Bible in duytsche (Delftse bijbel 1477)

§ Ca .xiij

1

ENde des heren woert wert tot

[p. *528]

mij ghedaen: ende hij seide..

2

Des menschen sone prophetere ten propheten waert van israhel die propheteren: ende du sultste segghen die propheterende sijn wt haerre herten. Hoert des heren woert.

3

Dit seit die here god Wee den onwisen propheten: die haren gheest volghen ende si en sien niet

4

israhel. Dijn propheten dwalen als vossen inder wildernissen.

5

Gi en ghincter niet iegen op: noch en setter muyer ieghen ouer dat huys van israhel dat ghi inden stride staen soudt in des heren daghe.

6

Si sien ydelheden ende voersegghen loghen: segghende die here seit als die here niet gesendet en heuet: ende si gheduerden haer woert vast te maken.

7

En saghedi niet ydel visyoen: ende en spraecti niet loghenachtighe voersegghinghe?

8

Ende ghi segt die here seit: als ict niet en sprac. Hier om seit die here god. Om dat ghi ydelheden ghesproken hebt ende loghen ghesien: hier om spreke ic te v waert seit die here god:

9

ende mijn hant sal wesen op die propheten die ydelheit sien ende loghene voertsegghen. Si en sullen niet wesen in mijns volcs raet. ende si en sullen niet ghescreuen worden int huys van israhels scrifture: noch si en sullen niet comen int lant van israhel: ende ghi sult weten dat ic die here god bin.

10

Om dat si mijn volc bedroghen hebben segghende. het is paeys paeys als ne gheen paeys en is: ende hi maecte die want: ende sij plactense mit moerter sonder stroe

11

Segt tot hem die placken mit moerter sonder stroe ghetreden: dat si vallen sal. Want het sal wesen een vloeyende reghen: ende ic sal gheuen grote stene die van bouen daer op vallen sullen ende enen wint van vlaghen diese scheiden sal.

12

Want siet dus is die want geuallen. En salmen v niet seggen: waer is uwe plackerie die gi placket?

13

Hierom seit dit die here god. Ende ic sal doen wtbreken enen wint van tempeesten in mijnre onwaerdicheit: ende in mijnen toerne sal wesen enen vloeyenden reghen: ende grote stene in mijne gramscap om te nyete te makene.

14

Ende ic sal die want destrueren die ghi gheplact hebt sonder te tredene moerter: ende ic salse slechten der aerden ghelike ende haer fondament sal geopenbaert worden: ende si sal vallen ende si sal te nyete worden in midden haer: ende ghi sult weten dat ic die here bin.

15

Ende ic sal mine onwaerdicheit veruollen in die want ende inden ghenen diese placken sonder ghemengheden moerter: ende ic sal v segghen. En is ne gheen wandt: ende si en sijn niet diese placken.

16

die propheten van israhel die te iherusalem waert propheteren: ende die haer sien visioen van paeyse en is ne gheen paeys seit die here god.

17

Ende du des menschen sone sette dijn aensichte ieghen die dochtere van dijnen volke die propheteren wt hare herten: ende propheteren op hem

18

ende segghen. Dit seit die here god. Wee die cussenen naeyen onder elken ellenboghe vander hant: ende maken oercussen onder dat hoeft van alre outheit om die zielen te vane. Als sij mijns volcs zielen vinghen. so maecten

[p. *529]

si haer zielen leuende.

19

ende si besmetten mi teghen mi waert om een hant vol ghersten ende om een stuc broets: om dat si die zielen doden souden die niet en steruen ende dat sij die zielen leuende maken souden die niet en leuen: lieghende mijn volc dat haren loghenen geloefde

20

Hier om seit dit die here god. Siet ic spreke te uwen cussenen daer ghi die vlieghende zielen mede vaet: ende ic salse afscoren van uwen armen: ende ic sal die zielen laten die ghi vaet die zielen om te vlieghene.

21

Ende ic sal v oercussen scoren. ende ic sal mijn volc verlossen van uwer hant: ende si en sullen niet meer in uwen handen wesen om te rouene: ende ghi sult weten dat ic die here bin.

22

Om dat ghi in droefheden dedet wesen des gherechtichs menschen herte: dien ic niet en bedroefde: ende om dat ghi des quaets menschen hande ghestarct hebt dat hi niet bekeren en soude van sijnen quaden weghe ende leuen.

23

Hier om en suldi ydelheden niet sien. Ende du en sultste niet meer waersagherien voersegghen: ende ic sal mijn volc verlossen van uwen handen: ende ghi sult weten dat ic die here bin.