Bible in duytsche (Delftse bijbel 1477)

§ Capit .xiiij.

1

ENde te mi quamen mannen die ouders van israhel: ende si saten voer mi.

2

Ende des heren woert wort tot mi ghedaen ende hi seide.

3

Des menschen sone: dese mannen hebben haer onsuuerhede gheleit in haren herten: ende die scande haerre quaetheit hebben si gheset ieghen haer aensichte. Als ic ghevraghet bin en sal ic hem niet antwoerden?

4

Om dit so spreec hem: ende du sultste dit tot hem segghen. Dit seit die here god. Mensche mensche vanden huyse van israhel die sine onsuuerheden leit in sijn herte: ende die scande sijnre quaetheit set ieghen sijn aensicht. ende coemt hi tot enen propheet om te vraghen bi hem mi: ic die here sal hem antwoerden in die menichte van sinen onsuuerheden:

5

om dat dat huys van israhel beuaen sal worden in sijn herte werwaert dat si van mi wech sijn ghegaen in allen haren afgoden.

6

Hier om segt tot den huse van israhel.. Dit seit die here god. Wert bekeert ende gaet wech van uwen afgoden: ende van alle uwe besmittingen keert v aensichten.

7

Want een man vanden huse van israhel ende vanden genen die hem ter wet bekeert hebben soe wie aencomelinc is in israhel. ist dat hi hem van mi vervreemt ende leit hi sijn afgode in sijn herte. ende set hi die scande sijnre quaetheit iegen sijn aensichte ende coemt hi tot enen propheet dat hi bi dien mi vraghen sal: ic die here sal hem bi mi seluen antwoerden.

8

ende ic sal mijn aensichte setten ieghen dien mensche: ende ic sal hem setten in een exempel ende in een bespotten ende ic salne verderuen van midden mijnen volke: ende ghi sult weten dat ic die here bin.

9

Ende als een propheet doelt. ende seit hi een woert. Ic die here hebbe dien propheet bedroghen. Ende ic sal mijn hant op hem voertsteken: ende ic sallen afdoen vander middewaert van mijnen volke van israhel:

10

ende sij sullen haer quaetheit draghen. Nae des gheens quaetheit die vraghet. al-

[p. *530]

soe sal des propheten quaetheit wesen:

11

dattet huys van israhel niet meer en dole van mi noch dattet niet besmet en worde in allen sijnen ouerdadicheden. mer dattet mi si in volke ende dat ic hem si in god seit die here vanden scaren.

12

Ende des heren woert wort tot mi ghedaen ende hi seide.

13

Des menschen sone: als mi dat lant ghesondicht heeft. dat die ouerdaet doende ouerdaet doet: soe sal icker mine hant op wt steken ende ic sal breken die ruede van sijnen brode. ende ic salre den hongher in senden: ende ic sal van dien lande dootslaen den mensche ende die beeste.

14

Ende sijn dese drie mannen in midden dat lant noe daniel ende iob: si sullen in haerre gherechticheit haer ziele verlossen seit die here vanden scaren.

15

Ist dat ic in dat lant bringhe die quaetste beesten om dat ic dat lant woesten sal ende ist sonder wech om dat niemant en is die daer doer lijt om der beesten wille:

16

ende sijn dese drie mannen int lant. leue ic seit die here god: want si en sullen sonen noch dochteren verlossen. mer si alleen sullen verlost worden: mer dat lant sal woest werden

17

Ofte brenghe ic een zwaert int lant. ende segge ic den zwaerde: lide ouer dat lant: ende verslae ic vanden lande die menschen ende die beesten:

18

ende sijn dese drie mannen in midden in dat lant leue ic seit die here god. si en sullen haren sonen ende haren dochteren niet verlossen: mer si sullen alleen verlost worden.

19

Ende ist dat ic die sterfte sende op dat lant ende stortte ic mijn ontwaerscap daer op inden blueden so dat ic van dien lande wech doe den mensche ende die beesten:

20

ende noe daniel ende iob in midden dat lant sijn: leue ic seit die here god. want sij en sullen sonen noch dochteren verlossen: mer si sullen in die gherechticheit haer zielen verlossen:

21

want dit seit die here god. Ist dat ic mijne vier alte quade vonnissen. dat zwaert ende die hongher ende alte quade beesten ende sterften sende in iherusalem ende verslae ic daer den mensche ende die beeste:

22

nochtan salre in ghelaten worden dat behouden die sonen ende die dochteren wtbrenghen sullen. Siet si sullen tot v wtcomen ende ghi sult haren wech sien ende hare vindinghen: ende ghi sult vertroest werden op dat quaet dat ic ingheleedt hebbe in iherusalem in allen die ic daer in ghebracht hebbe:

23

ende si sullen v vertroesten als ghi haren wech sien sult ende haerre vindinghen: ende gi sult bekennen dat ic niet te vergheefs ghedaen en hebbe: al dat ic in haer ghedaen hebbe: seit die here god.