Bible in duytsche (Delftse bijbel 1477)

§ Capit .xij.

1

ENde des heren woert wort tot mi ghedaen ende hi seide.

2

Des menschen sone. du woenste in die middewaert van enen onwaerdende huse: die oghen hebben om te sien ende si en sien niet. ende oren te horen ende si en horen niet: want het is een veronwaerdende huys

3

Hier om du des menschen sone make dij vate van oueruoeringhen: ende du sultste bi daghe voer hem oueruaren. Ende du sultste oueruaren van dijnre stat. tot eenre ander stat in haren aenscouwen: of sijt machschien aensien: want het is een veronwaerdende huys

4

Du sultste dijne vaten daer buyten draghen. als vaten der oueruaert des daghes: in haren aenscouwen. Mer du sultste des auonts voer hem wtgaen also wtgaet een die ouertrect:

5

voer sinen oghen: Doergate di die want: ende in haren aenscouwen sultstu doer die want wtgaen.

6

Men saldi draghen op scouderen: in die donckerheit salmen di wtdragen. Du sultste dijn aensicht ouerdecken. ende du en sultste dat lant niet sien: want ic hebbe di ghegheuen den huyse van israhel te enen verwonderen.

7

Hier om dede ic also mi die here beuolen hadde. Ic droech des dages mijne vaten wt als vaten die ouervertrac: ende des auonts maecte ic mitter hant in die want een gat: ende inder donckerheit ghinc ic wt in scouderen ghedraghen in haren aenscouwen.

8

Ende des morghens wort des heren woert tot mi ghedaen ende hi seide.

9

Des menschen sone: en seiden si tot di niet dat huys van israhel dat veronwaerdende huys. wat doetstu?

10

Segt tot hem Dit seit die here god. Dit last is opten leedtsman die in iherusalrm is: ende op al dat huys van israhel dat in midden

[p. *527]

hem is.

11

Segt. Ic bin v voerbetekenisse. Also ic ghedaen hebbe: also sal dien gheschien. Si sullen gaen in oueruoeringhe ende in ghenanghenisse:

12

ende den leidsman die in midden hem is. salmen op die scouderen dragen: inder donckerheit sal hi wtgaen. Si sullen die want doergaten dat si hem wtleiden mogen men sal sijn aensicht ouerdecken. ende hi en sal dat lant mitten ogen niet sien.

13

Ende ic sal mijn nette op hem wtspreiden. ende hij sal in mijne nette gheuaen worden: ende ic sal hem bringhen in babilonien inder caldeeuscher lant: ende hi en sal babilonien niet sien: ende daer sal hi steruen ende alle die omtrent hem sijn.

14

Ende sijn succoers. ende sijn scaren sal ic stroeyen in allen wint: ende ic sal dat swaert vter scheiden trecken achter hem.

15

Ende sij sullen weten dat ic die here bin: als icse ghestroeyt sal hebben inden heydenen: ende ghesaeit inden landen.

16

Ende ic sal van hem luden een luttel mannen laten vanden zwaerde ende vanden hongher ende vander sterften: om dat si alle haer sonden vettellen sullen inden heydenen daer si toe ingaen sullen: ende si sullen weten dat ic die here bin.

17

Ende des heren woert wort tot mi ghedaen ende hi seide.

18

Des menschen sone eet dijn broet in verstoernissen: mer oeck soe drincke dijn water mit haesten ende in droefheden:

19

ende du sultste segghen totten volke vanden lande. Dit seit die her god totten ghenen die in iherusalem wonen: int lant van israhel. Si sullen haer broet in sorghen eten. ende haer water in bedroeftheden drincken: dat dat lant bedroeft ende beroeft werde van haren menichten om alle der gheenre quaetheit die in iherusalem wonen:

20

ende die steden daermen in woent nv sullen ghewoest werden. ende dat lant woest: ende ghi sult weten dat ic die here bin.

21

Ende des heren woert wort tot mi ghedaen ende hi seide.

22

Des menschen sone. wat betekenisse is dit v luden vanden ghenen die int lant van israhel segghen: in langhen tiden sullen die daghen verlenct worden. ende alle visionen sullen te nyete gaen?

23

Hier om segt tot hem. Dit seit die here god. Ic sal doen ophouden dese prouerbie noch men salse niet meer in israhel segghen. Ende spreec tot hem dat die dagen ghenaect sijn: ende dat woert van allen visionen.

24

Want voertmeer en sal elc visioen niet ydel wesen. noch die prophecie twiuelachtich in midden den kinderen van israhel:

25

want ic die here sal spreken so wat dat ic spreken sal ende het sal gheschien. Ten sal niet meer verlenghet werden: mer veronwaerdende huys ic sal in uwen dagen spreken dat woert: ende ic sal dat doen seit die here god.

26

Ende des heren woert wort tot mi ghedaen ende hi seide.

27

Des menschen sone: sich die ghene vanden huse van israhel die segghen. . Dat visioen dat dese man siet in vele dagen ende in langhen tiden propheteerde dese man.

28

Daer om segt tot hem Dit seit god die here. Alle mijn reden en sal voertmeer niet verlenghet worden. Dat woert dat ic spreken sal. sal voldaen worden seit die here