Bible in duytsche (Delftse bijbel 1477)

§ Capittel .xx.

1

ENde het gheuiel inden seuenden iaer in die vijfste maent inden thienden

[p. *539]

daghe vander maent: so quamen mannen vanden ouders van israhel om den here te vraghene. Ende si saten voer mi

2

Ende des heren woert wort tot mi gedaen ende hi seide

3

Des menschen sone spreec tot den ouders van israhel: ende du sultste tot hem segghen. Dit seit die here god. En quaemstu niet om mi te vraghen? Leue ic: want ic en sal v niet antwoerden seit die here god.

4

Oftu haer vonnest: des menschen sone of ghi vonnist. Soe toecht hem haers vaders onwaerdicheden:

5

ende du sultste tot hem segghen. Dit seit die here god. In dien daghe dat ic israhel vercoes ende ic mijn hant ophief om dat gheslachte van iacobs huyse. ende ic hem openbaerde inden lande van egipten ende ic mijne hant op hief om hem luden ende seide. ic bin die here v god:

6

in dien dage hief ic mijn hant op hem luden dat icse leiden soude wt den lande van egipten int lant dat ic hem voersien hadde dat vloeyde van melke ende van honighe: dat voerbarich is onder allen landen.

7

Ende ic seide tot hem Elc werp of die verbelghinghen sijnre oghen: ende en wilt niet besmet worden inden afgoden van egipten. Ic bin die here v god

8

Ende si verporreden mi te gramscapen: ende en wilden mi niet horen. Elc en warp niet of die verbelghinge sijnre oghen: noch si en lieten die afgoden niet van egipten. Ende ic seide dat ic mijne onwaertscap op hem wtstortten soude: ende dat ic mine gramscap in hem voldoen soude in midden dat lant van egipten.

9

Ende ic dede om mijnen naeme: dat hi niet besmet werden en soude voer die heydenen in welker middewaert dat si waren: ende onder die welcke ic hem openbaerde dat icse wt den lande van egipten leiden soude.

10

Hier om verdreef icse wt den lande van egipten ende leidse wt inder wildernissen.

11

ende ic gaf hem mijne ghebode ende ic toghede hem mijne vonnisse: die die mensche doen sal ende leuen daer in.

12

Hier en bouen gaf ic hem mijne vierten vanden saterdaghe dattet een teyken wesen soude tusschen mi ende hem: ende dat si weten souden dat ic die here bin diese heylighe.

13

Ende dat huys van israhel verporrede mij ter gramscap inder wildernisse: si en wandelden in mijne gheboden niet. ende si vorworpen mine vonnisse. die een mensche dede so sal hi daer in leuen: ende si besmetten ende braken anxteliken mine vierten. Hier om seide ic dat ic mijne gramscapen op hem wtstortten soude inder wildernissen: ende dat icse verderuen soude.

14

Ende ic dede om mijnen name. dat hi niet besmet werden en soude voer die heydenen: daer icse wt verdreef in haren aenscouwen.

15

Hier om hief ic mijn hant op. op hem inder wildernissen. dat icse niet leiden en soude in dat lant dat ic hem gaf vloeyende van melke ende van honich dat voerbarich is bouen allen landen

16

om dat si mijne vonnisse afworpen ende in mijnen gheboden niet en wandelden: ende mijne vierte braken. Want haer herte ghinc na die afgoden.

17

Ende mijn oge spaerde op hem dat icse niet doden en soude: ende ic en verderuedse niet in der wildernissen.

18

Ende ic seide tot haren

[p. *540]

kinderen inder wildernissen In uwer vadere gebode en wilt niet gaen: noch en huet hare vonnisse niet: noch en wort niet besmet in haren afgoden.

19

Ic bin die here v god Wandelt in mijnen gheboden: ende huet mijne vonnisse ende duetse

20

ende mijne vyerten heylicht dat een teyken si tusschen mi ende v: ende ghi sult weten dat ic die here v god bin

21

Ende die kinder van israhel veronwaerden mi: ende en wandelen in mijnen geboden niet ende en hueden mijne vonnissen niet dat sijse doen souden. als die een mensche duet so sal hi daer in leuen ende si braken mijne vierten: Ende ic dreyghedese dat ic mijnen toren op hem wt werpen soude: ende dat ic mijne gamscap op hem voldoen soude inder wildernissen.

22

Ende ic keerder mijne hant af ende ic dedet om mijne name. om dat hi niet besmet werden en soude voer die heydenen: wt den welcken icse leede in haren oghen.

23

Ende ic hief weder mijn hant op inder wildernissen. dat icse stroeyen soude inden gheslachten ende dat icse verderuen soude inden landen:

24

om dat si mijne vonnissen niet ghedaen en hadden. ende dat si mijne ghebode ghelachtert hadden. ende dat si mijne vierten te broken hadden: ende dat hare oghen gheweest hadden na haerre vaders afgoden

25

Hier om soe gaf ic hem oec geboden die niet guet en waren. ende vonnisse daer si niet in leuen en sullen.

