Bible in duytsche (Delftse bijbel 1477)

§ Ca .viij.

1

ENde het gheschiede inden seste iaer. in die seste maent inden vijfsten daghe vander maent: so sat ic in mijn huys: ende die ouders van iuda saten voer mi. Ende daer viel

[p. *522]

op mi des heren gods hant.

2

Ende ic sach: ende sich die gelikenisse als dat aensien van vyere. Vanden aensien sijnre lendenen ende beneden wort een vyer: ende van sijnen lendenen opwaert als een aensien eenre claerheit: als dat aensien van electere:

3

ende het wert wt ghesteken die gelikenisse eenre hant ende begreep mi in den top van minen houede: ende die gheest hief mi op tusschen den hemel ende die aerde: ende hi voerde mi in iherusalem in gods visioen neuen die binnenste duere. die ten noerden waert scouwede. ende ic sach daer geset den afgod des benydens: om die hatye te verporrene

4

Ende siet daer was gods van israhels glorie nae dat visioen dat ic ghesien hadde opt velt:

5

ende hi seide tot mij Des menschen sone: heffe op dijne ogen ten weghe waert van noerden. Ende ic hief mijne oghen op ten weghe waert van noerden: ende sich van noerden der poerten des outaers. was die afgod des benidens inden inganc.

6

Ende hi seide tot mi. Des menschen sone: waenstu yet oftu sietste wat dese doen die grote onwaerdicheden die dat huys van israhel hier duet. dat ic verre wech gaen sal van mijnen heylighen huse. Ende noch kere di. ende du sultste sien meerre onwaerdicheit

7

Ende hi leide mi in ter doren vander zalen. Ende ic sach: ende sich een gat was in die want.

8

Ende hi seide tot mi Des menschen sone: graue die want Ende doe ic die want doer grauen hadde: soe openbaerde daer een dore.

9

Ende hi seide tot mi. Ganc in: ende besich die alre quaetste onwaerdicheit die dese hier doen.

10

Ende ic ginc in ende sach. Ende sich alle menichte van crupenden dieren ende die onwaerdicheit vanden beesten ende alle die afgode des huys van israhel waren gepingeert al omme ende omme aen die want al doer.

11

Ende tseuentich mannen vanden huse van israhel ouders. ende iechonias saphans sone stont in die middewaert van hem luden die voer die beelden stonden: ende elc hadde een wieroec vat in sijn hant: ende die domp vanden roke vanden wieroeck ghinc opwaert.

12

Ende hi seide tot mi. Seker sietstu dit menschen sone dat die ouders des huys van israhel doen inden donckerheden: elc in die heymelijcheden van sijnen bedde. Want si seggen. Die here en siet ons niet. Die here heuet alle dat lant ghelaten.

13

Ende hi seide tot mi. Noch kere di. ende du sultste meerre onwaerdicheden sien die dese doen.

14

Ende hij leide mi in doer die dore ter poerten van des heren huys die ten noerden waert scouwede. Ende sich daer saten die wiuen ende weenden adonyden.

15

Ende hi seide tot mi. Des menschen sone hebtstuut seker ghesien Noch gekeert sultstu meerre onwaerdicheit sien dan dese.

16

Ende hi leide mi in die zale van ons heren huys binnen Ende sich in die dore van des heren tempel tusschen die cledere camer ende den outaer waren als vijf ende twintich mannen die die rugghen hadden tot des heren tempel waert. ende die aensichte oest waerts: ende beden ter sonnen opganghe waert.

17

Ende hi seide tot mi. Des menschen sone du heues seker ghesien

[p. *523]

En is dit niet licht den huyse van iuda. dat si deden dese onwaerdicheden die si hier ghedaen hebben? Want dat lant veruollende van quaetheden sijn si ghekeert om mi te vergrammen. Ende sich si trecken dat tlecht te haren nase locken waert.

18

Hier om sal ic oec doen in gramscappen: mijn oghe en sal niet sparen. ende ic en sal niet ontfermen: ende als si te mijnen oren ropen sullen mit groter stemmen. so en sal ics niet horen