Bible in duytsche (Delftse bijbel 1477)

§ Ca .ij.

1

DAer om heeft die here onse god geset sijn woert welc hi ghesproken heeft tot ons: ende tot onsen rechteren die gherecht hebben in iherusalem ende tot onsen coninghen ende tot onsen princen ende ende tot alden volke israhel ende iuda:

2

dat die here soude toe leiden op ons grote quaden die niet ghesciet en sijn onder den hemel. als ghesciet sijn in iherusalem. na die dingen die ghescreuen sijn in der wet moeysi.

3

dat die menschen eten soude dat vleysch sijns soens ende dat vleysch sijnre dochteren.

4

Ende die here heeftse ghegeuen in die macht alder coninghen die sijn in onsen omganc in lachtere ende in mistroest ende in allen volke in welke die here ons verstroeyt heeft.

5

Ende wi sijn gheworden onder ende niet bouen: want wi ghesondicht hebben den here onsen god. niet onderdanich wesende sijnre stemme.

6

Den here onsen god is rechtuaerdicheit: mer ons ende onsen vaderen bescamenis des aensichts als op desen dach.

7

Want god heeft ghesproken op ons alle dese quaden die ghecomen sijn op ons:

8

ende wi en hebben niet ghebeden dat aensicht des heren ons gods dat wi weder keren souden een yghelijc onser van onsen quaden weghen.

9

Ende den here heeft ghewaect inden quaden ende heeft die op ons ghebrocht: want die here is rechtuaerdich in alle sijne werken welcke hi ons geboden heeft

10

ende wi en hebben niet gehoert sijn stemme: dat wi souden gaen in die gheboden des heren die hi openbaert heeft voer ons aensicht.

11

Ende nv heer god israhel die wt gheleit hebtste dijn volc vanden landen egipti in starcker hant ende in teykenen ende in wonderliken dinghen ende in dijnre groter macht ende in dijnen hoghen arme ende du hebtste di ghemaect enen naem als op desen dach.

12

Wi hebben ghesondicht wredelijc. ende boeselijc ghewrocht here ons god: in alle dijn rechtuaerdicheden.

13

Dijn toren moet afgekeert worden van ons: want wi weenich sijn achter ghelaten onder den heydenen daer du ons ghestroeyt hebtste.

14

Verhoert

[p. *505]

here ons aenroepen ende onse ghebeden ende ley ons wt om dijne wille: ende geeft ons te vinden ghenade voert aensicht der gheenre die ons af gheleit hebben:

15

op dat weten mach alle lant want du biste die here ons god: ende want dijn name is aen gheroepen op israhel ende op sijn gheslachte.

16

Siet aen here van dijnen heylighen huys tot ons: ende neyget dijn ore ende verhoert ons.

17

Doe op dijn oghen ende sie: want die doden die sijn inder hellen welker gheest is ghenomen van haren lichamen en sullen niet gheuen den here eer ende rechtuaerdicheit:

18

mer die ziele die drouich is van groetheit des quaets ende gaet crom ende inden nedersten inden welcs ogen gebreken: ende die hongherighe ziele geeft di glorie ende rechtuaerdicheit den here:

19

want wi niet en stortten ghebeden na rechtuaerdicheit onser vaderen ende begeren bermherticheit voer dijn aenschijn here ons god:

20

mer want du gesent hebste dijn toerne ende dijn gramscappe op ons: als du ghesproken hebste inder hant der propheten dijnre knechten segghende.

21

Aldus seit die here. Neicht v scouwer ende uwe nacke: ende doet dienst den coninc van babilonien: ende ghi sult sitten int lant dat ic ghegheuen heb uwe vaderen

22

Ende ist sake dat gi dit niet en duet noch en hoert die stemme des heren uwes gods om te dienen den coninck van babilonien.

23

ic sal v doen ghebreken vanden steden iuda. ende van buyten iherusalem: ende ic sal afhalen van v die stemme des vrolicheits. ende die stemme des blijscaps. ende die stemme des brdegoms. ende die stemme des bruyts: ende al dat lant sal wesen sonder voetstap vanden ghenen die daer in wonen

24

Ende si en hebben niet gehoert dijn stemme dat si wrochten den coninc van babilonien: ende du hebtste vast gemaect dijn woerden die du ghesproken hebste inden handen dijnre knechten der propheten: dat ouer ghedraghen soude worden die gebeenten onser coninghen. ende die ghebeenten onser vaderen van hare stede.

25

Ende siet si sijn gheworpen in hetten des sons ende in koude des nachts. ende si sijn gestoruen inder alder quaetster droefnisse in hongher ende inden zwaerde. ende in wtsendinghe.

26

Ende du hebtste gheset den tempel inden welcken aengheropen is dijnen naem in dien. als op desen dach: om die boesheit des huys israhel ende des huys iuda.

27

Ende du here ons god hebste in ons ghedaen na al dijnre guetheit ende na al dijnre bermherticheit die groet is

28

als du ghesproken hebste in die hant dijn knechts moysi: indien daghen in welcken du hem gheboden hebtste te scriuen dijn wet voerden kinderen israhel segghende.

29

Ist sake dat si niet en horen mijn stemme des groten veelheits sal verwandelt worden in een zeer cleyn volc. want ic salse verstroeyen:

30

want ic weet dat dit volc mi niet horen en sal. Want dit volc is herdnackich Ende sal bekeert worden tot sijure herten inden lande sijnre vanghenisse:

31

ende si sullen weten want ic bin die here haer god. Ende ic sal hem hart geuen dat si verstaen sul-

[p. *506]

len: ende oren dat si horen sullen.

32

Ende si sullen mi louen inden lande haerre vanghenisse: ende si sullen ghedachtich wesen mijns naems.

33

ende si sullen hem afkeren van haren harden rugghe ende van haren boesheden: want si sullen gedencken den wech haerre vaderen die ghesondicht hebben in mi.

34

Ende ic salse weder om roepen int lant welcke ic gesworen hebbe haren vaderen abraham ysaac ende iacob: ende si sullen daer heren ouerwesen. Ende ic salse vermenichuoudighen: ende si en sullen niet worden vermindert.

35

Ende ic sal hem setten een ander ewich testament: dat ic hem sal wesen in een god: ende si sullen mi wesen in een volke. Ende ic en sal niet meer berueren mijn volk die sonen israhel vanden landen dat ic hem ghegheuen hebbe