Bible in duytsche (Delftse bijbel 1477)

§ Ca .xxviij.

1

ENde des heren woert wert tot mi gedaen ende hi seide.

2

Des menschen sone. segt den prince van tyro. Dit seit die here god. Om dat dijn herte verheuen is ende du gheseit hebtste. ic bin god ende ic hebbe gheseten in gods zetel in dat herte vander zee: als du een mensche sijtste ende niet god: ende du hebste dijn herte gegeuen als gods herte.

3

Sich du biste wiser dan daniel alle heymelijcheit en is niet verborgen in di.

4

In dijn wijsheit ende in dijn vroetscap hebstu di ghemaect starcheit: ende hebstu beiaghet gout ende siluer in dijnen tresoren

5

in die menichte dijnre wijsheit: ende in dijnre comanscap hebstu die starcheit ghemenichuoudicht ende dijn herte is verheuen in die starcheit.

6

Hier om seit dit die here god. Om dat dijn herte opuerheuen is als dat herte gods:

7

hier om sich so sal ic bren-

[p. *554]

ghen op di vreemde lude die vroemste vanden heydenen. Ende si sullen haer swaerden wt den scheiden trecken op die schoenheit dijnre wijsheit: ende si sullen dine schoenheit besmetten.

8

Ende si sullen di dootslaen ende neder trecken: ende du sultste steruen in verderfnisse der gheenre die verslagen sijn int herte der zee.

9

Sultstu dan segghen spreken ic bin god voer die gene die di dootslaen sullen als du een mensche sijts ende niet god?

10

Inder gheenre hant die di verslaen sullen sultstu steruen in vreemder lude hant mit der doot der onbesnedenre lude: want ic hebt ghesproken seit die here god.

11

Ende des heren woert wort tot mi ghedaen ende hi seide.

12

Des menschen sone: heffe op gheween op den coninc van tyro ende du sultste hem segghen. Dit seit die here god. Du waertste dat teyken der ghelikenissen vol wijsheden ende volmaect in schoenheden:

13

soe waertstu inden weeldicheden van gods paradise. Alle preciose steen was dijn cledinghe: sardius topasins ende iaspis. crisolitus ende onix ende berillus. die saphir. ende carbonckel ende smaragdus. Gout was dat werc dijnre schoenheit ende inden dage dattu gescepen waertste waren dijne gate bereet

14

Du waertste cherub wtghespreit ende bedeckende: ende ic sette di in gods heylighen berghe. In die middewaert vanden vyerachtighen stenen wandelstu

15

volmaect in dijnen weghen: vanden dage dattu gescepen waertste: tot datmen quaetheit in di vant.

16

In die menichte van dijnen comanscapen worden dijn binnenste veruolt van quaetheden. ende du sondiges: ende ic warp di neder van gods heyligen berge: ende ic verloes di o cherub bedeckende vander middewaert der vyerachtigher stenen.

17

Ende dijn herte wort verheuen in dijne schoenheit. Du verloertste dijne wijsheit in dijn schoenheit Ic werpe di neder in die aerde: ic gaf di voer der coninghen aensichten dat si di besien souden.

18

In die menichte van dijnen quaetheden ende in die quaetheit besmettestu dine geheilichtheit. Hier om sal ic vyer voertbrenghen van midden di dat di eten sal: ende ic sal di geuen in asschen op die aerde in alder gheenre aenscouwen die di sien sullen.

19

Alle die di sien sullen inden heydenen. sullen verwonderen op di Du biste niet geworden: ende du en sultste nemmermeer wesen

20

Ende des heren woert wert tot mi ghedaen ende hi seide.

21

Des menschen sone: sette dijn aensicht ieghen sydonen: ende du sultste van haer propheteren:

22

ende segghen. Dit seit die here god. Sich ic segghe tot di sydon: ende ic sal gheloeuet worden in midden di. Ende si sullen weten dat ic die here bin als ic in sydonen sal hebben ghedaen vonnisse: ende ic in hare gheheylicht werden sal.

23

Ende ic sal in sydonen senden die sterfte ende dat bluet in haren straten: ende hare verslegen sullen vallen in midden mitten zwaerde der gheenre diese dootslaen sullen: ende si sullen weten dat ic die here bin.

24

Ende dat huys van israhel en sal voertmeer niet wesen. in verbelghen van bitterheden ende een doorn seerheit inbrengende allesins al omme ende omme die ghene

[p. *555]

die hem ieghen sijn: ende si sullen weten dat ic die here god bin.

25

Dit seit die here god. Als ic dat huys van israhel sal hebben vergadert wt den volcke in welcke si ghestroeyt sijn. soe sal ic in hem gheheylicht worden voer die heydenen: ende si sullen wonen in haren landen dat ic iacob mijnen knecht gaf:

26

ende si sullenre in wonen in sekerheden. Ende si sullen husen stichten ende planten wijngaert: ende si sullen betrouwelijc wonen als ic vonnisse sal hebben ghedaen in allen den ghenen die hem contrarie sijn al omme ende omme: ende si sullen weten dat ic die here haer god bin.