Bible in duytsche (Delftse bijbel 1477)

§ Ca. xxxiij.

1

ENde des heren woert wert tot mi ghedaen ende hi seide

2

Des menschen sone: spreec tot dijns volcs kinderen: ende du sultste tot hem segghen. Dat lant als ic daer op brengen sal dat zwaer ende neemt dat volc vanden lande enen man van haren achtersten ende sette dat volc bouen hem enen wachtere

3

ende siet hi dat zwaert comen op dat lant ende blaest hi mitten trompen ende boetscapt hijt den volc:

4

ende hoertet yemant so wie hi is dat geluut vander trompen ende wacht hem niet. ende coomt dat swaert ende neemt hem wech. sijn bluet sal op sijn hoeft wesen.

5

Dat gheluyt vander trompen heeft hi gehoert ende en heeft hem seluen niet ghewacht: sijn bluet sal in hem wesen. Ende ist dat hi hem wacht so sal hi sijn ziel behouden.

6

Ende ist dat die wachter dat zwaert siet comen ende en blaset hi mitter trompen niet ende en wacht hem dat volc niet. ende coemt dat zwaert ende neemt van hem een ziele: soe is die mensche gheuaen in sijn quaetheit mer sijn bluet sal ic eysschen van des wachters hant.

7

Ende du des menschen sone: ic hebdi den huse van israhel ghegheuen tot enen wachter. Hier om hoerstu wt mijnen monde ene redene: soe sultstuse hem boetscappen van mijnen wege.

8

Ist dat ic tot quaden menschen segghe. quaet mensche du sultste den doot steruen: ende en segstuus hem niet dat hem die quade wachte van sinen wege. soe sal hi die quade mensche in sijn quaetheit steruen: mer sijn bluet sal ic eysschen van dijnre hant.

9

Ende ist dattu den quaden segtste dat hi van sinen weghen bekeert worde. ende hi van sijnen weghe niet bekeert en wort. soe sal hi in sijn quaetheit steruen: mer du hebste dijne ziele verlost.

10

Hier om du des menschen sone: segt tot den huse van israhel. Aldus hebdi ghesproken ende geseit Onse quaetheden ende onse sonden sijn op ons: ende daer in scamen wi ons. Hoe sullen wi aldus moghen gheleuen

11

Segt tot hem. Leue ic seit die here god ic en wil des quaets menschen doot niet: mer dat die quade wederkere van sijnen weghe ende leue. Wert bekeert van uwen alten quaden weghen. Ende waer om suldi steruen huys van israhel?

12

Hier om segt du des menschen sone tot den kinderen van dijnen volcke.

[p. *562]

Eens gherechtichs menschen gherechticheit en salne niet verlossen in soe wat dage dat hi sondicht: ende des quaets menschen quaetheit en sal hem niet scaden in soe wat daghe dat hi bekeert wort van sijnre quaetheit. Ende die gherechtighe en sal niet moghen leuen in sine gherechticheit: in soe wat daghe dat hi sondicht.

13

Oec ist dat ic den gherechtighen segghe dat hi dat leuen leuen sal. ende betrouwet hi in sine gherechticheit ende duet ongherechticheit. soe sullen alle sine gerechticheden vergheten werden: ende in sine ongherechticheit die hi gedaen heeft daer in sal hi steruen.

14

Ende ist dat ic den quaden segghe. du sulste die doot steruen. ende duet hi penitencie van sijnre sonden. ende duet hi vonnisse ende gerechticheit:

15

ende geeft hi quade menschen den pant weder. ende keert hij weder dat hy gheroeft heeft: ende wandelt hi inden geboden des leuens: . ende en duet hi niet onrechts: hi sal leuen dat leuen ende hi en sal niet steruen.

16

Alle sijn sonden die hi ghesondicht heeft en salmen niet rekenen Hi dede vonnisse ende gherechticheit: hi sal dat leuen leuen.

17

Ende die kinder dijns volcs hebben gheseit. Des heren wech en is niet van effenen gewichte. Ende haer wech is ongherechte.

18

Want als die gherechtighe wech gaet van sijnre gherechticheit ende duet hi ongherechticheden: so sal hi daer in steruen

19

Ende als die quade wech gaet van sijn quaetheit ende hi duet vonnisse ende gherechticheit: hi salre in leuen

20

Ende ghi segt. Des heren wech en is niet recht. Ic sal elken van v luden vonnissen nae sinen weghe huys van israhel.

21

Ende het geuiel in dat twaelfste iaer in die twaelfste maent. inden vijfsten daghe van onser oueruaert: quam te mi die gheulouwen was van iherusalem ende seide. Die stat is ghedestrueert.

22

Ende des auonts eer hi quam die gheuloghen was. so was des heren hant te mi ghedaen: ende hi ondede mijnen mont soe langhe dat hi vroech te mi quam: ende doe mijn mont opghedaen was soe en zweech ic niet meer.

23

Ende des heren woert wert tot mi gedaen ende hi seide.

24

Des menschen sone: die wonen inden valachtighen steden op dat lant van israhel sprekende segghen si. Een abraham was: ende mit erueachticheden besat hi dat lant. Ende wij sijn vele: ons is dat lant ghegheuen in possessien.

25

Hier om sultstu segghen tot hem. Dit seit die here god. Die in den bluede eet ende uwe oghen opheft tot uwen onsuuerheden: ende bluet wt stort: en suldi dat lant in erueachticheden niet besitten?

26

Ghi stont in uwen zwaerden: ghi hebt onwaerdicheden gedaen. ende elc heeft besmet sijns naestes wijf: ende suldi dat lant in erueachticheden besitten?

27

Dit sultstu tot hem segghen. Aldus seit die here god. Leue ic: want die ghene die in vallachtighen steden wonen sullen inden zwaerde vallen: ende die inden acker is. hi sal den beesten gheleuert werden teten: ende die inden besloten steden ende inden speluncken sijn. sullen vander sterften steruen.

28

Ende ic sal dat lant gheuen in wildernissen

[p. *563]

ende in woestheit: ende sijn houaerdige starcheit sal te nyete gaen: ende die berghen van israhel sullen woest werden. om dat nyemant sijn en sal die daer ouer liden sal.

29

Ende si sullen weten dat ic die here bin. als ic haer lant ghegheuen sal hebben beroeft ende woest: om alle hare onwaerdicheden die si ghedaen hebben.

30

Ende du des menschen sone dijns volcs kinderen die spreken van di neuen die muren. ende inden doeren vanden husen ende die een seit totten anderen een man tot sijnen naesten seggende: coemt ende horen wij wat redenen sijn sal di wtcoemt vanden here:

31

ende si comen tot di als of dat volc inquame: ende mijn volc si sitten voer di: ende si horen dijn redenen ende en doense niet: want si keren die redenen in enen sanc haers monts. Ende hare herte volget hare giericheit.

32

Ende du biste hem als een liedekijn van musiken datmen mit sueten ende bequameliken luden singhet Ende si horen dijn woerden ende si en doense niet:

33

ende als comen sal dat voerseit is want siet het coemt: dan sullen si weten dat een propheet in midden hem gheweest heeft.