Bible in duytsche (Delftse bijbel 1477)

§ Ca .xxi.

1

ENde des heren woert wert tot mi ghedaen ende hi seide.

2

Des menschen sone sette dijn aensicht te iherusalem waert. ende drupe ten sanctuarien waert: ende propheteer iegen dat lant van israhel:

3

ende du sultste den lande van israhel segghen. Dit seit die here god. Sich ic spreke te di: ende ic sal

[p. *542]

mijn zwaert trecken wt sijnre scheiden ende ic sal in di verslaen den gherechtighen ende den quaden.

4

Ende om dat ic in di verslaghen hebbe den gherechtigen ende den quaden: hier om sal mijn zwaert wt sijnre scheiden comen te allen vleysch van zuden totten noerden:

5

ende dat alle vleysch weten sal dat ic die here mijn zwaert wt sijnre scheiden ghetoghen hebbe so dattet daer in niet ghesteken worden en sal.

6

Ende du des menschen sone versuchte in die bedroeftheit vanden lendenen: ende du sultste voer hem versuchten in bitterheden.

7

Ende als si tot di seggen sullen waer om versuchtstu: so sultstu segghen. Om horen want het comet: ende alle herte sal versmelten: ende alle handen sullen sonder macht wesen: ende alle gheest sal ghecranct wesen: ende doer alle knyen sullen wateren vloeyen. Siet het coemt: ende het sal gheschien seit die here god.

8

Ende des heren woert wort tot mi ghedaen ende hi seide.

9

Des menschen sone: prophetere ende du sultste seggen. Dit seit die here god. Spreec. Dat zwaert is ghescarpt ende gevijlt.

10

Dattet die victimen houwen sal so ist ghescarpt: om dattet blicken sal so ist gevijlt. Die mijns soens septre ruers du heues alle hout afghehouwen. Ende ic hebt ghegheuen te scauene om datment mitter hant houden sal.

11

Dit zwaert is ghewet: ende dit is ghevijlt om dattet sijn sal in des gheens hant die dootslaen sal

12

des menschen sone roepe ende huyle: want dit zwaert is ghemaect in mijnen volke: dit is in allen den leidsman van israhel die gheuloghen waren sij sijn den zwaerde geleuert mit mijnen volke.

13

Hier om slae op dij die want het is gheproeft: ende dat alst die septre omgeworpen heuet ende en sal niet wesen seit die here god.

14

Du des menschen sone prophetere hier omme: ende slach die ene hant an die ander hant: ende dat zwaert worde ghedubbelleert ende dat zwaert vanden ghenen die verslaghen sijn werde ghedrieuoudicht. Dit is dat zwaert vander groter dootslach: datse versteruen duet

15

ende veruaren mitter herten: ende het menichfoudicht die valle. In alle haren poerten heb ic ghegheuen dat verstoren vanden starpen zwaerde dat gevijlt is om te blicken: ende om wonden ter slach.

16

Werde ghescarpt: ganc ter rechterziden ofte ter luchterziden: soe warwaert dat dijn aensicht begheert.

17

Ende ic sal oec slaen mitter hant aen die hant: ende voldoen mijne onwaerdicheit. Ic die here hebt ghesproken.

18

Ende des heren woert wort tot mi gedaen ende hi seide.

19

Ende du des menschen sone legdi twee wegen: dat des conincs van babibilonien zwaert come.. Wt enen lande sullen si beide comen. Ende hi sal mitter hant vaen die vercieringe: int hoeft des weghes vander stat sal hi sijn vercieringhe doen.

20

Den enen wech sultstu legghen: dattet zwaert come te rabbath van amons kinderen ende te iudam in iherusalem dat alte vast is.

21

Want die coninc van babilonien stont op ene wegescheide in dat hoeft van tween straten vraghende waersagherie: ende menghede die ghestutten

[p. *543]

te gader. Hi vraghede den afgoden: hi vraghede raet aen die inaderen.

22

Te sijnre rechter ziden was waersagherie gedaen op iherusalem. dat hi die rammen stellen soude. ende dat hi den mont op doe in die slacht dat hi sijn stemme op heffe in ghehule: ende dat hi rammen rechte ieghen die poerten. ende dracht toe draghe om engienen te settene.

23

Ende hi sal sijn in haren ogen als te vergeefs raet sokende aen die tale: ende als nauolghende die ledicheit van des saterdages vierten. Mer hi sal der quaetheit ghedencken omme die stat te winnen

24

Hier om seit die here god. Om dat gi ghedacht hebt uwe quaetheden ende hebt gheopenbaert uwe ouerdadicheden: ende uwe sonden openbaer geworden sijn in allen uwen ghepensen. Daer omme seg ic om dat ghi gedacht hebt so suldi mitter hant gheuaen worden

25

Ende du vermeensaemde ende onghenadich leidsman van israhel wies dach dat coemt ende vermict is inden tide der quaetheit

26

dit seit die here god. doch of den mitere Doch wech die crone En is dit die stat niet die den oetmoedigen opuerhief ende den hoghen vernederde?

27

Quatheit quaetheit quaetheit sal icse setten. Ende dit en sal niet gheschien voer dat hi comen sal wiens dat oerdeel is: ende ic salt hem gheuen.

28

Ende du des menschen sone prophetere ende seg. Dit seit die here god tot amons kinderen: ende te haren lachtere. Ende du sultste seggen Oort oort. ganc wt der scheiden om doot te slaen: vile di. dattu dootslaetste ende blics

29

als si di ydelheden saghen ende voerseiden di loghenen: dattu ghegeuen werden soutste op der quader gewonder halse welker dach comen sal die vermict is inden tide der quaetheit:

30

Keer weder te dijnre scheiden in die stat daer du ghescepen waertste. In dat lant dijnre gheboerten sal ic di oerdelen:

31

ende stortten wt op di mijn onwaerdicheit. Inden vyer mijnre gramscap sal ic in di blasen. Ende ic sal dij gheuen in sotter menschen handen ende die de verderfnisse maken sullen

32

Du sultste den vyere spise wesen. Ende dijn bluet sal in midden dat lant wesen du sultste ter vergetelheit geleit worden: want ic die here hebt ghesproken