Bible in duytsche (Delftse bijbel 1477)

§ .Capitel .xviij.

1

ENde des heren woert wort tot mi gedaen ende hi seide.

2

Wat ist dat ghi onder v die parabole int lant van israhel keert in dese prouerbie ende segt. die vaders aten die sure wijndruuen. ende hare kinder tanden worden sleu?

3

Leue ic seit die here god: oft v mere dese parabole in israhel sal wesen in betekenissen.

4

Siet het sijn alle mine zielen. Aso des vaders ziele: alsoe is oeck sijns kints ziele mijne. Die ziele die sondicht: si sal steruen.

5

Ende ist dat een man gherechtich is ende doet hi vonnisse ende gherechticheit:

6

ende en eet hi niet op die berghe ende en heft hij sijne oghen niet op ten afgoden waert dat huys van israhel: ende en vercracht hi sijns naestes wijf niet ende en gaet hi niet totten wiue die haer maentsuueringe gedoecht

7

ende en bedroeft hi ne ghenen mensche ende gheeft hi sijnen sculdenaren sinen pant weder. ende en roeft hi niet bi crachte. ende gheeft hi sijn broet den genen die hongher heeft. ende ouerdect hi den naecten mit enen clede:

8

ende en leent hi niet om wokere. ende en neemt hi niet meer weder dan hi leende: ende keert hi sijn hant van quaetheden. ende doet hi ghewarich vonnisse tusschen den man ende den man.

9

wandelt hi in mine gheboden ende heuet hij mijne vonnisse bewaert dat hi die waerheit doet: dese is gherecht. Hi sal dat leuen leuen: seit die here god.

10

Ist dat hi wint enen sone enen moerdenaer die bluet wtstort. ende doet hi een van desen dinghen.

11

mer dat hi alle dese dinghen niet en duet: mer dat hi op die berghe eet. ende dat hi sijns naestes wijf besmet

12

ende besericht den maten ende den armen mensche. ende dat hi roue roeft. ende

[p. *537]

den pant niet weder en gheeft. ende dat hi sijn oghen opheft ten afgoden: ende onwaerdicheit duet.

13

ende gheeft hi tot wokeren ende ontfaet hi meer weder: sal hi leuen? Hi en sal niet leuen. Als hi alle dese onwaerdighe dinghen gedaen heeft: hi sal die doot steruen. Sijn bluet sal in hem wesen.

14

Ist dat hi enen sone gewonnen heuet die aensiende alle sijns vaders sonden die hi dede hem ontsiet. ende en duet hy niet werken die des ghelike sijn:

15

ende en eet niet op die berghe. ende sijn oghen niet op en heft ten afgoden huys van israhel: ende sijns naests wijf niet en besmet.

16

ende enen man niet en besericht. ende den pant niet en hout. ende en gheen roef en roeft: ende hi den ghenen die hongher heeft sijn broot gheeft. ende hi den naecten ouerdect mit enen clede:

17

ende hi sijn hant oftrect van eens arms menschen onrecht: ende hi die woker ende meer dan hi leende niet en ontfaet ende mijne vonnisse duet. ende hi in mijnen gheboden wandelt: dese en sal niet steruen in sijns vaders quaetheit. mer hi sal dat leuen leuen.

18

Sijn vader om dat hi ouerdaet dede ende ouercracht sijnen brueder: ende quaet gedaen heeft in die middewaert van sijnen volke: siet hi is doot in sine quaetheit.

19

Ende gi segt: Waer om en sal die sone niet draghen sijns vaders quaetheit? Dat is om dat die sone vonnisse ende gherechticheit heuet ghedaen hi huede alle mijne ghebode ende deedse: hi sal dat leuen leuen.

20

Die ziele die sondighen sal: si sal steruen. Ende die sone en sal des vaders quaetheit niet draghen: ende die vader en sal sijns soens quaetheit niet draghen. Eens gherechtichs gerechticheit sal op hem wesen: ende die quaetheeden eens quaets sal op hem wesen.

21

Ende ist dat die quade mensche penitencie duet van allen sijnen sonden die hi ghedaen heeft: ende houdet alle mijne gheboden: ende dede vonnisse ende gerechticheit: hi sal dat leuen leuen ende niet steruen.

22

Ende alle sine quaetheden die hi ghedaen heeft en sal ic niet ghedencken. Hi sal leuen in sijne gerechticheit die hi gedaen heeft

23

En ist mijns willens niet des quaets menschen doot seit die here god: ende niet dat hi bekeert worde van sijnen weghen ende leue?

24

Ende ist dat hem die gerechte mensche afkeert van sijnre gherechticheit ende doet hi quaetheit na alle die onwaerdicheit die een quaet mensche pleghet te doen sal hi leuen? Alle sijne gherechticheden die hi ghedaen heeft en salmen niet ghedencken. Inder ouerdaet daer hi in ouerdaet gedaen heeft: ende in sijne sonden die hi gesondicht heeft: in dien sal hi steruen.

25

Ende ghi seide. Des heren wech en is niet ghelike. Hoert ghi huys van israhel. En is mijne wech niet ghelijc: ende en sijn uwe weghe niet meer quaet?

26

Want als hem een gherechtich mensche afkeert van sijnre gherechticheit ende hi quaetheit duet: soe sal hi in die quaetheit steruen. In die ongerechticheit die hi ghedaen heeft sal hi steruen.

27

Ende als hem die quade mensche afkeert van sijnre quaetheit die hi gedaen heeft ende hi duet vonnisse ende gerechticheit.

[p. *538]

hi sal sine ziele leuende maken.

28

Want merkende ende hem afkerende van alle sine quaetheden die hi ghedaen heeft hi sal dat leuen leuen ende hi en sal niet steruen.

29

Ende die kinder van israhel segghen. Des heren wech en is niet ghelike. En sijn mine weghe niet ghelike dat huys van israhel. ende en sijn niet meer uwe weghen quaet?

30

Hier omme huys van israhel sal ic elken vonnissen na sijnen weghe: seit die here god. Wert bekeert ende duet penitencie van allen uwen quaetheden: ende die quaetheit en sal v niet wesen in valle.

31

Werpt wech van v alle uwe ouerdade daer gi in ouerdaet ghedaen hebt: ende maect v een nyewe hert ende enen nyewen geest Ende waer om suldi steruen huys van israhel?

32

Want ic en wil des sondaren doot niet seit die here god. Keert weder ende leeft