Bible in duytsche (Delftse bijbel 1477)

§ Ca .li

1

DIt seit die here. Siet ic sal verwecken op babilonien. ende op die gene die daer in wonen die hare herte ieghen mij opgheheuen hebben als enen ouerdadighen woestende wint:

2

ende ic sal in babilonien senden wanres ende si sullent wannen. Ende si sullen haer lant destrueren: want si sijn op haer comen van allesins inden daghe haers vernoeys

3

Hi en salre niet wonen die sijnen boghe spant: ende die een panser aen heeft en salre niet opgaen. En wilt hare ionghelinghen niet sparen: slaet doot alle haer ridderscap.

4

Ende die ghedode sullen vallen inder caldeeuscher lant: ende die ghewonde in haren lantscapppen.

5

Want israhel ende iuda en was niet beroeft vanden here haren

[p. *490]

god: vanden here vanden scaren. Want haer lant is veruolt mit misdade van den heylighen van israhel.

6

Vliet van midden babilonien: ende dat elc behoude sijne ziele. En wilt zwighen van hare quaetheit: want die here is tijt van haerre wraken: hi sal haer ghelden haren loen

7

Babilon is enen gulden nap in des heren hant: die alt lant droncken maect. Die heydenen droncken van haren wijn ende hier om sijn sij beruert.

8

Babilon viel haestelijc ende is te broken: huylet op haer. draecht rasine tot hare quetsuren of si machschien mach ghenesen worden.

9

Wij hebben babilonien te meesteren ghehadt ende si en is niet ghenesen. Laten wijse: ende gaen wi elc in sijn lant. Want haer oerdel is comen totten hemel: ende het is op geheuen totten wolcken.

10

Die here heuet voert gebracht onse gerechticheden: coemt ende vertelle wi in syon ons gods werc.

11

Scarpt die ghescutten ende volt die kokers. Die here heeft verwect der coninghen van meden gheest ende sijn ghepens is ieghen babilonien op dat hijse verliesen soude: Want des heren wrake is: die wrake sijns tempels.

12

Heft op een teyken op die mure van babilonien doet die meeren die wacht Heft op die wachters: bereit die lagen: want die here penset ende heuet ghedaen so wat dat hi ghesproken heeft ieghen die ghene die in babilonien wonen.

13

Die woenste bouen vele wateren rijc in tresoren: dijn eynde coemt: die mate eens voets dijn afsnydens.

14

Die here vanden scaren die heuet gesworen bi sijnre zielen: want ic sal di veruollen mit menschen als van maden ofte rupsen ende men sal op di singen den seghe sanc

15

Die die aerde maecte in sijnre starcheit: ende die ronde werelt bereide in sijnre wijsheit: ende in sijnre vroetscap die hemel wtspreide.

16

Als hi gheluyt gheuen sal: so sullen die wateren ghemenichuoudicht werden inden hemel Die de wolken opheft vanden eynde der aerden: hi maecte die blixemen in reghen: ende bracht voert den wint wt sijnen tresoren.

17

Alle mensche is sot geworden van sijnre const: elc metael gieter is heschent inden afgod. Want sijn formeren is loghenachtich: ende en gheen gheest en is in hem.

18

Het sijn ydel wercke ende waerdich daer omme te lathene inden tide haerre visiteringhe sullen si te nyete gaen.

19

Want iacobs dele en is niet dese afgoden. Want die alle dinghen ghemaect heeft hi is iacobs deel ende israhel is dat septre sijnre erueachticheit: die here vanden scaren is sijnen name.

20

Du stoets mi die vate vanden stride: ende ic sal ieghen dy stoten die heydenen: ende ic sal in di die rike lande scheiden:

21

ende ic sal in di stoten dat paert ende den gheven die daer op rijt: ende ic sal in di stoten den waghen ende dien daer op sittet:

22

ende ic sal in di stoten den man ende dat wijf. Ende ic sal in di stoten den ouden man ende dat kint: ende ic sal indi stoten den ionghelinc ende die maghet.

