Bible in duytsche (Delftse bijbel 1477)

[5]

1

HEre ghedencke wat ons geuallen is: aenscouwe besich onsen lachter.

2

Onse erueachticheit is gekeert ten vreemden luden: onse huyse ten luyde van buyten.

3

Wi sijn weesen geworden sonder vader: onse moederen sijn als weduwen.

4

Onse water droncken wi mit ghelde: ende onse houten cochten wi om ghelt.

5

Wi worden mitten necken ghedreuen: den moeden en gafmen gheen ruste.

6

Egipten gauen wi di hant ende die van assyrien: dat wi van brode ghesaedt worden souden.

7

Onse vaderen sondichden ende si en sijn niet: ende wi hebben hare quaetheden ghedragen

8

Dienstknechten hebben heerscappie bouen ons: nyemant en was die ons verloste van haren handen

9

In onsen handen brochten wi broet mit ons: van des zwaerts aensichte inder wildernissen.

10

Onse vel is verbrant als enen ouen vanden aensichte der tempeest vanden hongher.

11

Si veroetmoedichden die wijuen in syon: die magheden in die steden van iuda.

12

Die princen worden mitter hant ghehangen: ende der ouder mannen aensichten en scaemden hem niet

13

Si misbruicten ontamelijc die iongelinghen: ende die kinderen vielen in dat hout.

14

Die oude lude worden onmachtich inden poerten: ende die ionghelinghen vanden danse der gheenre die songhen.

15

Die blijscap onser herten ghebrect: ons dansen is verkeert in geween

16

Die crone ons hoefts is neder gheuallen: wee ons want wi hebben ghesondicht.

17

Hier om is bedroeft gheworden onse herte in bedroefheden: hier om sijn onse ogen verdonckert.

18

Om den berch van syon want hi verdoruen is: die vossen wandelen daer in.

19

Mer du here geduyrtste ewelike. dijn throen inden gheslachte ende den gheslachte.

20

Waer om dan sultstu ons ewelike vergheten: ende sultstu ons laten in lancheden van daghen?

21

Bekere ons here te di. ende wij sullen bekeert worden: vernyewe onse daghen als vanden beghinne.

22

Mer verdriuende hebstu ons versteken: du biste anxtelijc ieghen ons vergramt.

Hier gaet wt iheremias oratie.