Bible in duytsche (Delftse bijbel 1477)

§ Capitel .x.

1

ENde ic sach: ende sich inden firmament dat op dat hoeft vanden engel cherubin was als een saphier steen ende bouen die enghel openbaerde die

[p. *524]

ghedaente eenre ghelikenisse van enen throen.

2

Ende hi seide tot den man die gecleet was mitten linen clederen: ende sprac. Ganc in die middewaert vanden raderen die onder cherubin sijn ende volle dijn hant mit colen vanden vyere die tusschen die cherubin sijn: ende werpse wt op die stat. Ende hi ghinc in. in minen aenscouwen.

3

Ende die cherubinnen stonden ter rechter ziden van den huse als die man inghinc: ende een wolke veruolde die zale binnen.

4

Ende des heren glorie wort opuerheuen bouen die cherubin ten dorpele vanden huys ende dat huys wordt veruolt mit eenre wolcken. Ende die zale wort veruolt mitter claerheit van des heren glorien:

5

ende men hoerde dat gheluyt vander cherubinne vlogelen totten buytensten vrijthoue ofte salen: als des almachtichs gods stemme sprekende.

6

Ende doe hi beuolen hadde den man die mit lijnen clederen ghecleet was seggende: neem vier vanden middewaert vanden raderen die tusschen den cherubinnen sijn: soe ghinc hi in ende stont neuen dat rat

7

Ende die een cherub stac wt sijn hant van midden den cherubinnen ten vyere dat tusschen den cherubim was: ende hi namt ende gaft in des mans hande die ghecleet was mit linen clederen: ende hi ontfinct: ende quam wt.

8

Ende in die cherubin openbaerde die ghelikenis eens menschen hant onder haer vloghelen.

9

Ende ic sach ende sich vier raderen neuen die cherubin Dat een rat neuen den cherub: ende dat ander rat neuen den cherub. Ende die ghedaente vanden raderen was als dat sien des steens crisolitus:

10

ende haer aensien ende ene ghelikenisse vanden vieren: als ofte een rat si midden in een rat.

11

Ende als si ghinghen so ghingen si in vyer ziden. ende si en keerden niet weder doe si ghinghen: mer tot dier stat waert daer dat eerste rat ghinc. soe volgheden oec die ander: ende si en keerden niet weder.

12

Ende al haer lichaem ende halsen ende hande ende die vloghelen ende die omringen waren vol ogen al omme ende omme den vier raderen:

13

ende hi hiete dese radere daer ict hoerde kerende.

14

Ende die een cherub hadde vier aensichten. Dat een aensicht was eens cherubs aensicht: ende dat ander eens menschen aensicht ende in dat derde eens liebaerts aensicht ende int vierde eens arents aenscht.

15

Ende die cherubinne worden op gheheuen: het is dat selue dier dat ic sach neuen die riuier chobar.

16

Ende als die cherubinne ghinghen soe ghinghen te gader oec mede die raderen neuen hem ende als die cherubinne hieuen haer vloghele op dat si verheuen werden souden vander aerden so en bleuen die raderen niet staende: mer si warenre oec neuen die cherubinne.

17

Als die stonden so stonden si oec: ende mitten opuerheuenen worden si op gheheuen. Want een gheest van leuen was inden raderen.

18

Ende des heren glorie quam wt van des tempels dorpele. ende stont op die cherubinne.

19

Ende die cherubinne hieuen haer vloghelen op ende voer mi worden si verheuen vander aerden: ende doe si wt quamen so volgheden hem oec die raderen nae. Ende het stont inden inganc

[p. *525]

der poerten van oest van des heren huse: ende gods van israhel glorie was op die cherubinne.

20

Het is dat dier dat ic sach onder gode van israhel neuen die riuiere chobar. Ende ic verstont wanttet die cherubinne waren.

21

vier aensichten waren den enen: ende vier vloghelen den enen ende die ghelikenisse van eens menschen hant onder hare vloghele.

22

Ende die ghelikenisse van haren aensichten: dien ic ghesien hadde neuen die riuier chobar ende haer aensien ende dat bedrusche van elken. was in te gaen voer sijn aensichte