Bible in duytsche (Delftse bijbel 1477)

§ .Ca .xxv.

1

ENde des heren woert wort tot mi ghedaen ende hi seide

2

Des menschen sone: sette dijn aensichte te ammons kinder waert. ende du sulste van hem propheteren:

3

ende sultste ammons kinder segghan. Hoert des heren gods woert. Dit seit die here god. Om dattu gheseit hebste op mine sanctuarie verblide verblide want het is besmet. ende op dat lant van israhel want het is woest. ende op dat huys van iuda. want si sijn gheleet in gheuanghenisse:

4

hier om sal ic di leueren den kinderen van oesten in erfachticheit: ende si sullen haer scape koeyen in di setten. ende si sullen in di setten haer tenten. Sij sullen uwe vruchte eten: ende si sullen dijne melc drincken.

5

Ende ic sal rabba gheuen in die woninghe van kemels. ende ammons kinder in letyere van vye. ende ghi sult weten dat ic die here bin:

6

want dit seit die here god. Om dattu mitter hant te gadere geleghen hebste ende mitten voeten gheslaghen ende verblijt biste van alle dijnre begeerten op dat lant van israhel:

7

hier om sich so sal ic steken mijn hant voert op di. ende ic sal di leueren in roue der heidenen: ende ic sal di dootslaen vanden volke: ende ic sal di verliesen inden landen ende ver-

[p. *550]

deruen: ende du sulste weten dat ic die here bin.

8

Dit seit die here god. Om dat moab ende seyr geseit hebbeu. Siet also alle heidenen sijn alsoe is oec dat huys van iuda:

9

hier om siet soe sal ic opdoen moabs scoudere vanden steden. van sinen steden. ende van sinen terminen sal ic die voerbarighe steden vanden lande opdoen. bethiesimoth ende beelmeon ende cariathaim

10

die kinder van oesten mit ammons kinderen ende ic salse in erfachticheit gheuen: soe dat voert meer niet en sal sijn ghedencken inden h idenen van ammons kinderen.

11

Ende in moab sal ic vonnisse doen ende si sullen weten dat ic die here bin.

12

Dit seit die here god. Om dat ydumea wrake dede om haer sonen te wreken vanden kinderen van iuda. ende sondichde misdoende ende wrake van hem eyschende:

13

hier om seit dit die here god Ic sal mijn hant wtsteken op ydnmea: ende ic salre of wech doen den mensche ende die beesten: ende ic salse van zuden woest maken. Ende die in dedan sijn sullen mitten zwaerde vallen:

14

ende ic sal mine wrake gheuen op ydumea bi mijns volcs van israhels hant. Ende si sullen in edom doen na mine gramscap ende minen toern: ende si sullen mine wrake weten seit die here god.

15

Dit seit die here god. Om dat die palestinen wrake deden Ende si hem seluen ghewroken hebben mit alre herten. dootslaende ende voldoende die oude viantscapen:

16

hier om seit dit die here god. Siet ic sal mijn hant wtsteken op die palestinen. ende ic sal dootslaen die dootslaenres Ende ic sal verliesen die ouerbliue des lantscaps vander zee:

17

ende ic sal in hem grote wrake doen. berispende in minen toern: ende si sullen weten dat ic die here bin als ic mine wrake op hem sal hebben ghegheuen.