Bible in duytsche (Delftse bijbel 1477)

§ Ca .xxij

1

ENde des heren woert wert tot mi ghedaen ende hi seide

2

Ende du des menschen sone en oerdelstu niet die poert der sonden: ende du sultste haer toghen alle haer onwaerdicheden?

3

Ende du sultste segghen. Dit seit die here god. Een stat bluet wtstorttende in midden hare. dat haer tijt come: ende die afgode maecte ieghen haer seluen om besmet te worden.

4

Du hebste misdaen in dijnen bluede dat van di wtgestort is: ende biste besmet in dijnen afgoden die du ghemaect heueste. Ende du hebtste doen ghenaken dijn daghen ende du hebste toebracht die tijt van dinen iaren. Hier om heb ic di in lachter ghegheuen inden heydenen: ende in bespotten allen landen

5

die bi di ende verre van di sijn. Die sullen zeghe vechten van di: besmette. edele. groot in verderfnissen.

6

Sich die princen van israhel elke waren in di in haren armen

[p. *544]

om bluet wt te stortten:

7

si hebben in di vader ende moeder lachter gedaen. Den toecomelinc hebben si ouerdaet gedaen in midden di: ende si hebben onder di die weese ende die weduwe besericht:

8

ghi hebt mijne sanctuarie veronwaert ende mine vierten vanden saterdage besmet

9

Mannen die quaet achterspraken. waren in di om bluet wt te storttene: ende op die berge aten si in di: si hebben misdaet ghedaen in midden di.

10

Die scamelheden haers vaders hebben sy ondect in di. Ende die onsuuerheit des wijfs die haer maentsuueringhe hadde. hebben si veroetmoedicht in di

11

Ende elc heuet onwaerdicheit ghedaen in sijns naestens wijf: ende die zweer heeft sijns soens wijf qualiken besmet: die brueder heeft sijnre suster sijns vaders dochter in di ver cracht.

12

Si hebben onder di ghiften ontfaen om bluet wt te stortten. Du hebtste ghewokert ende dat ouer die woker quam ontfaen. ende du hebtste ghierichlijc dijnen naesten ouerdaet ghedaen: ende du hebtste mijns vergheten seit die here god:

13

Sich ic hebbe mijne hande te gadere gheslaghen om dijne ghiericheit die du ghedaen hebtste: ende om dat bluet dat in midden di wtghestort is.

14

En salt dijn harte gedoghen: ofte sullens dijne handen te bouen comen inden daghe dien ic di maken sal? Ic die here hebt ghesproken ende ic salt doen.

15

Ende ic sal di stroeyen inden nacien: ende ic sal di waeyen in den landen. Ende ic sal van di doen ghebreken dijne onsuuerheit.

16

Ende ic sal di besitten inden heydenen aenscouwen: ende du sultste weten dat ic die here bin.

17

Ende des heren woert wort tot mi ghedaen ende hi seide.

18

Des menschen sone: dat huys van israhel is mi verkeert in siluer scuym. Alle dese sijn coper ende tinne ende iser ende loot in midden eenre fornaeysen sijn si geworden siluer scuym.

19

Hier om seit dit die here god. Om dat ghi alle verwandelt sijt in scuyme: hier om siet

20

soe sal ic v vergaderen in midden iherusalem als in vergaderen van siluer ende van coper ende van ysere ende van tinne ende van lode in midden der fornaeysen: ende ic salre vyer in ontsteken om te doen smelten Dus sal ic v vergaderen in mijnen toerne ende in mijn gramscap: ende ic sal dan rusten.

21

Ende ic sal v smelten ende vergaderen: ende ic sal v verbranden inden vyere mijns torens: ende in midden dier fornaeyse suldi ghesmolten worden

22

alsomen siluer smelt in midden eenre fornaeyse: also suldi in midden iherusalem wesen. Ende ghi sult weten dat ic die here bin: als ic mijne onwaerdicheit op v ghestort sal hebben.

23

Ende des heren woert wort tot mi ghedaen ende hi seide.

24

Des menschen sone. segt tot iherusalem. Du biste onsuuer lant ende niet bereghent inden daghe der gramscap.

25

Te gader zweringhe der propheten is in midden hare. Si verslinden die zielen als een briesschende leeu ende die sijn proeye vaet: guet ende loen ontfinghen si: si menichuoudichden haer weduwen in midden hare.

26

Haer priesteren veronwaerden mine wet: ende besmetten mijne sanctuarien. Ende si en hadden

[p. *545]

ne gheen onderscheit tusschen dat heylighe ende dat sonder heylicheit was ende si en verstonden niet tusschen dat besmet ende suuer was. ende si keerden haer oghen van mijnen vierten: ende ic wort in midden hem besmet.

27

Hare princen sijn in midden haer als wolue die haer proeye begripen: om bluet wt te stortten ende om die zielen te verliesen ende ghierichlijc gewin na te volgen

28

Want hare propheten plactense sonder moerter mit stroe ghetreden ydelheden ziende ende hem loghene propheterende: als si seiden dit seit die here god: alst die here niet en sprac.

29

Si veronrechten dat volc vanden lande mit ouerdade ende roefdent mit ouercracht. si quelden maten ende den armen: ende den toecomelinc bedructen si mit ouerdade sonder vonnisse.

30

Ende ic sochte van hem enen man die enen tuyn tusschen hem soude gheset werden: ende dat soude gheset wesen iegen mij ouer dat lant dat ict niet scheiden en soude: ende ic en vants niet.

31

Ende ic heb mijne onwaerdicheit op hem wt ghestort: ende inden vyer mijnre gramscap heb icse verteert. Ic heb haren wech in hare hoeft ghegouden seit die here god