Bible in duytsche (Delftse bijbel 1477)

§ Capit .xxxv.

1

ENde des heren woert wert tot mi ghedaen ende hi seide.

2

Des menschen sone sette dijn aensichte ieghen den berch seyr: ende du sultste van hem propheteren

3

ende segghen hem. Dit seit die here god Sich ic spreke te di berch van seyr: ende ic sal mijn hant wtsteken op di: ende ic sal di gheuen beroeft ende woest.

4

Ic sal dijne steden destrueren ende du sultste woest wesen: ende du sultste weten dat ic die here bin.

5

om dattu ewelijc viant hebtste gheweest: ende hebste die kinderen van israhel beloken in des zwaerts handen inden tide haers vernoeys inden tide der achterster quaetheit.

6

Hier om leue ic seit die here god want ic sal di den bluede leueren. ende dat bluet sal di nauolghen. Ende want du dat bluet haetste: dat bluet sal di naeuolghen.

7

Ende ic sal den berch seyr geuen beroeft ende woest: ende ic sal van hem wechdoen den genen die gaet ende die wederkeert:

8

ende ic sal sine berghen veruollen van sijnen verslagenen luden In dijnen berghen ende in dijnen valeyen ende in dinen beken sullen dijne verslagen vallen mitten zwaerde.

9

In eweliken wildernissen sal ic di leueren: ende men sal in dine steden niet wonen. Ende du sultste weten dat ic die here god bin:

10

om dattu gheseit hebste die twee lude ende die twee lande sullen mijn wesen. ende ic salse in erueachticheit besitten: als die here daer was.

11

Daer om leue ic seit die here god: want ic sal doen na dijne gramscap ende nae dijnen toern dien du gedaen hebste om dattuse hates: ende ic sal bi hem bekent werden als ic dij sal hebben gheuonnist:

12

ende du sultste weten dat ic die here bin. Ic hebbe alle dijne lachtere ghehoert dien du ghesproken hebste vanden berghen van israhel ende gheseit. Die gewoeste berghen sijn ons ghegheuen te verslindene.

13

Ende ghi stont op mit uwen monde ieghen mi ende hebt quaetheit ghesproken ieghen mi. Ic hebbe gehoert uwe woerden.

14

Dit seit die here god. Als al dat lant verbliden sal. soe sal ic di in wildernissen maken:

15

alsoe du verblijt biste op die erueachticheit des huys van israhel om dat si ghescheiden was: also sal ic di doen. Berch seyr du sultste ghescheiden wesen. ende al ydumea. ende si sullen weten dat ic die here bin