Bible in duytsche (Delftse bijbel 1477)

§ Capit .ij.

1 [2:1b]

ENde ic sach ende ic viel in mijn aensichte: ende hoerde ic die stemme eens die sprac. Ende hi seide tot mi. Des menschen sone stant op dijne voeten: ende ic sal mit di spreken.

2

Ende die gheest quam in mi nae dien dat hy tot my sprack: ende hij settede mi op mijne voeten. Ende ic hoerde tot mi spreken ende segghen.

3

Des menschen sone: ic sende di ten kinderen van israhel: ten vernoeyeerden luden die van mi wechgegaen sijn Hare vaders hebben mijn belofte te broken tot desen daghe: ende die kinder sijn van herden aensichte ende onghetamelike van herten

4

te dien dat ic di sende. Ende du sultste tot hem seggen. Dit seit die here god: oft si machschien dat willen horen. ende

5

oft si machschien rusten willen. want het is een veronwaerdende huys: ende si sullen weten dat een propheet in midden hem is.

6

Hier om du des menschen sone en ontsichse niet. noch en vrese di niet van haren woerden: want onghelouighe ende verkerende sijn mit di: ende du woenste mit scorpionen. en vreest haer woerden niet: ende en ontsich haer aensicht niet: want het is een veronwaerdende huys.

7

Hier om sultstu mijne woerden tot hem spreken oft sise machschien horen willen ende rusten: want het sijn verporrers tot gramscepen.

8

Mer du des menschen sone hore wat ic tot di spreken sal: ende en wil niet wesen veronwaerdende also een veronwaerdende huys is. Doe op dijnen mont: ende eet so wat dat ic di geue.

9

Ende ic sach: ende sich een hant was tot mi gesteken. daer in was ghewonden een boec ende die hant spreide dien boec wt voer mi. ende hij was ghescreuen binnen ende buyten: ende daer in waren ghescreuen gheween ende sanc ende wee.