Bible in duytsche (Delftse bijbel 1477)

§ Capit .xix.

1

ENde du des menschen sone neem aen gheween op die princen van israhel ende du sultste segghen.

2

Waer omme dijn moeder die leeuwinne onder die lewe ruste? Inden middewaert vanden leeuwen voede sy haer welpen.

3

Ende si leide enen van haren leeukens wt. ende hi wort een leeu: ende leerde proeyen te vaen ende den mensche te etene.

4

Ende die luden hoerdent van hem: ende sij en vinghens niet sonder haer wonden: ende si brachten mit kethenen int lant van egipten.

5

Als die leeuwinne sach dat si ghecranct was ende dat haer ontbeiden verloren was: so nam si een van haren leeukens: ende settenen te enen leuwe

6

Ende hi ghinc onder den leeuwen ende wort een leeu: ende hi leerde proeyen te vane ende die menschen te eten:

7

hi leerde weduwen te maken ende haer steden te bringhen in wildernisse: ende dat lant wort bedroeft ende sijn volheit vander stemmen sijns briesschens:

8

ende die luden vergaderden van allesins vanden prouincie ieghen hem: ende spreiden op hem haer nette. In haren wonden wort hi gheuaen

9

ende si deden in een couwe. In kethenen brochten sijne tot den coninc van babilonien ende si daden in enen kerker: dat men niet meer op die berghe van israhel sijne stemme horen en soude.

10

Dijn moeder was als een wijngaert in dinen bluede: opt water geplant Sijn vrucht ende sijn louer wiessen wt vele wateren:

11

ende het zijn geworden hem geheel rueden in septren der gheenre die heerscappie hebben: ende sijn hoecheit is op ghewassen onder die loueren. Ende hi sach sijn hoecheit in die menichte van sijnen ranc scoten:

12

ende hi wort wtgheroot in gramscepen ende neder gheworpen op die aerde. ende een barnende wint verdroghede sine vrucht: die roeden sijnre starcheit verdroechden ende woerden droghe. Dat vyer at den wijngaert.

13

Ende hi is nv ouer gheplant inder wildernissen int lant dat sonder wech is ende dorstich:

14

ende een vyer quam vter roeden van sijnen telgheren dat sijn vrucht at: ende inden wijngaert en was ne gene starcke roede ende ene septre der gheenre die regneren: hij is gheween ende hy sal gheween wesen.