23

Ende ic sal in di stoten den herde ende sijn cudde: ende ic sal in di stoten den ackerman ende sijn paerden die die ploech trecken. Ende ic sal in di stoten die beleders ende die voerbarige lude:

24

ende ic

[p. *491]

sal babilonien ende allen den ghenen die wonen in caldea gelden al haer quaet dat sij ghedaen hebben in syon in uwen eghen seit die here.

25

Sich ic spreke tot dn ouerdadighe berch seit die here: die alle dat lant besmetste Ende ic sal mijn hant op di wtsteken ende ic sal di afkeren vanden stenen: ende ic sal di geuen in enen berch te verbernen.

26

Ende si en sullen van dij niet nemen enen stene inden hoec. noch enen stene inden fondamenten: mer du sultste ewelijc verloren sijn seit die here.

27

Heft op een teyken int lant: trompt mitter trompen inden berghen. Heilicht die lude op hare: boetscapt ieghen haer den coninghen van ararath van menni ende ascenez: telt ieghen haer taphar Bringet dat paert als die rupsenen die een strael heefst.

28

Heylicht ieghen haer die heyden: die coninghen van meden. haer leidtsmannen. ende alle haer voerbarige lude: ende alle dat lant van sijnre macht

29

Ende dat lant sal worden beruert: want des heren ghepens is ontwaect ieghen babilonien: dat hi leggen sal dat lant van babilonien woest ende datmenre niet in sal moghen wonen.

30

Die starcke van babilonien hielden op van stride: si woenden in vasten steden. Haer starcheit is verteert. ende si sijn geworden als wijuen Haer woninghen sijn verbor nt: haer grendelen sijn te broken.

31

Die loept sal comen te gemoete den genen die loept ende die bode sal te ghemoete comen den ghenen die boetscapt: dat hi boetscappen sal den coninc van babilonien. dat sijn stat ghewonnen is van bouen tot bouen:

32

ende dat die passen beleit sijn Ende dat die brootlanden ontsteken sijn mit den vyere: ende dat die mannen die vechters ghestroeyt sijn:

33

want dit seit die here vanden scaren. god van israhel. Die dochter van babilonien is als een dorsche vloer: die tijt haers dorsschens ist. Noch een luttekijn: ende die tijt haers ouxtens sal comen.

34

Nabngodonosor die coninc van babilonien heeft mi gegheten hi heeft mi verslint. Hi heeft mij ghemaect als een ydel vat Hi heeft mij verslint als een drake. hi heeft sijnen buuc gheuolt mit mijnre tederheit:

35

ende die quaetheit heeft mi wtuerdreuen iegen mi. ende mijn vleysch op babilouien seit die woninghe van syon: ende mijn bluet op die ghene die in caldea wonen seit iherusalem.

36

Hier om seit die here. Sich ic sal dijne sake vonnissen: ende ic sal dine wrake wreken. Ende ic sal hare zee woest maken ende ic sal haer aderen verdroghen.

37

Ende babilonien sal wesen in berghen: der draken woninghe verwonderen ende wispelen: om datter nyemant in wonen en sal.

38

Si sullen te gader als liebaerde briesschen. ende si sullen haer hare verscudden als die welpen van leeuwen

39

In haerre hetten sal ic haren dranc setten: ende ic salse droncken maken dat sij slapen sullen. ende si sullen den eweliken slaep slapen: ende si en sullen niet opstaen seit die here.

40

Ic salse leiden als lammeren ter doot: ende als rammen mit bucken.

41

Hoe is sesach gheuaen: ende hoe is gewonnen die voerbarighe stat van alden lande? Hoe is babilonien worden

[p. *492]

in verwonderen onder die heyden?

42

Die zee is opghecomen op babilonien: si is ouerdect mitter menichten van haren vlueden.

43

Haer steden sijn gheworden in een verwonderen: lant daermen niet in wonen en mach ende woest: lant daer nyemant in wonen en sal: noch ne ghenes menschen kint en salre doer liden.

