Bible in duytsche (Delftse bijbel 1477)

§ Capittel .xxxij

1

INden twalefsten iaer in die twalefste maent in enen dage vander maent geuiel dat des heren woert tot mi gedaen wort ende seide.

2

Des menschen sone. neem an gewene op pharaone den coninc van egipten: ende du sultste tot hem segghen. Du biste ghelike gheworden der heiden lyebaerde: ende den drake die in die zee is. Ende du waeydes mitten hoerne in dine riuieren: ende du vermoddeles die wateren mit dinen voeten: ende du vertrades haren riuieren.

3

Hier om seit dit die here god: Ic sal op di wtspreiden mijn nette in die menichte van veel volcken: ende ic sal di wttrecken in mine nette.

4

ende ic sal dij wech werpen op die aerde. Ic sal di afwerpen op dat aensichte vanden ackere: ende ic sal op di doen bliuen alle die voghelen des hemels: ende ic sal van di versaden die beesten van alden lande.

5

Ende ic sal dijn vleysch gheuen op die berghen: ende ic sal die berghen veruollen mit dinen attere.

6

Ende ic sal dat lant veruerschen op die berghen mit den stanc van dinen bluede ende die valeyen sullen veruolt werden van di.

7

Ende als du ghedoet wesen sultste. sal ic die hemel ouerdecken: ende ic sal sine sterren verdonckeren. Ic sal die sonne mit eenre wolken bedecken: ende die mane en sal haer licht niet gheuen.

8

Ic sal alle die lichten des hemels doen op di drouen: ende ic sal donckerheden geuen op dijn lant seit die here god: om alle die quaetheden die du ghedaen hebste.

9

Ende ic sal veelre volc verporren te gramscap als ic dine vertredenheit ghebracht sal hebben in die heidenen op die lande die du niet en weetste:

10

ende ic sal veel volcs op di doen verwonderen. Ende haer coninghen sullen mit groten anxt ontsien op di. Als mijn zwaert sal beghinnen te vlieghen op haer aensichten: ende elcke lude sullen haestelic verwonderen elc om sine ziele inden daghe dijns vals:

11

want dit seit die here god. Des conincs zwaert van babilonien sal dij comen.

12

in starcker luden zwaerden sal ic dine menichte ter neder doen vallen: alle dese heidenen en machmen niet verwinnen. Ende si sullen woesten die houaerde van egiten: ende haer menichte sal worden ghescheiden

13

Ende ic sal al haer quic verliesen dat op vele wateren was: ende des menschen voet en sal nemmermeer

[p. *560]

die wateren vermoddelen: noch die houe vanden paerden en sal die wateren niet vermoddelen.

14

Dan sal ic haer wateren alte claer gheuen: ende ic sal haer riuieren toe brenghen als olye seit die here god:

15

als ic dat lant van egiten woest sal hebben ghegheuen: want dat lant sal ghelaten worden van haerre volheit als ic sal hebben gesleghen alle die daer wonen: ende si sullen weten dat ic die here bin.

16

Hi is gheween: ende si sullen wenen der heidenen dochteren: op egipten ende op haer menichte sullen si wenen: seit die here god.

17

Ende het gheuiel in dat twalefste iaer. inden vijftienden dach vander maent: so wort des heren woert tot mi ghedaen ende hi seide.

18

Des menschen sone singe enen drouen sanc op die menichte van egipten. Ende trecse neder Haer ende der vromer heydenen dochteren ten achtersten lande: mitten ghenen die gaen neder inden putte.

19

Darwert dattu schoenre biste ganc nederwaert: ende slaep mitten onbesnedenen

20

In die middewaert vanden verslaghenen sullen si inden zwaerde vallen. Dat zwaert is gheheuen. Ende si trecken haer an: ende alle sijn volcke.

21

Die alre machtichste vanden starcken mannen sullen hem aenspreken van midden der hellen die mit sinen hulpers nederghegaen sijn ende sliepen mitten onbesnedenen. ende die verslaghen sijn mitten zwaerde.

22

Daer is assur ende alle sine menichte al om ende omme hem sijn haer grauen alle sijn sij verslaghen ende die gheuallen sijn mitten zwaerde:

23

welcker graue ghegheuen sijn inden achtersten van den putte. Ende sijn menichte is gedaen al omme ende omme sijn gracht: ende alle sijn si verslaghen ende gheuallen mitten zwaerde: die wijlen hadden gegheuen haer vrese inder leuender lant

24

Daer is elam: ende alle sine menichte al omme ende omme sijn gracht. Alle dese sijn verslaghen ende geuallen mitten zwaerde: die onbesneden achtergegaen sijn ten achtersten lande. die haren anxt leiden inder leuender hant: ende droghen haren lachter mitten ghenen die neder ghegaen waren inden putte

25

Si hebben sijn bedde gheleit in die middewaert vanden verslaghen in alle sinen volken: al omme hem is sijn gracht. Alle dese sijn onbesneden ende verslaghen mitten zwaerde. Want si gauen haren anxt inder leuender lant: ende droghen haren lachter mitten ghenen die nedergaen inden putte. Si sijn gheleit in die middewaert vanden versleghenen.

26

Daer is mosoch ende tubal ende alle sijne menichte: al omme ende omme hem sijn sine grauen: Alle dese sijn onbesneden ende verslaghen ende vallende mitten zwaerde: want si haren anxt gauen inder leuender lant:

27

ende si en sullen niet slapen mitten starcken ende die vallen ende mitten onbesnedenen die neder ghegaen sijn ter hellen mit haren wapenen. Ende si hebben haer zwaerden onder haer hoefden geleit: ende haer quaetheden waren in haren benen: want si worden der starcker anxte inder leuender lant.

28

Ende hier om sultstu oec in die middewaert vanden onbesnedenen worden vertreden: ende du sultste slapen mitten genen die verslaghen sijn mitten zwaerde

[p. *561]

29

Daer is ydumea ende haer coninghen alle haer leitsmannen: die ghegheuen sijn mit haren heere mitten verslaghenen mitten zwaerde: ende die mitten onbesnedenen sliepen: ende mettien die neder gegaen sijn inden putte.

30

Daer sijn alle die princen van noerden ende alle die iaghers die gheleit sijn mitten verslaghenen: hem ontsiende ende bescaemt in hare starcheit. die onbesneden sliepen mitten verslaghenen mitten swaerde: ende si droghen haer scande mit dien die inden putte nedergaen.

31

Pharao sachse ende hi wort vertroest mit al sijnre menichten die versleghen was mitten zwaerde pharao ende alle sijn heer seit die here god:

32

want hi gaf sijnen anxte inder leuender lant: ende hi sliep in die middewaert vanden onbesnedenen die verslaghen sijn mitten zwaerde: pharao ende alle sijne menichten seit die here god