Bible in duytsche (Delftse bijbel 1477)

§ Ca .v.

1

Trect di wt iheruslem tcleet des screyens ende dijnre quellinge: ende cleet di mit verchieringhe ende mit eeren. welc di van god is in ewigher bliscap.

2

God sal di cleden mit dat cleet des rechtuaerdicheits: ende sal op dijn hoeft setten een miter der ewigher eren

3

Want god sal tonen sijnen schijn in di: alle mensche die onder den hemel is.

4

Want dijn name sal di genoemt worden van god inder ewicheit: vrede des rechtuerdicheits ende eer des guedertierenheits.

5

Stant op iherusalem ende stae inden hoghen: ende siet om totten oesten ende sie dijn sonen vergadert van den oesten tot den westen: in dat woert des heylichs verblidende in die gedachtenisse gods.

6

Want si sijn wt gegaen van di mitten voeten gheleyt vanden vianden: mer die heer salse toeleiden tot di gedragen in eren als sonen des rijcs

7

Want god heeft gheset te vernederen alle hoghe berghen ende ewige steenroetsen: ende die dallen te veruollen in gheheylicheit der aerden: op dat israhel trouwelijc wandelen mach inder eren gods.

8

Mer die bosschen hebben verdonckert. ende alle hout des suetticheits israhels na den ghebot gods.

9

want god sal toeleiden israhel mit vrolicheit in dat licht sijnre mogentheit mit barmherticheit ende rechtueardicheit twelc is wt hem

§ Hier beghint een wtscrift der epistolen des seluen baruch. welc iheremias heeft ghesent totten gheuanghen ofgheleit in babilonien vanden coninc van babilonien: dat hi dien boetscappen soude na dat hem geboden was van gode