Bible in duytsche (Delftse bijbel 1477)

§ Capittel .v.

1

ENde du menschen sone. neem di een scarp swaert dat haer scheert. ende du sultstet nemen ende doent gaen om dijn hoeft ende ouer dijne baert: ende du sults di nemen een waghescale ende deelen dijn haer.

2

Dat derdendeel sultstu verbarnen mitten vyere in midden die stat na dat voldoen der daghe vander belegghinghen: ende du sultste nemen dat derdendeel ende slaent ontween mitten zwaerde al omme ende omme haer: mer dat ander derden deel sultstu spraeyen inden wint. ende du sultste dat zwaert nae hem vter scheiden trecken.

3

Ende du sultste daer of neemen een cleyne ghetal. Ende du sultste dat binden aen dat eynde van dijnen mantel:

4

ende du sultstet daer of weder nemen ende worpent in midden dat vyer: ende sultstet mitten vyer verbarnen: ende daer wt sal vyer comen in al dat huys van israhel.

5

Dit seit die here. Dit is iherusalem. In die middewaert vanden heydenen heb icse gheset: ende al omme ende omme haer is dat lant.

6

Ende hi heeft mijne vonnisse veronwaert dat si meer onghenadigher was dan die heydene: ende veronwaerde mijne ghebode meer dan die lande die al omme hem sijn. Want si hebben mijne vonnisse verworpen: ende en hebben niet ghewandelt in mijnen gheboden.

7

Hier om seit die here god. Om dat ghi bouen die heydene die al omme ende omme v sijn ghedaen hebt. ende in minen geboden niet gewandert en hebt ende ghi mijne vonnisse niet ghehouden en hebt: ende om dat ghi gedaen hebt nader heydene vonnisse die al omme ende omme v sijn.

8

Hier om seit dit die here god. Sich ic segghe tot di: ende ic selue sal in midden van v doen vonnisse inder heydene oghen:

9

ende ic sal in di doen dat ic niet ghedaen en hebbe ende dat ic dien dinghe ghelike nemmer-

[p. *519]

meer doen en sal: om alle dine onwaerdicheden.

10

Hier om sullen in midden di die vaderen haer kinderen eten: ende die kinderen haer vaderen eten. Ende ic sal in di vonnisse doen.: ende ic sal alle dine ouerblijue waeyen in allen wint

11

Hier om leue ic seit die here god: en si om dattu mijn heylighen hebtste besmet in allen dynen verbelghinghen ende in allen dijnen onwaerdicheden soe sal ic di oec breken: ende mijn oghe en sal di niet sparen ende ic en sal dijns niet ontfermen.

12

Dat een derdendeel van di sal vander sterften steruen. ende werden ghedoot in midden di van hongher: ende dat derdendeel van di sal inden zwaerde vallen al omme ende omme di Mer dat derdendeel van di sal ic stroeien in allen wint: ende ic sal dat zwaert vter scheide trecken achter hem.

13

Ende ic sal mijne gramscap voldoen: ende ic sal doen rusten mijne onwaerdicheit in hem: ende ic sal vertroest worden. Ende si sullen weten dat ic den here gesproken hebbe in mijnen toerne: als ic alle mijne onwaerdicheit in hem voldaen hebben sal.

14

Ende ic sal di gheuen in woestheit ende in spotte ende in lachtere den heydenen die al omme ende omme dij sijn: inden aenscouwen elcs die voerbi di liden sal.

15

Ende du sultste wesen lachter ende blasphemie exempel ende verwonderen inden heydenen die al omme ende omme dij sijn: als ic in di ghedaen sal hebben vonnisse in mijnen toren ende in mijne onwaerdicheit ende in berispinghe van gramscapen die ic die here heb ghesproken:

16

als ic senden sal in hem die alre quaetste ghescutten van hongher die doetlike sijn sullen: ende die ic senden lal. om v te verderuen Ende ic sal den hongher op v vergaderen: ende ic sal in v ontween breken den stoc vanden brode:

17

ende ic sal den hongher in v senden ende die alre quaetste beesten tot uwer verderffenissen Ende die gadoot hongher ende dat bluet sal ouer di liden: ende ic sal dat zwaert op di in bringhen. Ic die here hebbet ghesproken