Bible in duytsche (Delftse bijbel 1477)

§ Ca .xxx

1

ENde des heren woert wort tot mi ghedaen ende hi seide

2

Des menschen sone: prophetere ende segt Dit seit die here god. Hulet wee wee den daghe:

3

want die dach is bi. ende des heren dach naect: die dach der wolcken. der heydenre tijt sal wesen.

4

Ende dat zwaert sal comen in egipten: ende vrese sal wesen in ethiopia als die gewonde gevallen sullen sijn in egipten ende hare menichte wech gedaen sal werden. ende haer fondamenten gedestrueet

5

Ethiopia ende libia ende die van lidien ende alle ander volc. ende chub ende die kinder des lants van beloeften sullen mit hem vallen inden zwaerde.

6

Dit seit die here god. Ende die egipten ondersetten sullen vallen: ende die houaerdie van haren rike sal ghedestrueert worden. Ende vanden toerne syenes sullen si in egipten mitten zwaerde vallen seit die here vanden scaren.

7

Ende si sullen ghescheiden worden in midden den woesten lande: ende hare poerten sullen wesen in midden den gewoesten steden: ende si sullen weten dat ic die here god bin

8

als ic vyer sal hebben ghegeuen in egipten. ende als alle haer hulpers vertreden sullen wesen.

9

In dien dage sullen boden wtgaen van mijnen aensichte in scepen om die betrouwenisse van ethiopien tonder te doen: ende anxt sal in hem wesen inden daghe van egipten: want sonder twiuel salt comen.

10

Dit seit god die here. Ende ic sal doen ophouden die menichte van egipten in nabuchodonosors des conincs van babi-

[p. *557]

lonien hant.

11

Hi ende sijn volc mit hem: die starcste vanden heidenen sullen daer ghebracht werden om dat lant te verderuen. Ende si sullen haer zwaerden wt den scheyden trecken op egipten: : ende sy sullen dat lant veruollen van versleghenen luden:

12

ende ic sal die gronde vanden riuieren droghe maken. ende ic sal dit lant leueren in alte quader menschen hant: ende ic sal dat lant ende sijn volheit scheiden in vremder luden hant Ic die here hebt ghesproken.

13

Dit seit die here god. Ende ic sal die beelden verderuen: ende ic sal doen ophouden van memphis die afgoden: ende voertmeer en sal gheen leitsman wesen vanden lande van egypten. Ende ic sal geuen anxt in dat lant van egipten:

14

ende ic sal dat lant van phatures destrueren. ende ic sal vyer gheuen in taphnis: ende ic sal mijn vonnisse doen in alexandrien.

15

Ende ic sal mine onwaertscap wtstorten op pelusium die starcheit van egipten: ende ic sal die menichte van alexandrien verslaen:

16

ende ic sal vyer gheuen in egipten. Pelusium sal wee hebben als een wijf die in arbeide leit: ende alexandrien sal ghesceiden wesen: ende in memphis daghelike vernoeye.

17

Die ionghelinghen van elyopoleos ende van bubasti sullen inden zwaerde vallen: ende die wiuen sullen gheuanghen geleit worden.

18

Ende in taphnis sal die dach verdonckeren: als ic sal hebben daer te broken die septre van egipten: ende als in haer ghebreken sal die houerdye haerre macht. Ende wolcke sal egipten ouerdecken: ende haer dochteren sullen in geuanghenisse gheleit worden.

19

Ende ic sal vonnissen doen in egipten: ende si sullen weten want ic die here bin.

20

Ende het geuiel inden elfsten iaer in die eerste maent inden seuenden daghe vander maent: soe wort des heren woert tot mij ghedaen ende hi seide.

21

Des menschen soen. ic heb gebroken pharaons des conincks van egipten arm: ende sich hi en is niet omwonden dat hi weder genesen moghe datmen mit doken bonde ende dat men omwonde mit linen doken en bonde: dat hi weder macht ghecrighen moghe dat hi een zwaert houden mochte

22

Hier om seit die here god. Siet ic spreke tot pharaone den coninck van egipten: ende ic sal sinen starcken arm die te broken is meer an sticken breken: ende ic sal dat zwaert wech werpen wt sijnre hant.

23

Ende ic sal egipten stroeyen inden heidenen: ende ic salse driuen inden landen.

24

Ende ic sal des sconincs van babilonien hant starck maken: ende ic sal mijn swaert geuen in sijn hant. Ende ic sal pharaons arm ontween breken: ende die verslaghen sullen versuchten mit versuchtinghe voer hem

25

Ende ic sal starc maken des conincs van babilonien arme: ende pharaons arme sullen neder vallen. Ende ghi sult weten dat ic die here bin als ic mijn zwaert sal gegheuen hebben in des conincs hant van babilonien: ende hijt wtsteect op dat lant van egipten.

26

Ende ic sal egipten stroeyen inden nacien: ende ic salse driuen inden landen: ende si sullen weten dat ic die here bin