Bible in duytsche (Delftse bijbel 1477)

§ Capittel .vij

1

ENde des heren woert wert gedaen tot mi ende seide.

2

Ende du des menschen sone: dit seit die here god van israhel. Dat eynde coemt: dat eynde coemt op die vier plaetsen vanden lande.

3

Nu is dat eynde op di: ende ic sal mijne gramscap in di wtsenden. Ende ic sal di oerdelen na dijnen weghen. Ende ic sal ieghen di setten alle dine onwaerdicheden:

4

ende mijn oghe en sal op di niet sparen. ende ic en sal dijns niet ontfermen: mer ic sal dijn weghen op di legghen ende dine onwaerdicheden sullen in midden di wesen: ende ghi sult weten want ic die here bin:.

5

Dit seit die here god. Een quellinghe: quellinghe siet si coemt

6

Dat eynde coemt: dat eynde coemt. Het is ontwaec iegen di: siet het coemt Bedroeftheit coemt op di die woentste int lant.

7

Die tijt coemt: die dach der doetslacht is bi ende niet der glorien vanden berghen.

8

Nu sal ic van na bi mine gramscap wt stortten op di: ende ic sal mijnen toerne in di voldoen. Ende ic sal di vonnissen na dijnen weghen ende ic sal op di legghen alle dijne misdaden.

9

Ende mijne oghe en sal niet sparen noch ontfermen: mer ic sal dijne weghen op di leggen. ende dijne onwaerdicheden sullen in midden di sijn: ende ghi sult weten dat ic die here bin slaende.

10

Siet den dach: siet hi coemt. Die bedroeftheit is wt gecomen: die ruede is geblueyt. die houdige is gegrueyt:

11

die ongherechtich is op ghestaen in die ruede der ongenadicheit. Niet wt haer ende niet wt den volke: noch wt ha-

[p. *521]

ren gheluden: ende in hem en sal gene rust wesen.

12

Die tijt coemt: die dach is genaket. Die coept hi en verblide niet ende die vercoept en wenet niet. want gramscap is op alle sijn volc:

13

want die vercopet hi en sal niet wederkeren te dien dat hi vercocht heeft. ende noch is haer leuen: inden leuenden. Want dat sien en sal niet weder keren te al hare menichten ende een man en sal niet ghestarct werden in die quaetheit sijns weges.

14

Trompet mitter trompen: si bereiden hem alle: ende nyemant en is die te stride waert gaet. Want mijn gramscap is op alle die menichte sijns volcs.

15

Dat zwaert buyten: ende die hongher ende die sterfte binnen. Die inden acker is. hi sal mitten zwaerde steruen: ende die in die stat sijn. sullen verteert worden mitten sterften ende mitten hongher:

16

ende die van hem luden vlien sullen. si sullen werden behouden. Ende si sullen inden berghen wesen als duuen vanden valeyen: ende alle sijn si veruaert: elc in sijne quaetheit.

17

Alle handen sullen ontbonden werden: ende alle knyen sullen vloeyen van wateren.

18

Ende si sullen hem toegorden mit haren clederen. ende vrese salse ouerdecken: ende in elc aensichte sal scaemte wesen: ende op alle haer hoefden caluheit.

19

Men sal haer siluer daer buyten werpen: ende haer gout sal wesen in vuyle missche. Haer siluer ende haer gout en salse niet moghen verlossen. inden daghe van ons heren toerne. Zi en sullen haer ziele niet saden noch haer buyc en sal niet geuolt worden:

20

want die scande haerre quaetheit is ghedaen: ende die vercieringhe van haren hexselen setten sy in houerdicheden: ende si maectenre of die beelden van haerre onwaerdicheden ende van haren afgoden.

21

Hier om gaf ic hem dit in onsuuerheden: ende ic sal dat gheuen in vreemder lude hant om te rouene ende den quaden vanden lande in roue: ende si sullen dat besmetten.

22

Ende ic sal mijn aensicht van hem keren: ende si sullen mijne gheheilichtheit besmetten. ende daer in sullen sarianten comen ende besmettent.

23

Makes een eynde: want dat lant is al vol vanden oerdele van sonden ende die stat is vol quaetheden.

24

Ende ic sal die alre quaetste vanden heydenen toebringhen: ende si sullen haer husen besitten. Ende ic sal op doen houden der machtigher houerdicheit: ende si sullen haer sanctuarien besitten.

25

Als dat verdriet hem op comen sal. soe sullen si den vrede soken: ende hi en sal niet wesen.

26

Verstoringhe sal op verstoringhe comen: ende horen op horen. Ende si sullen vraghen visioen vanden propheet: ende die wet sal te nyete gaen van den priester: ende die raet vanden ouders

27

Die coninc sal wenen: ende die princen sullen droefheit aen doen: ende des volcs handen vanden lande sullen ghestoert worden. Ic sal hem doen na haren wech. ende na haer oerdel sal icse vonnissen: ende si sullen weten dat ic die here bin