Bible in duytsche (Delftse bijbel 1477)

§ Capit. xvij.

1

ENde des heren woert wort tot mi ghedaen ende hi seide.

2

Des menschen sone: legt voer den huyse van lsrahel dese doncker vrage. ende telle dese parabole: ende du sultste seggen.

3

Dit seit die here god. Een groet aerne. mit groten vloghelen. lanc van leden. vol van plumen ende van menigherhande verwen. quam tot den libanum: ende hi nam van dat march vanden cederboem.

4

Ende

[p. *535]

die hoecheit van haren telgheren trac hi vte: ende droech ouer int lant van chanaan: inder coepluder poert settede hi die.

5

Ende hi nam vanden sade vanden lande ende leide dat in die aerde ouer saet. dattet sijne wortele vastmaken soude op vele wateren. In dat bouenste van den lande leide hi dat saet.

6

Ende alst ghegroeyt was so wiest in enen widen wijngaert: neder van groetheden. ende sijne telghere sagen te hem waert: ende sijne wortelen waren onder hem. Dus wortet een wijngaert: ende maecte vrucht in rancken: ende hi schoet wt sine nyewe scoten

7

Ende hi wert een ander groet aren ghemaect: mit groten vloghelen. ende mit vele plumen. Ende sich dese wijngaert schoet sijne wortelen ende te dien aren waert: ende sijn rancken schoet hi te hem waert dat hine veruersschen soude vanden houen sijns saets:

8

desen wijngaert was gheplant in gueden lande op vele wateren. dat hi louer maken soude ende vrucht dragen. ende dat hi sijn soude in enen groten wijngaert.

9

Segt. Dit seit die here god. En sal dese wijngaert niet voerspoet hebben? En sal hi sijne wortele niet wtroden: ende sijne vruchte bedwinghen? Ende sal verdroghen alle die scoten sijns groeyns ende sal verdroghen: ende niet in groten arme noch in vele volcs: dat hi desen wijngaert wtroden soude mit der wortelen.

10

Siet desen wijngaert is geplant En sal dese wijngaert niet voerspoet hebben? Als een barnende wint desen wijngaert tasten sal: en sal hi niet ghedroecht worden: ende verdroghen inden lande sijns groeyens?

11

Ende des heren woert wort tot mi gedaen ende hi seide.

12

Segt tot den onwaerdende huse. En weet ghi niet wat dese dinghen beduyden? Segt. Siet die coninc van babilonien is gecomen te iherusalem: ende hi sal mit hem nemen haren coninc ende sijnen princen: ende hi salse voeren tot hem seluen in babilonien.

13

Ende hi sal nemen vanden sade van dien rike: ende hi sal mit hem belofte maken: ende hi sal van hem nemen enen eedt. Mer oec sal hi wech voeren die starcke mannen van den lande

14

om dattet sijn sal een neder rijck: ende dattet niet verheuen werden en sal: mer dattet bewaren sal sine belofte ende die houden.

15

Ende die coninc dien hi maecte ginc den coninc van babilonien of: ende sende boden in egiepten: dat hem egipten gheuen soude paerden ende vele volcs. En sal hi niet voerspoet hebben ofte sal hi salicheit beiaghen. die dit ghedaen heeft? Ende die de belofte te broken heeft: en sal hi niet ontulien?

16

Leue ic seit die here god: want in des conincs stat diene coninc maecte wies eedt hi te broken heeft ende die belofte te broken heuet ende die hi mit hem hadde: hi sal in midden babilonien steruen.

17

Ende niet in groten heere noch in groten volke en sal pharao ieghen hem en gheen strijt doen. in maken van berghen mit drachte. noh in stichten der valeyen: om vele zielen te verslaen

18

Want hi veronwaerde den eedt om dat hi die belofte breken soude: ende siet hi heeft sijne hant gheheuen: ende als hi alle dese dinghen ghedaen heeft so

[p. *536]

en sal hi niet ontvlien.

19

Hier om seyt dit die here god. Leue ic: want den eedt dien hi veronwaert heeft ende die belofte dien hij te broken heeft sal ic op sijn hoeft legghen.

20

Ende ic sal op hem mijn nette wtspreiden ende hi sal in mijn nette gheuaen worden: ende ic sal hem bringhen in babilonien ende ic sallen daer oerdelen in dier ouerdaet daer hi mij mede veronwaert heeft:

21

ende alle sijne vlochters mit alle sijnre scaren sullen mitten zwaerde vallen: mer die ouerbliuen: sullen werden ghestroeyt in allen wint: ende ghi sult weten dat ict die here gesproken hebbe.

22

Dit seit die here god. Ende sal nemen dat march van enen hoghen cederboem: ende ic sal setten vanden top van sijnen telgheren. Enen ceder telch sal ic verbinden ende ic salt planten op enen hogen verheuen berch

23

Ic sal dien planten in enen hogen berch van israhel ende hi sal wtspruten in enen groeyen. ende maken vrucht: ende hi sal wesen in enen groten cederboem.. Ende onder hem sullen wonen alle voghelen. alrehande gheuoghelte sal neste maken onder die scaduwe van sijnen loueren.

24

Ende alle die houten vanden lantscappe sullen weten dat ic die here hebbe vernedert den hoghen boem. ende dat ic verheuen hebbe den nederen boem ende dat ic verdroecht hebbe dat groene hout: ende heb doen groeyen dat droege hout. Ic die here heb ghesproken ende hebt ghedaen.