44

Ende ic sal visiteren op bel in babionien: ende ic sal wtworpen wt sijnen monde dat hi gswolghen hadde: ende die luden en sullen voertmeer te hem niet vergaderen. Want oec sal die mure van babilonien vallen.

45

Mijn volc gaet wt van midden babilonien: dat elc sijne ziele behoude vander gramscap des heren toerne.

46

Ende dat machschien uwe herte niet en vermorwe: ende dat ghi ontsiet dat horen datmen int lant horen sal. Siet inden iaer sal dit horen comen. ende na dit iaer horen ende die quaetheit int lant: ende die heerscappie heeft bouen den genen die heerscappie heeft.

47

Hier o m siet so comen die daghen. ende ic sal visiteren op die afgoden van babilonien: ende alle haer lant sal geschent worden: ende alle haer verslaghen mannen sullen in midden haer vallen.

48

Ende hemel ende aerde ende al dat daer in is sullen louen op babilonien: want van noerden sullen hem die rouers comen seit die here.

49

Ende also babilonien ghedaen heeft dat die versleghen in israhel vallen souden: also sullen die verslaghen van babilonien vallen in al dat lant.

50

Die dat zwaert vliet: roemt en wilt niet staen. Ghedenct van verren des heren: ende iherusalem coem op in v herte.

51

Wi sijn bescaemt. Want wi hebben lachter ghehoert. Scaemte heeft onse aensicht ouerdect: want vreemde luden sijn gecomen op dat gheheylichde van des heren huys.

52

Hier om siet seit die here die daghen comen. ende ic sal visiteren op hare afgoden: ende in al haer lant sal die ghewonde mensche roepen.

53

Ist dat babilonien opvaert inden hemel. ende maect si haer starcheit vast inden hoghen van mij sullen haer woesters comen seit die here.

54

Dit geluyt van gheroep van babilonien. ende grote droeftheit van der caldeeuscher lande:

55

want die here sal babilonien woesten ende hi heeft wt haer verloren groet gheluyt: ende haer vlueden sullen ghelude maken als vele wateren. Haer stemme gaf geluyt

56

want die rouere is op haer ghecomen dat is op babilonien. Ende haer starcke mannen sijn geuaen: ende haer boghe is verdroghet: want die here die starcke wrekere. gheldende sal hijt haer ghelden.

57

Ende ic sal droncken maken hare princen ende haer wijse luden: haer leidsmannen ende haer edele luden ende haer starcke mannen. Ende si sullen den eweliken slaep slapen: ende si en sullen niet ontwaken dat seit die coninc: here vanden scaren is sijnen name.

58

Dit seit die here vanden scaren. Die alte hoghe muere van babiionien sal mit onder grauen ondergrauen worden: ende haer poerten sullen verbrant worden mitten vyere ende des volkes arbeide ende der heydene sullen te nyet wesen inden. vyere ende sullen verloren worden.

59

Dit is dat woert dat iheremias die propheet beual sara-

[p. *493]

ie nerie soen die maasias sone was. doen hi mit sedechias den coninc voer in babilonien: inden vierden iaer van sijnen rike. Want sarias die prince der propheten.

60

Ende iheremias screef al dat quaet dat op babilonien comen soude in enen boeck: alle dese woerden die gescreuen sijn ieghen babilonien.

61

Ende iheremias seide tot saraiam. Als du comen sultste in babilonien ende du ghesien ende gelesen sultste hebben alle dese woerden

62

soe sultstu segghen. Here du hebtste ghesproken ieghen dese stat dattuse verderuen soutste: so dat nyemant sijn en sal die daer in wonen sal vanden menschen totten vye: ende dat sij ewelike wildernisse sal sijn.

63

Als du voldaen sultste hebben desen boec te lesen. soe sultstu daer aen enen steen binden. ende du sultsten werpen in midden eufraten:

64

ende sultste seggehn. Aldus sal babilonien verdroncken worden: ende si en sal niet weder opstaen vanden aensichte des vernoeys dat ic op haer bringhe: ende si sal al ghescheiden worden . Tot hier toe sijnt iheremias des propheten woerden.