Bible in duytsche (Delftse bijbel 1477)

§ Capittel .vi.

1

ENde des heren woert wort tot mi ghedaen ende hi seide.

2

Menschen sone. sette dijne aensicht ten berge waert van israhel: ende du sultste te hem propheteren

3

ende segghen. Berghen van israhel hoert des heren gods woert. Dit seit die here god den berghen ende den hillen. den rootsen ende den valeyen. Siet ic sal op v in bringhen dat zwaert ende hi sal v hoecheden destrueren:

4

ende breken uwe outare ende uwe afgoden sullen werden te broke: ende ic sal uwe verslagene wtwerpen voer uwe afgoden.

5

Ende ic sal der kinder van israhel croengien gheuen voer dat aensichte van uwen afgoden: ende ic sal uwe beenre stroeyen voer uwen outaer in allen uwen woninghen.

6

Die steden sullen woest wesen: ende die hoecheden sullen te broken ende verstroeyt werden: ende uwe afgoden sullen cesseren. ende uwe tempele sullen te broken worden: ende uwe wercken sullen afghedaen worden:.

7

ende die versleghen sullen vallen in midden v: ende ghi sult weten dat ic die here bin.

8

Ende ic sal in v laten die

[p. *520]

ghene die den zwaerde ontvloghen sijn inden heydenen. als ic v inden lande gestroeyt sal hebben:

9

ende uwe verloste sullen mijns gedencken inden heidenen tot den wateren daer si in gheuangen geleit sullen sijn. Want ic hebbe bedroeft haer noeyerende herte ende dat van mi wech gaet. ende haer vernoeyerende oghen na haer afgoden: ende si sullen hem seluen wanhaghen op dat quaet dat si ghedaen hebben in allen veronwaerdicheden:

10

ende si sullen weten dat ic die here. niet te vergheues ghesproken en hebbe dat ic hem dit quaet doen soude.

11

Dit seit die here god. Slach dijn hant ende stoet dijnen voet: ende segt ach te allen onwaerdicheden van dat huys van israhels quaden wercken want die vallen sullen inden zwaerde in hongher ende in sterften.

12

Die verre is sal steruen vanden sterften: ende die bi is. hi sal mitten zwaerde vallen: ende die ghelaten wesen sal ende beleit. hi sal van hongher steruen: ende ic sal veruollen mijn onwaerdicheit in hem.

13

Ende ghi sult weten dat ic die here bin. ende uwe verslaghen sullen wesen in die middewaert van uwen afgoden al omme ende omme van uwen outaren in elken hoghen hil. ende in allen hoecheden vanden berghen: ende onder elc bosch hout. ende onder alle ghelouerde eyke: ende in die stat daer si verbornen alle haer afgoden welrukende wieroeck.

14

Ende ic sal mijn hant wt steken op hem: ende sal dat lant maken woest ende bedroeft vander wildernissen deblatha in al haren woninghen: ende si sullen weten dat ic die here bin.