Bible in duytsche (Delftse bijbel 1477)

§ Capit .xi.

1

ENde die gheest hief mi op: ende leide mi in ter oester poerten van des heren huys die aensiet den opganc vander sonnen. Ende sich inden inganc vander poerten vijf ende twintich mannen: ende ic sach in midden hem iechoniam azur sone ende phelthiam banaias sone die princen vanden volke.

2

Ende hi seide tot mi. Des menschen sone: dit sijn die mannen die quaet pensen: ende draghen ouer een alte quaden raet in dese poerte

3

ende segghen. En sijn wilen die husen niet ghesticht? Dit huys is die ketel: ende wi sijn dat vleysch

4

Hier om prophetere van hem. prophetere des menschen sone.

5

Ende des heren gheest viel in mi: ende hi seyde tot mi. Spreec. Dit seit die here. Huys van israhel aldus hebdi gesproken: ende ic weet die ghepense uwer herten

6

Gi hebt in dese poort vele menschen doot gheslaghen: ende ghi hebt hare weghe gheuolt mit versleghen menschen

7

Hier om seit dit die here. Vwe versleghen menschen dien ghi in midden die poert gheleit hebt die sijn dat vleysch ende die poert is die ketel: ende ic sal v wt leiden van midden der poerten

8

Ghi hebt dat zwaert ontsien: ende ic sal dat zwaert in bringhen op v seit die here god.

9

Ende ic sal v verdriuen wt midden der poert Ende ic sal v gheuen inder vianden hande: ende ic sal vonnisse in v doen.

10

Ghi sult inden zwaerde vallen Inden eynden van ilrahel sal ic v vonnissen: ende ghij sult weten dat ic die here bin.

11

Dese stat en sal v niet wesen in enen ketel: ende ghi en sult in midden haer niet wesen in vleysche. Inden lande van israhel sal ic v vonnissen:

12

ende ghi sult weten dat ic die here bin. Want ghi en hebt in minen gheboden niet ghewandelt: ende en hebt mijne vonnisse niet ghedaen: mer nader heyden vonnisse die al omme ende omme v sijn hebdi ghedaen.

13

Ende het gheuiel doe ic propheteerde: doe sterf phelthias banaias sone. Ende ic viel in mijn aensichte: ende riep mit groter stemmen. Ende seide. Ach ach ach here god: doetstu dese verderfnisse vanden ouerbliue van israhel?

14

Ende des heren woert wort tot mi gedaen ende hi seide.

15

Des menschen sone: dine brueders die mannen dijne naesten. ende alle dat huys van istahel. alle die gene die welke die in iherusalem wonen seiden. Gaet verre wech vanden here: ons is dat lant ghegeuen in possessien.

16

Hier om seit dit die here god. Om dat icse verre ghedaen hebbe inden heydenen: ende om dat icse ghestroeyt hebbe inden landen: so sal ic hem wesen in ene cleyne geheilichtheit inden lande

[p. *526]

daer si toe comen sijn.

17

Hier om spreec Dit seit die here god. Ic sal v vergaderen vanden volken: ende in een vergaderen vanden landen daer ghi in ghestroeyt sijt: ende ic sal v gheuen dat lant van israhel.

18

Ende si sullen daer in comen ende si sullen wech doen alle verbolgentheden. ende alle onwaerdicheden van dien lande.

19

Ende ic sal hem een herte gheuen: ende ic sal in horen binnensten gheuen enen nyewen gheest. Ende ic sal dat steenachtich herte afnemen van haren vleysch. ende ic sal hem geuen een vleyschachtich herte:

20

dat si wandelen sullen in minen gheboden. ende mijne vonnisse wachten. ende die doen: ende dat si mij sullen sijn in volke: ende dat ic hem sijn sal in god.

21

Ende der gheenre herte dat na verbelghinghen ende na hare onwaerdicheden wandelt: dese wech sal ic op haer hoeft legghen seit die here god

22

Ende die cherubinnen hieuen haer vloghelen op. ende die raderen mit hem: ende die glorie gods van israhel was bouen hem.

23

Ende des heren glorie voer op van midden der stat: ende si stont opten berth die oest waert is vander poert:

24

Ende die gheest hief mi op: ende bracht mi in caldea ter oueruoeringhen in visioen in gods gheeste: ende dit visioen dat ic ghesien hadde wort van mi genomen.

25

Ende ic sprac totter oueruoeringhen alle des heren woerden: die hi mi getoecht hadde