hier omme prophetere ende seg. Dit seit die here god. Om dat ghi bedroeft sijt al omme ende omme vertreden. ende geworden sijt

[p. *566]

in erueachticheden anderen luden: ende om dat ghi opghecomen sijt op die lippe vander tonghen ende in lachtere des volcs:

4

hier omme ghi berghen van israhel hoert des heren gods woert. Dit seit die here god den berghen ende den houelen den riuieren ende den valeyen ende den woesten verdestrueerden wanden. ende den steden die ghelaten sijn vanden menschen: ende gedestrueert sijn ende veronwaert vanden anderen luden al omme ende omme.

5

Hier om seit dit die here god. Want inden vyer mijns toenrs heb ic ghesproken vanden anderen luden ende van al ydumea: die mijn lant hem seluen ghegheuen hebben in erueachticheit mitten zwaerde ende mit alre herten ende vten wille: ende verdreuent om dat sijt woesten souden:

6

hier om prophetere op dat lant van israhel: ende du sultste segghen den berghen ende den houelen ende den toppen vanden bergen ende den valeyen. Dit seit die here god. Siet ic hebt ghesproken in mijnen toerne ende in mijne geamscap: om dat ghi der heydenen lachter gedoget hebt

7

Hier om seit die here god. Siet ic heb mijne hant opgheheuen dat die heydenen die al omme ende omme v sijn dat si haren lachter draghen sullen:

8

mer gi berghen van israhel spreit wt uwe telgheren dat ghi groeyen moghet: ende bringhet uwe vrucht mijnen volc van israhel. Want het is bi dat hi comen sal.

9

Want siet ic segghe tot v: ende ic sal te v waert werden bekeert. ende ghi sult werden geackert: ende ontfaen saet

10

ende ic sal in v menichfoudigen die menschen ende alle dat huys van israhel. Ende men sal inden steden wonen. ende dat vallen wil salmen vermaken:

11

ende ic sal v veruollen mit menschen ende mit quicke ende si sullen ghemenichuoudicht worden ende wassen. Ende ic sal v doen wonen als vanden beghinne: ende ic sal v te meerre guede gheuen dan ghi vanden beghinne had: ende ghi sult weten dat ic die here bin.

12

Ende ic sal menschen op v brenghen mijn volc van israhel: ende sij sullen di in erneachticheden besitten. Ende du sultste hem wesen in erueachticheit: ende du en sultste voertmeer niet toedoen dattu sonder hem sijn sultste

13

Dit seit die here god. Om dat si van v segghen dattu die menschen verslindes ende dattu dijn volc versmachtes

14

Hier om en sultstu niet meer die mensche eten: ende en sultste voertmeer dijn volc niet doden seit die here god.

15

Noch ic en sal niet meer in di doen horen der heydene scande: ende der volken lachter en sultstu niet draghen: ende du en sultste niet meer dijn volk verliesen seit die here

16

Ende des heren woert wert tot mi ghedaen ende hi seide.

17

Des menschen sone. dat huys van israhel woenden in haer lant: ende si besmettedent in hare weghen. ende in haren aernsticheden Na die onsuuerheit eens wijfs die hare maentsuueringhe heeft soe is haer wech gheworden voer mi:

18

ende ic hebbe mine onwaerdicheit op hem wtghestort om dat bluet dat si wtghestort hebben op dat lant. Ende si hebbent besmet in haren afgoden:

19

ende ic stroeydese inden heydenen ende si sijn ghedreuen inden lan-

[p. *567]

den: ende ic hebse gheuonnest nae hare weghen ende na hare vindinghen.

20

Ende si ghinghen inden heydenen te dien dat si in quamen. ende si besmetten mijnen heyligen name: alsmen van hem seide. dit is des heren volc: ende si ghinghen wt haren lande:

21

ende ic spaerde mijnen heyligen name: dien dat huys van israhel besmette inden heydenen daer sij ingecomen waren.

22

Hier omme sultstu den huse van israhel segghen. Dit seit die here god. . Huys van israhel ic en salt om v niet doen: mer om mijnen heylighen name dien ghi besmet hebt inden heydenen daer gi in gecomen sijt.

23

Ende ic sal mijnen groten name heylighen die besmet is onder den heydenen dien gi besmet hebt in midden van hem: om dat die heydenen weten sullen dat ic die here bin. seide die here vanden scaren: als ic in v geheilicht wesen sal voer hem.

24

Want ic sal v wech leeden vanden heydenen: ende vergaderen v van allen landen: ende ic sal v leiden in v lant.

25

Ende ic sal op v wtstortten suuer water: ende ghi sult ghesuuert werden van allen uwen smetten: ende van al uwen afgoden sal ic v suueren.

26

Ende ic sal v gheuen een nyewe herte: ende ic sal enen nyewen geest setten in midden v luden. Ende ic sal dat steenachtighe herte van v nemen: ende ic sal v gheuen een vleyschachtich herte:

27

ende ic sal mijnen gheest setten in midden v luden. Ende ic sal doen dat gi in mijnen geboden wandelen sult: ende dat ghi mijne vonnisse hueden sult ende wercken.

28

Ende gi sult wonen in dat lant dat ic uwen vaders gaf: ende ghi sult mi wesen in volcke: ende ic sal v in god wesen.

29

Ende ic sal v behouden van allen uwen besmetheden: ende ic sal die tarwe roepen ende die menichfoudigen: ende ic en sal in v niet den hongher setten.

30

Ende ic sal menichfoudighen die vrucht vanden houte. ende die groeynisse vanden acker: dat ghi voertmeer niet draghen en sult in den heydenen den lachter vanden hongher.

31

Ende ghi sult gedencken uwer alte quader weghen. ende uwer aernsticheden die niet guet en sijn: ende v sullen wanhaghen uwe quaetheden ende uwe sonden.

32

Om uwen wille en sal ict niet doen seit die here god: dat si v bekent Wort bescaemt ende scaemt v van uwen wegen huys van israhel.

33

Dit seit die here god. Inden daghe dat ic v suueren sal van alle uwen quaetheden. ende ic sal doen datmen indeu poerten wonen sal: ende als ic vermaect sal hebben dat vallen wil:

34

ende als dat woeste lant sal wesen geackert dat wilen was woest in elcs wegheganghers ogen:

35

dan sullen si segghen. Dat ongheackerde lant is geworden als een hof der weeldicheit ende die woeste steden die ghedestrueert ende omgheworpen sijn hebben gheseten bemuert.

36

Ende die heydenen die gelaten sullen sijn al omme ende omme v sullen weten want ic die here hebbe gesticht die ghedestrueerde steden. ende ic geplant hebbe dat ongheackert was: ic die here hebt ghesproken ende hebt ghedaen.

37

Dit seit die here god. Noch hier in sullen mi vinden dat huys van israhel: dat ic hem doen sal. Ic salse menichfoudighen als een cudde van men-

[p. *568]

schen

38

als een heylich cudde: alst cudde van iherusalem in haren solempniteiten. Aldus sullen die woeste steden vol wesen van cudden van menschen: ende si sullen weten dat ic die here bin