Bible in duytsche (Delftse bijbel 1477)

§ Ca .ix

1

ENde hi riep mit groter stemmen in mijnen oren ende seide. Der stat visiteringhen sijn ghemaect: ende elc heuet in sijn hant een vat der dootslacht.

2

Ende siet ses mannen quamen vanden weghe der ouerster poerten die ten noerden waert scouwet ende elck hadde sijn vat der verderffenissen in sijn hant. Ende in midden hem was oeck een man mit linen clederen gecleet: ende hi hadde een scriuers incthoerne an sine lendene. Ende si quamen in: ende stonden neuen den metalen outaer.

3

Ende des heren van israhels glorie wort op genomen vanden cherub: dats vanden enghel die op hem was ten dorpel vanden huys. Ende hi riep den man die gbecleet was mit linen clederen. ende die op sijne lendene hadde een scriuers incthoerne.

4

Ende die here seide tot hem Gaet ouer tot midden die stat in midden iherusalem. ende teyken thau op der mannen voerhoeft die versuchten ende droue sijn op alle die onwaerdicheden diemen in midden iherusalem duet

5

Ende hi seide dien anderen mannen dat ict hoerde. Gaet ouer doer die stat ende volghet hem: ende slaet. V oghen en spaert niet: noch en ontfermes.

6

Verslaet totter doot den ouden den ionghelinc ende die maghet dat cleyne kint ende die wijuen. Ende elken daer ghi thau op sien sult en verslaets niet: ende beghint van mijnen sanctuarie. Hier om begotsten si vanden mannen den ouders die voer dat aensicht vanden huys waren.

7

Ende hi seide tot hem. Besmet dat huys: ende volt die salen van ghedoden menschen Gaet wt. Ende si ghinghen wt: ende sloghen die ghene die in die stat waren

8

Ende doe die slacht voldaen was so bleef ic: ende ic viel op mijn aensicht: ende ropende seide ic. Ach ach ach here god Ende sultstu aldus niet verderuen alle die ouerblijue van israhel. dinen toren wt storttende op iherusalem?

9

Ende hi seide tot mi. Die quaetheit des huys van israhel. ende van iuda is harde sere groet: ende dat lant is veruolt van sonden: ende die stat is vervuylt van afkeringen. Want si hebben gheseit. Die here heuet dat lant ghelaten: ende die here en siet des niet.

10

Hier om en sal oec mijn oge niet sparen: ende ic en sal niet ontfermen. Ende ic sal horen wech op haer hoeft ghelden.

11

Ende sich die man die ghecleet was mitten linen clederen. dien op sijnen rugghe hadde den incthoren: antwoerde een woert ende seide. Ic heb ghedaen also du mi beuolen hebtste.