Bible in duytsche (Delftse bijbel 1477)

§ Capittel .iij.

1

ENde nv here god israhel: die ziel in bangicheit ende die gheest des anxt roep tot di.

2

Hoert here ende ontfermt: want du biste god bermhertich ende ontfermt onser want wi hebben ghesondicht voer di.

3

Want du sitste int ewich: ende wi en sullen niet vergaen int ewich:

4

Here god almachtich god van isrehel hoert nv dat ghebet der doden israhel ende hare sonen: want si hebben ghesondicht voer di ende en hebben niet gehoert die stemme des heren haers gods. ende veel quaden sijn op ons vergadert.

5

Wilt niet ghedencken die boesheit onser vaderen: mer ghedenct dijnre hant ende dijns naems in deser tijt:

6

want du biste die here ons god. ende wi sullen di louen here:

7

want daer om hebste ghegheuen dijn vrese in onsen herten. op dat wij souden aenropen dijnen name ende louen di in onse vanghenisse: want wi worden bekeert van die boesheit onser vaderen die ghesondicht hebben voer di

8

Ende siet wi sijn huden in onse vanghenisse in welke du ons verstroyt hebtste in lachter ende in vermalediinge ende in sonde. na al die boesheit onser vaderen: die afghegaen sijn van di here ons god.

9

Hoert israhel die gheboden des leuens: verneemt mitten oren dattu weten moechste wijsheit.

10

Wat ist israhel dattu biste inden lande der vianden?

11

Du biste out gheworden in vreemden lande: du biste besmet mitten doden Du biste gherekent mit den ghenen die neder climmen inder hellen:

12

du hebste achter ghelaten die fonteyne der wijsheit.

13

Want waer sake dattu gewandelt hadtste inden wech gods: du soutste doch ghewoent hebben in vreden op der aerden.

14

Leert waer wijsheit is waer doecht is waer verstant is: op dat ghi mede weten moecht waer dat die lancheit des leuens is ende doecht: waer tlicht der ogen is ende vrede.

15

Wie heeft gheuonden sijn stede? Ende wie is inghegaen in sijn scatting?

16

Waer sijn die princen der volken ende die heerscappie hebben op die beesten die sijn op der aerden?

17

Die spelen in die vogelen des luchts.

18

die vergaderen siluer ende gout in welcke die menschen betrowen ende gheen eynde en is hare verkriginge Die siluer smeden: ende sorchuoudich sijn: ende niet en is vindinghe haerre wercken.

19

Si sijn gheeyndt ende neder

[p. *507]

ghedaelt tot der hellen. ende ander sijn weder op ghestaen in hare stede.

20

Die ionghen hebben ghesien licht ende hebben ghewoent op der aerden. Mer sij en hebben niet gheweten den wech der leringhe:

21

noch si en hebben niet verstaen haer weghen. noch haer sonen en hebben si niet ontfanghen. Si is verre gheworden van haer aenschijn.

22

Sij en is niet ghehoert inden landen chanaan: ende niet gesien in theman

23

Ende die sonen ager die gesocht hebben wijsheit die vander aerden is coopluden des lants theman ende timmerliden. ende soeckers des wijsheits. ende verstants: mer si en hebben niet gheweten den wech des wijsheits. ende en hebben niet ghedacht hare wegen

24

O israhel hoe groet ist huys gods. ende hoe groet is die stede sijnre besittinghe.

25

Groet ende gheen eynde hebbende hoech ende onghemeten.

26

Daer hebben geweest rosen ghenoemt: die van begin gheweest hebben groet van staturen gheleert ten stride.

27

Die here en heeft dese niet vercoren ende si en hebben niet gheuonden den wech der leringe: daer om sijn si vergaen.

28

Ende want si niet en hebben ghehadt wijsheit daer om sijn si vergaen om hare sotheit.

29

Wie is op gheclommen inden hemel ende heeft die wijsheit ontfanghen: ende heeft die wtgeleit vanden wolken?

30

Wie heeft geuaren ouer die zee ende heeft die wijsheit gheuonden: ende heeftse ghebrocht bouen wtuercoren gout?

31

Niemant en is die weten mach haer weghen: ende die soect haer weghen.

32

Mer die alle dinc weet heeftse bekent: ende heeftse geuonden ouermits sijnre wijsheit. Die heeft bereet die aerde in ewigher tijt ende heeftse veruolt mit beesten ende mit dieren die vier voeten hebben.

33

Die wtsent tlicht ende het gaet ende hi heeft dat gheropen. ende het is hem onderdanich in anxte.

34

Mer die sterren hebben gegheuen licht in haren bewaringhen: ende si sijn verblijt.

35

Si sijn gheropen: ende si hebben gheseit. Hier sijn wi. Ende si hebben hem ghescreuen mit vrolicheit: diese ghemaect heeft.

36

Dit is ons god: ende gheen ander en sal vermoede worden ieghens hem.

37

Dese heeft ghevonden alle wech der leringhe: ende hi heeftse gegeuen iacob sijnen knecht: ende israhel sijnen gheminden.

38

Na desen is hi ghesien in die aerden: ende hi heeft ghewandelt mitten menschen