Bible in duytsche (Delftse bijbel 1477)

§ Ca I.

[p. *503]

1

ENde dit sijn die woerden des boecs welc gescreuen heeft baruch een soon nerie. die soon was maasie die soen was sedehcie. die sone was sedei. die soon was helchie in babilonien

2

int vijfste iaer in den seuenden dach des maents in der tijt doe die van caldeen ghewonnen hadden iherusalem ende ghebrant mitten vier.

3

Ende baruch heeft ghelesen die woerden des boecs totten oren iechonie die soon was ioachims des conincs iuda. ende totten oren al des volcs comende totten boec. ende totten oren der machtigher sonen der coninghen. ende totten oren der priesteren

4

ende totten oren des volcs vanden minsten totten meesten. ende al der gheenre die woenden in babilonien bi die riuier sedi.

5

Welc horende screiden. ende vasten ende baden: in den aenschijn des here

6

Ende si hebben vergadert ghelt int aenschijn des heren: nae dat een yghelijc vermochte.

7

Ende hebbent gesent in iherusalem tot ioachim den priester een soen helchie die soon was salom. ende tot den priesteren. ende tot alden volc. welc gheuonden is mit hem in iherusalem

8

doe si op ghenomen hadden weder te ropen int landt iuda die vaten des tempels sheren die ofghenomen waren vanden tempel. op den thienden dach des maends syban. die siluere vaten die ghemaect hadde sedechias die soon was iosie ende coninc van iuda.

9

daer na dat nabuchodonosor coninc van babilonien gheuanghen had iheconiam ende die princen ende machtigen ende tvolc des lands van iherusalem ende heeft die geleit ghebonden in babilonien.

10

Ende hebben gheseit. Siet wi hebben tot v ghesent ghelden van welcken coept offerhande ende wieroec ende maect hemels broot: ende offert voer die sonden totten outaer des heren ons gods.

11

Ende bidt om tleuen nabugodonosors des conincs van babilonien. ende om tleuen baltasar sijns soens. op dat hoer dagen moeten sijn als die dagen des hemels op der aerden.

12

op dat die here ons cracht wil gheuen ende verlichten ons oghen. dat wi leuen moghen onder die beschermenisse nabugodonosors des conincs van babilonien. ende onder die beschermenisse baltasar sijns soens. ende moeten hem dienen veel daghen: ende vinden gracie in hoer aenschijn.

13

Ende bidt voer ons seluen totten heer onsen god want wi gesondicht hebben den heer onsen god. ende sijn gramscap en is niet gekeert van ons hent tot desen daghe.

14

Ende leest dit boeck. welc wi tot v ghesent hebben. om te worden ghelesen in den tempel des heren: op hoghe daghen ende alst van node is

15

Ende ghi sult segghen. Den here is rechtuaerdicheit. mer ons is bescamens ons aensichts als nv op desen dach al den volc van iuda ende alle die wonen in iherusalem

16

onsen coningen ende onsen princen onsen priesteren ende propheten ende onsen vaderen.

17

Wi hebben ghesondicht voer den here on-

[p. *504]

sen god

18

ende hebben niet gheloeft in hem wantrouwende: ende wy en hebben hem niet onderdanich gheweest: ende wi en hebben niet ghehoert die stemme des heren ons gods dat wi wanderen in sijnen gheboden die hi ons ghegheuen heeft

19

Vanden daghe in welcken hi wt gheleit heeft onse vaders vanden lande egipti tot desen daghe waren wi ongelouich totten heer onsen god: ende wi ghinghen wech verstroeyt op dat wi sijn stemme niet horen en souden.

20

Ende ons sijn aen ghehanghen veel quaetheden ende maledictien die god gheset heeft moeysi sijnen knecht. die wt gheleit heeft onse vaders vanden lande egipti om te gheuen ons een landt vloyende melc ende honich: als huden in desen daghe.

21

Ende wi en hebben niet ghehoert die stemme des heren ons gods nae alle die woerden der propheten die hi tot ons ghesent heeft ende tot onsen rechteren.

22

ende wi sijn wech ghegaen een yghelijc na den sinne onses bosen hertes om te wercken vreemden goden: quaet doende voer die oghen des heren ons gods