Bible in duytsche (Delftse bijbel 1477)

§ Capittel .l.

1

DAt woert dat die here sprac van babilonien ende vander caldeeuscher lande in iheremias den propheten hant.

2

Boetscapt inden heydenen. ende doetet horen Heft op een teyken: roept: ende en wiltes niet helen. Segt: babilonien is gewonnen: bel is gheschendet: marodath is verwonnen.

3

Want van noerden is volc ieghen haer opghecomen: die haer lant in wildernisse legghen sal ende vanden menschen ende der beesten en sal nyemant sijn die daer in wonen sal Ende si worden beruert: ende gingen wech

4

In dien daghen ende in dien tide seit die here. sullen die kinder van israhel coemen. si ende die kinder van iuda te gader Wandelende ende wenende sullen si gaen: ende soeken den here hare god

5

In syon sullen si den wech vraghen: herwaert sullen haer aensichten comen: ende si sullen aen den here ghedaen werden mit eweliker beloften. die nemmermeer mit gheenre verghetelheit ofgedaen werden en sal.

6

Mijn volc is geworden een verloren cudde: haer herde hebbense verleit: ende dedense dolen inden berghen. Si ghinghen ouer vanden enen berch opten anderen berch: si vergaten haer bedden.

7

Alle die si vonden atense. ende haer vianden seiden. Wi en sullen niet sondighen: om dat si ghesondicht hebben den here der schoenheit der gerechticheit: ende der verbeidinghen haerre vaders den here

8

Gaet wech van midden babilonien: ende gaet wt. wt der caldeeuscher lant: ende sijt als een lammekijn voer dat cudde.

9

Want siet ic sal verporren ende bringhen in babilonien ene vergaderinghe van groten volke van den lande van noerden: ende si sullen bereet worden iegen babilonien: ende daer mede salt ghewonnen worden. Sijn ghescutte is als eens starcs mans die dootslaet: ende en sal niet ydel wederkeren.

10

ende caldea sal wesen in roue: alle die ghene diese woesten. sullen veruolt worden seit die here.

11

Om dat ghi verblijt ende grote dingen spreect rouende mijne erueachticheit: om dat ghi wt ghestort sijt als calueren op dat cruyt. ende loeyt als die stiere

12

So is uwe moeder sere gheschent: ende die v ghebaert is effen gemaect neuent ghemul. Siet si sal die achterste wesen inden heydenen: ende woest ende sonder wech verdorrende

13

van des heren gramscap. Men en sal daer niet in wonen: mer men salse al in wildernissen maken Elc die doer babilonien liden sal. hi sal verwonderen: ende hi sal wispelen op alle haer plaghen.

14

Wert bereet al omme ende omme ieghen babiaonien. Ghi alle die boge spant vervechtse: en spaert uwe ghescutte niet: want si heeft den here gesondicht.

15

Roept ieghen haer. Allesins gaf si hore hant. Haer fondamenten sijn gheuallen:: hare mueren sijn ghedestrueert: want des heren wrake. heeft van haer wrake genomen. Also si ghedaen heeft: also doet hare.

16

Verderft den saeyere van babilonien: ende dien die zekele houdt inden tide van ouxte vanden aensichte der duuen zwaert. Elc sal te sijnen volke wederkeren: ende elc sal vlien te sijnen lande waert.

17

Een

[p. *488]

gestroeide cudde is israhel: die liebaerde hebbense wt verdreuen. Eerst at hem die coninc van assur: ende dese achterste nabugodonosor die coninc van babilonien toech hem sijn beenre wt.

18

Hier om seit dit die here vanden scaren. god van israhel. Siet ic sal den coninc van babilonien visiteren ende sijn lant alsoe ic gheuisiteert hebbe den coninc van assur:

19

ende ic sal israhel weder brenghen te sijnre woninghen. Ende carmelus ende basan sullen worden geuoet: ende sijne ziele sal ghesaedt worden inden berghen van effraym ende van galaad.

20

In dien dagen ende in dien tide seit die here. salmen soken israhels quaetheit ende si en sal niet wesen: ende iuda sonde ende men salse niet vinden: want ic sal dien guedertieren wesen dien ic laten sal.

21

Ganc op der gheenre lant die heerscappie hebben: ende visitere op die ghene die daer in wonen:. scheide ende slach doot die achter hem sijn seit die here: ende doch nae alle dat ic di beuolen hebbe.

22

Inden lande is dat geluyt eens strijts: ende grote bedroeftheit.

23

Hoe bistu ghebroken ende vertreden hamer van alden lande? Hoe is babilonien verkeert in wildernissen inden heydenen.

