Bible in duytsche (Delftse bijbel 1477)

§ Ca xxxi

1

HEt geuiel in dat elfte iaer. in die derde maent in enen

[p. *558]

dage vander maent: so wort des heren woert tot mi ghedaen ende hij seide.

2

Des menschen sone: segt pharaoni den coninc van egipten ende sijn volck. Wien bistu ghelike ghemaket in dijn grootheit?

3

Sich assur is als die cedar inden libano schoen in telgheren. ende dic van loueren. ende hoghe in hoecheden: ende onder dicke loueren is sijn ouerste top opuerheuen.

4

Die wateren voeden hem: ende die diepe gront verhieffen op. Ende die riuieren liepen al omme ende omme sijn wortelen: ende hij sent sijn beeken tot alle den houten vanden lantscappen

5

Daer om is sijn hoecheit verheuen bouen alle houten des lantscaps: ende sijn plant boemen wort gemenichfoudicht. ende sijn telgheren wiessen hoge om die vele wateren.

6

Ende doe hi sine scaduwe wtghesprayt hadde: so maecten alle die vogelen des hemels haer nesten in sijnen telgheren. ende alle die beesten vanden busschen ghebaerden haer ionghen onder sine loueren: ende onder sijne scaduwe woende ene scaduwe van veel heidenen.

7

Ende hi was alte schoen in sine grootheit: ende int verbreden van sinen plante boemen. Want sijne wortele was neuen veel wateren.

8

In gods paradise en waren ghene hoghere cederboem dan die was. Die vueren boemen en worden niet also hoge als hi was: ende van platanus en waren niet ghelike sinen loueren. Alle die houten van gods paradise en waren dien in sijnre schoenheit niet ghelike:

9

want ic maecten schone: van velen ende dicken loueren. Ende alle die houten der weeldicheit die in gods paradyse waren benijden hem.

10

Hier om seit dit die here god. Om dat hi verheuen is in hoecheden ende heeft sine hoecheit ghegheuen gruen ende dicke ende om dat sine herte verheuen is in sine hoecheit:

11

so heb ic hem gheleuert in des alren stercsten princen vanden heidenen hant. Doende sal hi hem doen na sine quaethet. Ic hebben wtgheworpen:

12

ende die vreemde ende die alre felste vanden nacien sullen afhouwen Ende si sullen werpen op die berghen ende in allen valeyen sullen sijn telgheren vallen. Ende sine plante bomen sullen te broken worden in alle den roetsen vanden lande: ende alle dat volc van den lande sal wechgaen wt sijnre scaduwen: ende si sullen laten.

13

In sinen val woenden alle die vogelen des hemels ende in sinen telgeren varen alle die beesten vanden lande.

14

Om dese dinc en sullen si niet ghegheuen worden in sine hoecheit alle die houten vanden wateren: noch si en sullen haer hoecheit niet setten onder die dicke ende ghelouerde houten. noch si en sullen niet staen in hare hoecheit alle houten die vanden wateren ghenet worden: want sij sijn alle gheleuert in die doot ten achtersten lande in midden den menschen tot dien die nedergaen inden putte

15

Dit seit die here god. Inden daghe doe hi neder viel ter hellen so bracht ic gheween in ic ouerdecten mitter diepheit: ende ic verboet sijn riuieren: ende ic bedwanc vele wateren. Die berch libanus is op hem te broken: ende alle die houten vanden ackere worden bestoten.

16

Vanden geruch-

[p. *559]

te sijns vals soe beruerde hij die heidenen: als icken gheleide ter hellen metten ghenen die nederghinghen inden putte. Ende in dat nederste lant worden vertroest alle die voerbarige ende die schone houten der weeldicheit inden berch libano: : alle die veruerschet worden mitten wateren.

17

Want si gaen oec mit hem neder ter hellen ten ghenen die verslaghen sijn mitten zwaerde: ende elcs arm sal sitten onder sine scaduwe in die middewaert vanden nacien.

18

o voerbarighe ende hoge onder die houten der weeldicheit wien bistu gelike geworden? Sich du biste mitten houten der weeldicheit gheleit ten achtersten lande. Du sultste slapen in die middewaert der onbesnedenre: mit hem die mitten zwaerde verslagen sijn. Aldus is pharao ende alle sine menichte: seit die here god