Bible in duytsche (Delftse bijbel 1477)

§ Capittel .xxxiiij.

1

DEs heren woert wert tot mi gedaen ende hi seide.

2

Des menschen sone prophetere vanden herden van israhel: prophetere ende du sultste segghen den herden. Dit seit die here god. Wee den herden van israhel: die hem seluen voeden. En werden die cudden niet gheuoet vanden herden?

3

Ghi aet die melc ende cledet v mitter wollen: ende dat vet was sloechdi doot: ende mijn cudde en voede ghi niet.

4

Ende dat cranc was en ghestarckede ghi uiet: ende dat sieck was en ghenaesdi niet. Dat te broken is en bondi niet te gader. ende dat afgeworpen is en haelde gi niet weder: ende dat verloren was en sochte ghi niet: mer mit felheden gebodi hem ende mit machte.

5

Ende mijn scapen sijn ghestroeyt om dat en gheen herde en was: ende si sijn geworden in verslinden alle den beesten vanden velde: ende si sijn gestroeyt

6

Mijne cudden doelden in allen berghen ende in elken hoghen houelen: ende mijne cudde sijn gestroeyt op alle die aensichte vanden lande: ende nyemant en was diese sochte Niemant en was segghe ic diese weder sochte.

7

Hier om gi herden hoert des heren woert.

8

Leue ic seit die here god: want om dat mijne cudden sijn gewerden in roue ende mijne scapen in verslinden alre beesten van den velde. om dat ne ghene herde en was: want die herden en sochten mijne cudden niet: mer die herden die voeden hem seluen. ende en voeden mijne cudden niet:

9

hier om ghi herden hoert des heren woert.

10

Dit seit die here god. Siet ic selue segghe op die herden: ic sal mijne cudde eysschen van haerre hant. ende ic salse doen ophouden datse voert meer niet en sullen voeden mijne cudden: ende die herden en sullen niet meer hem seluen voeden. Ende ic sal mine cudde verlossen van haren monde: ende en sal voertmeer hem niet wesen in spise.

11

Want dit seit die here god. Siet ic selue sal soeken mijne scapen: ende visiterense

12

alsoe een

[p. *564]

herde sijn cudde visiteert: inden daghe als hi is in die middewaert van sijnen ghescheidenen scapen. Alsoe sal ic mijne scapen visteren: ende ic salse verlossen van allen steden daer si in gestroeyt waren inden daghe der wolken ende der donckerheit.

13

Ende ic salse leiden wt den volke. ende ic salse vergaderen wt den lande: ende ic salse leiden in haer lant: ende ic salse voeden inden berghen van israhel inden beken ende in allen den pleynen vanden landen.

14

In vetten weyden sal icse voeden: ende inden hoghen berghen van israhel sullen haer weyden wesen. Ende daer sullen si rusten inden gruenen cruden: ende si sullen in vetten weyden geuoet werden op die berghen van israhel.

15

Ic sal mijne scapen voeden: ende ic salse te gader doen legghen seit die here god

16

Dat verloren was sal ic weder sueken. ende dat afgekeert was sal ic wederbringhen: ende dat te broken was sal ic toebinden. ende dat cranc was sal ic ghestarcken: ende dat vet ende starc was sal ic hueden. ende ic salse voeden in vonnisse.

17

Ende ghi mijne cudden: dit seit die here god. Siet ic vonnesse tusschen vye ende vye: vanden wederen ende bucken.

18

En wast v nyet ghenoech guede weyde te woesten al weydende? Hier en bouen die ouerblijue van uwen weyden vertradi mit uwen voeten: ende als ghi al claer water drinct: so vermodel di mit uwen voeten dat v bleef.

19

Ende mijne sapen worden gheuoet mit dien dat ghi mit uwen voeten vertreden hadt: ende dat uwe voeten vermodlet hadden dat droncken si.

20

Hier om seit dit die here god tot hem. Siet ic sal vonnisse tusschen vye ende vye vet ende magher.

21

Om dat ghi mitten ziden ende mitten scouderen hurtet ende mit uwen hoernen stiet alle dat crancke vye tot dat si daer buyten ghestroeyt worden:

22

so sal ic mijne cudde behouden ende en sal niet meer in roue wesen: ende ic sal vonnissen tusschen vye ende vye.

23

Ende ic sal op hem verwecken enen herde mijnen knecht dauid. Hi salse voeden: ende hi sal hem wese in enen herde.

24

Ende ic die here sal hem wesen in god: ende dauid mijn knecht prince in midden hem. Ic die here hebt ghesproken.

25

Ende ic sal mit hem maken ene belofte van paeyse: ende ic sal doen ophouden die quade beesten vanden lande. Ende die in die wildernisse wonen sullen in sekerheden slapen inden busschen:

26

ende ic salse setten in benedictien al omme mijnen bech: ende ic sal den reghen voertbrenghen te sijnen tide: ende het sullen wesen reghenen der benedictien:

27

ende dat hout vanden acker sal sijne vrucht bringen: ende die aerde sal gheuen haer groeyen: ende si sullen in haren lande wesen sonder vrese. Ende si sullen weten dat ic die here bin. als ic te broken hebben sal die kethenen van haren iocken: ende ic salse hebben verlost vander gheenre hant die bouen hem heerslappie hebben.

28

Ende si en sullen voertmeer niet wesen den heydenen in roue: noch die beesten vanden lande en sullense niet eten: mer si sullen betrouwelijc wonen sonder enighe vrese.

29

Ende ic sal hem verwecken een ver-

[p. *565]

maert saet: ende si en sullen voertmeer niet ghemindert worden mitten honger in dat lant: noch si en sullen niet meer draghen die lachtere vanden heydenen

30

Ende si sullen weten dat ic die here haer god bin mit hem: ende si mijn volc dat huys van israhel seit die here god.

31

Ghi sijt menschen mijn cudden. cudden mijnre weiden: ende ic bin die here v god: seit god die heee.