Bible in duytsche (Delftse bijbel 1477)

§ Capitel I

1

ENde het geueil in den dertichsten iare in die vierde maent inden vijfsten dage vander maent: doen ic was in die middewaerrt vanden gheuanghenen neuen die riuier chobar so worden die hemelen ontdaen: ende ic sach gods visionen.

2

Inden vijfsten daghe vander maent. dat is dat vijfste iaer van des conincs ioachims oueruaert: soe wort des heren woert ghedaen tot ezechiel buzi sone den priester inder caldeeuscher lant neuen die riuier chobar.

3

Ende des heren hant wort daer op hem ghedaen.

4

Ende ic sach: sich een wint van bedruysche quam van noerden: ende een grote wolke ende wentelende vyer daer in. Ende een claerheit al omme ende omme die wolke. ende vander middewaert van hem dat is vander middewaert vanden vyere als een ghedaente van electere.

5

Ende in middewaert van dien was ene ghelikenisse vyer dieren ende dit was haer aenscouwen. Die gelikenisse eens menschen was in hem.

6

Ende den enen waren vier aensichten: ende den enen vier vloghelen.

7

Ende haer voeten waren rechte

[p. *514]

voeten. ende die plante van haren voeten was als een plante eens calfs voete: ende die spranckelen als dat aensien van bleckenden coper.

8

Ende eens menschen hande waren onder haer vloghelen in vier ziden: ende si hadden aensichten ende vloghelen aen vyer ziden:

9

ende haer vloghelen waren te gader gheuoget des anders aenden anderen. Si en keerden niet als si voertghingen. mer elc dier ghinc voer sijn aensicht.

10

Ende die ghelikenisse haers aensichten. Eens menschen aensichtes: ende eens liebaerts aensichte vander rechter ziden van hem vieren: ende eens ossen aensicht vander luchter ziden van hem vieren: ende eens arents aensichte bouen hem vieren.

11

Ende haer aensichte ende haer vloghelen waren opwaert wt ghespreit. Die twee vloghelen van elken waren te gader gheuoget ende die twee vloghelen bedecten haer lichamen.

12

Ende elc vanden dieren ghinc voer sijn aensichte. Waer dat bedrusche des gheestes was daerwaert gin ghinghen si. Ende si en keerden niet weder doe si ghinghen.

13

Ende die gelikenisse vanden dieren ende haer aensichten was als barnende colen van vyere: ende als dat aensien van lampen. Dit was dat aensien dat al omme liep in die middewaert vanden dieren: claerheit van vyere. ende wt den vyere blicsemn wt comende.

14

Ende die dieren ghinghen ende keerden weder: inder gelikenisse eenre blickender blixemen.

15

Ende als ic die dieren aensach: so openbaerde een rat op die aerde neuen die dieren dat vyer aensichten hadde.

16

Ende dat aensien van den raderen ende haer werc als dat aensien vander zee: ende een ghelikenisse was van dien vyer raderen: ende haer aensien ende haer wercken als ofte een rat in die middewaert van enen rade ware.

17

In vyer ziden van dien raden ginghen si gaende: ende si en keerden niet weder doe si ghinghen.

18

Stature was oec inden raden ende hoecheit. ende eysselijc aensien: ende alle die lichaem was vol oghen al omme ende omme van dien vieren.

19

Ende als die dieren ghingen. so ghingen oeck neuen hem te gadere die rade: ende als die dieren op uerheuen worden. van der aerden. so worden oec te gader op verheuen die radere.

20

Soe warwaert dat die gheest ghinc: so worden te gadere die radere op uerheuen ende volgeden hem. Want een gheest van leuene was inden raderen.

21

Mitten gaenden ghinghen si. ende mitten staenden stonden si: ende mitten op uerheuen vander aerden. so worden si te gadere die radere op uerheuen ende volgheden den dieren: want een gheest van leuene was in den raderen.

22

Ende bouen die houeden van den dieren was die gelikenisse eens firmaments: als dat aensichte van enen anxteliken cristalle. Ende het was wtghespreit bouen op haer hoefden.

23

Ende onder dat firmament waeren haer vlogel opgerechte des eens totten anderen Elc dier bedecte sinen lichaem mit tween vloghelen: ende dat ander wort oec bedect.

24

Ende hi hoerde dat gheluyt vanden vloghelen als dat gheluyt van vele wateren: als dat gheluyt des hoghes gods als si ghinghen soe wast een gheluyt

[p. *515]

als eenre menichten. als dat gheluyt van scaren. Ende als si stonden so hingen hoer vloghelen nederwaert.

25

Want als een stemme gemaect wort opt firmament dat bouen haer hoeft was: so stonden si ende lieten haer vloghelen nederwaert gaen.

26

Ende op dat firmament dat bouen haer hoeft was. so was die ghelikenisse van enen troen als een aensien van enen saphier stene: ende op die gelikenisse van dien throne was. als die ghelikenisse als dat aensien van enen mensche daer bouen.

27

Ende ic sach als die gedaent van electere: als dat aensien eens vyers binnen al omme ende omme hem. van sijnen lendenen ende opwaert: ende van sijnen lendenen tot beneden: sach ic als die gedaent eens lichtende vyers al omme ende omme

28

als dat aensien van den boghe als hi inden wolke is inden daghe alst regent. Dit was dat aensien der claerheit al omme ende omme.

29[2:1a]

Dit was een visioen der ghelikenissen van des heren glorien.