24

Heb ic di int stricke ghebrocht ende babilonien du biste gewonnen ende du en wistes niet: dn biste gheuonden ende begrepen: want du hebtste den here vergramt.

25

Die here heeft sijnen tresoer ondaen. ende heeft voert ghebracht die vate sijnre gramscap: want die here vanden scaren is te doen inder caldeuescher lant.

26

Coemt tot haer vanden achtersten eynden der aerden: doetse op dat si wtgaen moghen die vertreden. Doet wech die stene vanden weghe. ende werpse te hope: ende slaetse doet: ende daer en blijuet niet ouer.

27

Scheit alle haer starcke mannen. si gaen neder inden dootslach. Wee hem want haer dach coemt: die tijt haerre visitieringhen.

28

Der gheenre stemmen die vlyen ende der gheenre die ontgaen sijn vanden lande van babilonien: om dat si in syon boetscappen sullen des heren ons gods wrake

29

Boetscapt in babilonien vele luden: die wrake van ons heren tempel: hem allen die den boghe spannen. Staet ieghen haer al omme ende omme: ende nyemant en ontgae. Ghelt haer na haer werc: na al dat si ghedaen heeft doet haer. want si rechte haer op ieghen den here: ieghen den heylighen israhel.

30

Hier om sullen haer ionghelinghe vallen in haren straten: ende alle die mannen hare vechters sullen zwighen in dien daghe seit die here.

31

Sich ic spreke te di houaerdige seit die here vanden scaren. Want dijn dach coemt: die tijt dijnre visiteringhe.

32

Ende die houaerdighe sal vallen ende neder vallen: ende nyemant en sal wesen die ne verwerken sal. Ende ic sal vyer ontsteken in sijnen steden: ende het sal verbarnen al dat omtrent hem is.

33

Dit seit die here vanden scaren. Die kinderen van israhel ende die kinder van iuda ghedoghen te gader ouerdaet. Alle diese gheuan hebben houdense: si en willense niet laten gaen..

34

Haer verlossere is starc: here vanden scaren is sijn name. Hier om sal hi haer zake bescher-

[p. *489]

men: dat hi dat lant veruaren sal. ende dat berueren sal die ghene die in babilonien wonen.

35

Dat zwaert coemt totten caldeeuschen seit die here: ende tot den woenres van babilonien ende tot haren princen ende tot haren wisen luden waert

36

Dat zwaert comt tot haren waersagers die sot wesen sullen. Dat zwaert comt tot haren starcken mannen waert: die hem ontsien sullen.

37

Dat zwaert comt tot haren paerden. ende tot haren waghenen. ende tot alle den volke dat in midden haer is: ende sij sullen wesen als wijuen. Dat zwaert comt tot haren tresoren waert: diemen rouen sal.

38

Droecheit sal op haren wateren wesen. ende si sullen verdroghen: want het is der afgoden lant:

39

daer om sullen die draken wonen mitten sotten wilden mannen: ende in haer sullen wonen strusen. Ende men salre voertmeer niet in wonen: ende men salse niet stichten al totten geslachte ende den gheslachte.

40

Also die here on:warp sodomam ende gomorram ende dat lant dat daer neuen leit seit die here. Daer en sal en gheen man wonen noch dat lant en sal gheens menschen sone oeffenen.

41

Siet een volc coemt van noerden ende groet volc: ende vele coninghen sullen opstaen vanden eynden der werelt.

42

Si sullen den boghe ende den schilt begripen: si sijn fel ende sonder ontfermherticheit. Haer stemme sal luden als die zee: ende sij sullen op paerden sitten als een man die bereet is ten striden iegen di dochter van babilonien.

43

Die coninc van babilonien hoerde die nyewe maer daer of: ende sijn handen worden onmactih. Vernoey beuinc hem: pine als een wijf die in arbeide leit.

44

Siet hi sal opcomen als een liebaert vander ioerdanen houaerden ter vromer schoenheit: want ic sallen haestelijc doen lopen te haer waert Ende wie sal die wtuercoren sijn die ic bouen hem setten sal? Want wie is mijns gelike. ende wie sal mij gedogen? Ende wie is dese herde. die mijnen aensichte wederstaen sal?

45

Hier om hoert des heren raet die hi mitter herten ontfaen heeft ieghen babilonien: ende sine ghepensen dien hi ghepenst heeft op der caldeeuscher lant.. En si dat si die cleyne kinder vanden cudden ter neder trecken: en sij dat mit hem gedestrueert werde haer woninghe.

46

Vanden ghelude der gheuanghenisse van babilonien wert dat lant beruert: ende die roep wort onder die heydenen ghehoert