26

ende ic besmettese in haren ghiften als si offerden al dat die vroulijcheit opdoet om hare sonden: ende si sullen weten dat ic die here bin.

27

Om dese dinc des menschen sone spreec tot den huyse van israhel: ende du sultste tot hem segghen. Dit seit die here god Noch oeck ende hier in blasfemeerden mi uwe vaderen als si mij versmadet hadden veronwaerdende:

28

ende icse geleet hadde in dat lant. daer ic mijne hant ophief dat ict hem geuen soude. Si saghen elken hoghen berch ende elc dicke gruen hout ende daer so offerden si haer victimen: ende si gauen daer haer offerhande in verporren te gramscapen: ende si setteden daer den rooc haerre sueticheit. ende si schencten daer haer offerhanden.

29

Ende ic seide tot hem. Wat hoecheden ist: daer ghi toe ingaet. Ende sijn name is geheten hoecheit al tot desen daghe.

30

Hier om segt tot den huyse van israhel. Dit seit die here god. Seker ghi wort besmet in uwer vaderen wech: ende ghi vernoeyeert v na hare verbelghinghen.

31

Ende in die offerhande van uwen ghiften als ghi uwe kinder doer dat vyer trect wordi besmet tot huden in allen uwen afgoden: ende huys van israhel ic sal v antwoerden? Leue ic seit die here god: want ic en sal v niet antwoerden:

32

noch dat ghepens van uwen ghedachten en sal v niet geschien ghi die segt. Wi sullen wesen als die heydenen ende als die maechscappen vanden lande: dat wi oeffenen sullen hout ende stenen.

33

Leue ic seit die here god: want in starckere hant ende in wtghestekene arme ende in wtghestortten toerne sal ic bouen v regneren.

34

Ende ic sal v vten volken leeden: ende ic sal v vergaderen vanden lande daer ghi in ghestroeyt sijt. In machtigher hant ende

[p. *541]

in wtghestekenen arme ende in wtghestortten toerne sal ic bouen v regneren:

35

ende ic sal v brenghen inder volken wildernisse: ende daer sal ic mit v gheuonnist worden van aensichte te aensichte

36

Also ic mit vonnisse perlemente iegen uwen vaders inder wildernissen des lants van egipten: also sal ic v oerdelen seit die here.

37

Ende ic sal v tonder doen onder mine coninc roede: ende ic sal v brenghen inden banden der beloften.

38

Ende ic sal van v wtkiesen die ouerdadige ende quade: ende ic salse wtleiden wt den lande haers wonens. ende si en sullen niet comen int lant van israhel: ende ghi sult weten dat ic die here bin

39

Ende ghi huys van israhel: dit seit die here god. Elke van v wandelt na uwen afgoden. ende dient hem. Ende ist oec dat ghi mi hier in niet en hoert: ende besmet ghi voertmeer mijnen heylighen name in uwen ghiften ende in uwen afgoden:

40

al dat huys van israhel seit die here sal mij dienen in sijnen heylighen berghe in den hoghen berch van israhel. alle seg ic. int lant daer si mi in ghenoghen sullen. Ende daer sal ic soken uwe primicien: ende dat beghinsel van uwen thienden in allen uwen gheheylichtheden

41

Ic sal v ontfaen in roke der sueticheit als ic v vten volken gheleit hebbe ende v vergadert heb vanden landen daer ghi in ghestroeyt sijt: ende ic sal in v luden gehelicht worden inder nacien oghen.

42

Ende ghi sult weten dat ic die here bin als ic v heb geleit int lant van israhel: in dat lant daer ic omme mijn hant op hief dat ict uwen vaders gheuen sou

43

Ende daer suldi ghedencken uwer wege ende alle uwer quaetheden daer ghi in besmet sijt: ende ghi sult v seluen wanhaghen in uwen aenscouwen in allen uwen quaetheden die ghi gedaen hebt:

44

ende ghi sult weten dat ic die here bin als ic v welghedaen sal hebben om minen name: ende niet na uwe quade weghe noch na uwe alte quade misdade huys van israhel: seit die here god.

45

Ende des heren woert wort tot mi ghedaen ende hi seide.

46

Des menschen sone: sette dijn aensichte ieghen den wech van zuden ende propheteer te affriken waert Ende prophetere ten bussche waert vanden zuden acker:

47

ende du sultste den bussche van zuden segghen. Hoer des heren woert. Dit seit die here god. Sich ic sal in di een vyer ontsteken: ende ic sal in di verbarnen alle gruen hout ende alle droghe hout. Die vlamme van dien brande en sal niet gheblusschet werden. Ende al dat aensicht sal daer in verbrant worden vanden zuden tot den noerden:

48

ende alle vleysch sal sien dat ic die here dien bussche ontsteken hebbe: ende hi en sal niet geblusschet werden.

49

Ende ic seide. Ach ach ach here god Si segghen van mi. En spreect dese man niet bi parabolen?