Bible in duytsche (Delftse bijbel 1477)

§ Capi .xxix.

1

INden thienden iaer in die twaelfste maent in enen daghe vander maent so wort des heren woert tot mi gedaen ende hi seide.

2

Des menschen sone sette dijn aensichte ieghen pharaon den coninc van egipten: ende du sultste van hem propheteren: ende van al egipten

3

spreec ende seg. Dit seit die here god. Sich ic spreke te di pharao coninc van egipten grote drake die legghes in die middewaert van dijne riuieren ende du segts. die riuiere is mijn: ende ic hebbese mi seluen gemaect.

4

Ende ic sal enen breidel doen in dijnen wangen: ende ic sal aen enen clont vergaderen aen dijnen vinnen die visschen van dijnen riuieren. Ende ic sal di wt trecken van midden dijne riuieren. Ende alle die visschen sullen cleuen aen dinen vinnen.

5

Ende ic sal di wech werpen in die wildernisse: ende alle die visschen van dijnre riuieren. Du sultste vallen op dat aensicht vanden lande. Men sal dij niet opnemen noch vergaderen. Ic heb di ghegheuen te eten den beesten vander aerden ende den vogelen des hemels:

6

ende alle die in egipten wonen sullen weten dat ic die here bin Om dattu waertste een rieden stoc den huse van israhel

7

als si di begrepen mitter hant: ende du ontween braecs ende du al haren hals quetses: ende als si op di leenden dattu brakes ende ontbondes alle hare lendenen.

8

daer om seit dit die here god. Sich ic sal dat zwaert op di breughen: ende ic sal verslaen van di den mensche ende dat quic

9

Ende dat lant van egipten sal wesen in verwoestheit ende in wildernissen: ende si sullen weten dat ic die here bin. Om dattu geseit hebtste die riuiere is mijn ende ic makede hem.

10

Hier om sich. ic tot di ende tot dijnen riuieren. Ende ic sal dat lant van egipten gheuen in wildernissen ghescheiden mitten zwaerde: vanden toerne syenes totten termine van ethiophien.

11

Doer egipten en sal ne geens menschen voet ouerliden: noch ne gheens quics voet en salre doergaen ende men salre niet in wonen veertich iaer lanc.

12

Ende ic sal dat lant van egipten woest gheuen in die middewaert vanden woesten landen: ende hare steden in die middewaert vanden poerten die omme gheworpen sijn: ende si sullen woest sijn veertich iaer. Ende ic sal die van egipten stroeyen inden nacien: ende ic salse driuen inden landen:

13

want dit seit die here god. Nae dat eynde van veertich iaren sal ic egipten vergaderen vanden volcken daer si in gestroeyt waren: ende ic sal die gheuanghenisse wederbringhen van egipten.

14

ende ic sal-

[p. *556]

se setten in dat lant phatures in dat lant haerre geboerten inden lande van daen si genomen sijn: ende daer sullen si sijn in een oetmoedich rike:

15

ende het sal onder dander riken dat cleynste sijn. Ende egipten en sal voertmeer niet verheuen worden bouen den nacien: ende ic salse verminderen dat si niet heerscappie hebben en sullen bouen die heydenen

16

ende si en sullen voertmeer den huse van israhel niet wesen in betrouwen quaetheit lerende dat si vlyen ende hem volghen sullen: ende si sullen weten dat ic die here god bin.

17

Het gheuiel inden seuen ende twintichsten iare in die eerste maent inden eersten daghe vander maent: soe wort des heren woert tot mi ghedaen ende hi seide.

18

Des menschen sone: nabugodonosor die coninc van babilonien hi heuet sijn heer doen dienen mit groten dienst ieghen tyrum. Alle hoeft is ghecaluut: ende alle scouderen gdebloot. Ende hem en is gheen loen ghegheuen noch sijnen heere van tyro: ouer den dienst daer si mede ghedient hebben ieghen tyrus.

19

Hier om seit dit die here god. Siet ic sal nabuchodonosor den coninc van babilonien gheuen in dat lant van egipten: ende hij sal ontfaen haer menichte. ende hi sal haer roefgueden rouen. ende rouen haren roue:

20

ende sinen heere sal loen wesen: ende den wercke daer hi mede diende ieghen tyrum. Ende ic heb hem ghegheuen dat lant van egipten: om dat si mi gearbeit hebben seit die here god.

21

In dien dage sal den horen des huys van israhel wt spruten: ende ic sal di geuen enen openen mont in die middewaert van hem: ende si sullen weten dat ic die here bin.