Bible in duytsche (Delftse bijbel 1477)

§ Capittel .xxvi.

1

ENde het geuiel inden elfsten iaer inden eersten dage vander maent: so wort des heren woert tot mi gedaen ende hi seide.

2

Des menschen sone: om dat tyrus gheseit heeft van iherusalem verblide. die poorten vanden volken sijn ontween te broken: si is gekeert te mi waert. icsal veruolt worden. si is woest

3

hier om seit dit die here god. Sich tyre ic spreke op dij: ende ic sal op doen comen te di vele heydenen: also die zee vloeyende op riset.

4

Ende si sullen tyrus mueren scheiden: ende destrueren haer toernen. Ende ic sal haer ghemul scrappen van haer: ende ic salse geuen in enen slechten steen.

5

Het sal sijn in midden die zee een droghinghe van netten: want ic hebt gesproken seit die here god: ende si sal den heidenen wesen in een roue.

6

Ende haer dochteren die inden acker sijn sullen verslagen sijn mitten swaerde: ende si sullen weten dat ic die here bin:

7

want dit seit die here god. Siet ic sal nabuchodonosor den coninc van babilonien. den coninic der coninghen van noerden brenghen te tyrum: mit paerden ende mit waghenen ende mit gheredenen ende mit enen groten heer ende groten volcke.

8

Dijn dochteren die inden acker sijn sal hi verslaen mitten zwaerde: ende hi sal di omleggen mit engienen. Ende hi sal omtrent di draghen

[p. *551]

een hoghe dracht: ende hi sal den schilt ieghen di opheffen. ende die wijngaerden

9

ende die rammen sal hi ordineren in dine mueren: ende in sijnre wapeninge sal hi dijn mueren ende dijn toornen destrueren.

10

Mitten ghelope van sinen paerden suldi onerdecken hare gemul: vanden ludenen der gheredenen ende der radere ende der waghenen sullen dijn mueren beruert werden. Als hi binnen dinen poorten sal sijn gecomen als doer den inganc eenre destueerder poort.

11

hi sal alle dine straten vertreden mitten houen van sinen paerden: hi sal dijn volc mitten swaerde verslaen: ende dine edele afgoden sullen op die aerde vallen.

12

Si sullen dijn rijcheden woesten. sij sullen rouen dine comantscepe: ende destrueren dine mueren. ende v schone husen sullen si auerecht werpen: ende si sullen in midden den wateren werpen dine stene ende dijn hout ende dijn ghemul.

13

Ende ic sal doen rusten die menichte van dinen sanghen: ende men sal niet meer horen dat gheluut van dinen harpen.

14

Ende ic sal di gheuen in enen slechten steen: du sultste wesen een droghinge van netten. ende du en sultste voert meer niet ghesticht worden: want ic hebt ghesproken seit die here god.

15

Dit seit die here god tot tyrus. En sullen die eylanden niet beruert werden van den ghelude dijn vals: ende vanden ghesuchte dijnre verslaghenre als sij in midden di verslaghen sullen werden:

16

ende alle die princen vander zee sullen neder comen van daer si wonen. ende si sullen af doen haer behaghelijcheden: ende haer bonte cleder sullen si wech werpen ende si sullen ghecleet worden mit verwonderen Si sullen in die aerde sitten ende op dinen haestighen val sullen si verwonderen

17

ende si sullen aennemen op di gheween ende segghen di. Hoe bistu verderft die in die zee wones voerbarige poert: die starc wares in die zee mitten ghenen die in di woenden die dat alle menschen ontsagen

18

Nu sullen die scepe verwonderen inden daghe dijnre vrese: ende die eylanden in die zee sullen werden verstoert om dat nyemant wt di wt en coemt:

19

want dit seit die here god. Als ic di ghegheuen hebben sal bedroefde poert als steden daermen niet in en woent: ende als ic den afgronde op di sal hebben gebracht. ende di vele wateren sullen ouerdect hebben

20

ende di sal nederghetoghen hebben mitten ghenen die neder gaen inden putte ten eweliken volke: ende ic di gheleit sal hebben in dat achterste lant als die oude wildernissen mitten ghenen die men leit inden putte so datmen in di niet wonen en sal: voert als ic glorie sal hebben inder leuender lant.

21

so sal ic di te nyete maken. ende du en sultste niet wesen: ende alsmen di sueken sal. so en salmen nemmermeer di vinden seit die here god.