Bible in duytsche (Delftse bijbel 1477)

§ Capitttel xxiiij

1

ENde des heren woert wort tot mi ghedaen inden neghenden iaer: in die thiende maent. inden tienden dach vander maent ende hi seide.

2

Des menschen sone: bescriue di den naem van desen daghe daer in dat die coninck van babilonien vast ghemaect is iegen iherusalem huden:

3

ende du sultste segghen bi enen bispele totten veronwaerden huys dese parabole: ende du sultste tot hem seggen. Dit seit die here god. Sette enen pot: setten segghe ic: ende duet daer water in.

4

Neem een herde vette koe ende leg daer of die stucken inden pot: elc guet stuc. ende de dye. ende de scouderen scinckel.

5

Dat wtuercoerne stuc ende vol van beenren legghe oec onder inden pot den hoep van beenren. Tsieden vanden pot is verbrant: haer beenren sijn missoden in midden den pot.

6

Hier om seit dit die here god. Wee der stat van sonden den pot wies roesticheit in hem is: ende sine roesticheit en ghinc van hem niet. Bij stucken ende bi sinen stucken verdreef ic die roesticheit wt. Op die stat en viel ne geen lot

7

Want haer bluet is in midden haer: op enen claren harden steen storte sij dat bluet wt. Ende si en stortet niet op die aerde datment mochte ouerdecken mit ghemulle:

8

om dat icker op brengen soude mine onwaerdicheit ende dat ic die wrake wreken soude Ic gaf haer bluet op enen claren harden steen: om datment niet ouerdecken en soude.

9

Hier om seit die here god. Wee der stat vanden blueden: welcker hoep vyers ic groot maken sal.

10

Legt die beenre tenen hoop die ic mitten vyer verbernen sal. Dat vleysch sal verbernen: ende men sal alle die vergaderinghe die geleit is zieden: ende die beenre sullen smelten

11

Set oec den pot op die kolen al ydel dat hy gloeye ende dat sijn coper smelte: ende men smelte in midden den pot sine onsuuerheit: ende sine roesticheit werde verteert.

12

Mit vele arbeits zwetemen ende sine grote roesticheit en ginc wt hem niet. noch biden vyere.

13

Dine onsuuerheit is te veronwaerden: want ic wilde di suueren: ende du en biste niet ghesuuert van dinen smetten. Mer du en sultste oec niet eer gesuuert worden: voer dat ic mine onwaertscap in di sal doen rusten.

14

Ic die here hebt ghesproken. Ic bin ghecomen ende ic salt doen: ic en sal niet ouerliden noch sparen: noch versoent worden. Na dinen weghen ende na dine vindinghen sal ic di oerdelen seit die here.

15

Ende des heren woert wort tot mi ghedaen ende hi seide.

16

Des menschen sone: sich ic neem van di die begheerlicheit van dinen oghen in plagen ende du en sultste niet screyen noch wenen noch dijn tranen en sullen niet vloeyen.

17

Versuchte al swigende: du en sult-

[p. *549]

ste der doder gheween niet doen. Dine crone sal omtrent di ghebonden sijn. ende dine scuen sullen aen dine voeten sijn: ende du en sultste mit dinen clede dinen mont niet decken. noch du en sultste niet eten wenender menschen spise.

18

Hier om sprac ic des morghens tot den volke: ende des auonts starf mijn wijf.

19

Ende ic dede des smorghens also hi mi beuolen hadde. Ende dat volc seide tot mi. Waer om en seitstu ons niet wat dese dingen beteykenen die du doetste?

20

Ende ic seide tot hem. Des heren woert was tot mi ghedaen ende hi seide.

21

Spreect den huse van israhel. Dit seit die here god. Siet ic sal besmetten mine sanctuarie. die houaerde uwes riken. ende die begheerlicheit van uwen oghen: ende daer uwe ziele of ontsiet: ende uwe sonen ende uwe dochteren die gi gelaten hebt sullen vallen mitten zwaerde:

22

ende ghi sult doen alsoe ic ghedaen hebbe. Vwen monde en suldi mit uwen clede niet decken: noch wenender menschen spise eten

23

Ghi sult cronen op v hoefden hebben: ende scuen aen uwe voeten. Ende ghi en sult niet screyen noch wenen: mer ghi sult versmelten in uwe quaetheden: ende elc sal versuchten te sinen brueder waert.

24

Ende ezechiel sal v wesen in een voerteyken. Na alle dat hi ghedaen heeft suldi doen als dit comen sal: ende gi sult weten dat ic die here god bin.

25

Ende du des menschen sone in dien daghe dat ic van hem nemen sal haer starcheit. ende die blijscap haere waerdicheit. ende die begheerte haerre oghen: daer haer zielen op rusten. hare sonen ende hare dochteren:

26

in dien dage als totti comen sal die vliet om v te boetscappen:

27

in dien daghe segghe ic sal dijn mont opghedaen worden mit hem die gheuloghen sal sijn: ende du sultste spreken ende niet meer swigen ende du sulste hem wesen in een voerteyken: ende gi sult weten dat ic die here bin