Bible in duytsche (Delftse bijbel 1477)

[4]

1

§ Aleph. § Hoe is gout verdonckert: ende die alre beste verwe is verwandelt Der sanctuarien stenen sijn gestroyt int hoeft van allen straten.

2

§ Beth. § Die voerbarige sonen van syon ende die ghecleet sijn mitten eersten goude hoe sijn si gheacht in aerden vaten: in dat werct van eens aerden pottemakers hande.

3

Gymel. Mer die lamien ondecken haer mamme: ende die sogheden

[p. *501]

haer welpen Die dochter mijns volcs is fel: als die struus inder wildernissen.

4

§ Deleth § Eens wijfs tonghe die soghede hinc bouen vast in haren mont in dorste: die cleynne kinder eysscheden broet: ende nyemant en was diet hem brac

5

He. § Die weeldelijc aten si verdoruen inden weghen: diemen voede inden wieghen omgrepen die stronte.

6

§ Vau § Ende der dochter mijns volcs quaetheit is meerre geworden dan die van sodoma sonde: die omme geworpen was in een wijlkijn: ende si en vinghen in hare hande niet.

7

§ Zay. § hare geheylichde mannen sijn witter dan sne. blickender dan melc: roder dan oudt yuorien: schoenre dan saphir.

8

§ Heth § haer aensicht is zwartere dan colen: ende du en bekennetse inden straten niet.. haer vel cleuede aen haer beenre: het verdroghede ende wort als hout.

9

§ Teth. § Beter wast den ghenen die mitten zwaerde verslagen waren dan die gedoot waren mitten hongher: want dese vermagerden si worden verteert van des ondrachticheits der aerden.

10

§ Ioth. § Der ontfermhertiger wiue hande soden haer kinderen: si worden haer spise inder bedroeftheit der dochter mijns volcs

11

§ Caph. § Die here heuet sijnen toren voldaen: hi heeft wtghestort die gramscap sijnre onwaerdicheit. Ende hi heeft in syon een vyer ontsteken: ende het heeft haer fondamenten verbarnet

12

§ Lamech Die conincgen vanden lande ende alle die in die poerte woenden en gheloefden niet want die viant ende die onvrient incomen souden op die poerten van iherusalem

13

Mem. § Om haren propheten sonden ende om die quaetheit van haren priesteren: die in midden haer wt stortten der gherechtiger bluet.

14

§ Nun. § Die blinde dolen inden straten: si sijn besmet van bluede. Ende als si daer incoemen niet en mochten: so hieldense haer slippen.

15

§ Samech. § Gaet wech gi besmette riepen si hem: gaet wech gaet van henen: ende en willets niet tasten. Want si stonden ende worden beruert si seiden: onder die heydene hi en salre niet meer toedoen dat hi in hem wonen sal.

16

Ayn § Des heren aensichte heeft se ghescheiden: hi en salre niet toedoen dat hijse aensien sal. Der priesteren aensichte en bescaemdense niet: noch si en ontfermden der ouder lude niet

17

§ Phe Als wi noch bleuen staende. soe gebraken ons onse oghen tot onser ydelre hulpen waert: als wi aernstelijc saghen ten volke waert dat niet helpen en mocht.

18

§ Sade. § Onse voetstappen slidderden inden wech van onsen straten: onse eynde naecte: onse daghe sijn veruolt: want onse eynde is comen.

19

Coph. § Die ons nauolgheden waren snelre dan die aern des hemels: si volgheden ons nae op berghen: inder wildernissen spieden si nae ons.

20

§ Res § Die gheest ons monts cristus die here is gheuaen in onsen sonden: dien wi seiden: wi sullen in dijne scaduwe leuen inden heydenen.

21

§ Syn. § Verblijde ende veruroude dochter van edom die woenste in dat lant van hus. Te di sal oec comen die nap: du sultste droncken gemaect worden ende naect ghemaect

[p. *502]

22

Thau. § Dochter van syon dine quaetheit is voldaen: hi en salre niet meer toedoen dat hi oueruoeren sal. Dochter van edom hi heeft dijne quaetheit gheuisiteert: hi heuet dine sonden ondecket.

§ Hier gaet wt iheremias gheween

§ Ende hier volghet sijne bedinghe.