Bible in duytsche (Delftse bijbel 1477)

§ Ca .xlix.

1

DIt seit die here tot ammons kinderen. En sijn israhel ne gene kinder ofte en ishen gheen oer? Waer bi dan heeft melchon in erfachticheit beseten gad: ende waer bi heeft sijn volc in gods steden gewoent?

2

Hier om siet so comen die daghen in di seit die here. ende ic sal doen horen op rabbath van ammons kinderen grimminghe van enen stride. Ende het sal gescheiden wesen in geruchte: ende rabbaths dochteren sullen mitten vyer verbrant worden: ende israhel sal besitten die ghene die hem besaten seit die here.

3

Huyle esebon: want har is ghewoest. Dochter van rabba roept: cleet v mit haren clederen. Weent ende gaet al omme neuen den tuyne: want melchon sal gheleit worden in oueruaert: sijne priesteren ende sijne princen te gader.

4

Wat verblijtstu inden valeyen? Weeldighe dochter die betrouwen hadtste in dijnen tresoren dijne valeye in neder gheronnen ende du seitste. Wie sal te mi comen?

5

Sich ic sal in brengen op di anxt seit

[p. *485]

die here vanden scaren. van alle den genen die omme ende omme di sijn: ende ghij sult ghestroeyt worden elc van uwen aenscouwen: ende uyemant en sal sijn die vergaderen sal die gene die vlyen.

6

Ende hier na sal ic v vliende doen wederkeren. ende die gheuanghen van ammons kinderen seit die here

7

tot dien van ydumea. Dit seit die here vanden scaren. En is niet meer wijsheit in the man? Die raet is verloren vanden kinderen. Hare wijsheit is onnute geworden.

8

Vliet keert uwe rugghen: die te dadan woent gaet neder in dootlaghe: want esau verlies heb ic op hem ghebracht: den tijt sijnre visiteringen.

9

hadden die wijngaertlesers op di gecomen. si en hadden ne ghene druuen ghelaten: hadden die dieue in die nacht gecomen. si hadden genomen dat hem genoech gheweest soude hebben.

10

Want ic hebbe esau ondert: sine verborghenheden heb ic gheopenbaert: ende men salt niet moghen verberghen. Sijn saet is ghewoest. ende sine bruederen ende sijne gebueren: ende en sal niet wesen.

11

Laet dijne weesen: ende ic salse doen leuen: ende dijne weduwen sullen in mi hopen:

12

want dit seit die here. Siet die ne ghene vonnisse en was dat si den nappe drincken souden. drinckende sullen sijne drincken. ende du sultste als ontsculdich ghelaten worden. Du en sultste niet ontsculdich wesen: mer drinckende sultstune drincken.

13

Want bi mi seluen heb ic gesworen seit die here: dattu bosra sulste wesen in wildernisse ende in lachtere: ende in spotte ende in vloke: ende alle hare steden sullen wesen in ewelike wildernisse.

14

Ende horende heb ic vanden here ghehoert: ende een bode is ten heydenen waert ghesendet. Wert vergadert ende roemt iegen bosra: ende stae wi op in stride.

15

Want siet ic heb di clene ghegheuen inden heydenen: ende veronwaerden onder den menschen.

16

Du die woenste inden holen van stenen: di heeft dijne ouermoedicheit ende dijne houaerde bedrogen: ende du pijnste di te begripen die hoecheit vanden berghe. Als du dijnen nest verheuen hebtste als een aerne: ic sal di daer of trecken seit die here.

17

Ende ydumea sal woest wesen. Elc die daer doer liden sal hem sal verwonderen: ende hi sal wispelen op alle haer wonden:

18

also sodoma ende gomorra ende dat lant daer neuen omghekeert was seit die here Daer en sal ne gheen man wonen: noch en gheens menschen sone en sal dat lant winnen.

19

Siet hi sal opcomen als een liebaert vander iordanen houaerden ter vromer schoenheit want ic salne haestelijc te hare doen lopen Ende wie sal vercoren sijn dien icker bouen setten sal? Want wie is mijns ghelike? Ende wie sal mij ghedoghen Ende wie is desen herde die mijnen aensichte vederstaen sal?

20

Hier om hoert des heren raet dien hi aenghegaen heeft van edom: ende sijne ghepense dien hij ghepenst heeft vanden ghenen die te theman wonen. Ist dat si niet ter neder en werpen die cleyne kinder vanden cudde. en si dat si scheiden mit hem haer woninghen.

21

Vanden ghelude haers vals is dat lant beruert: in die rode zee

[p. *486]

is een roep sijnre stemmen gehoert.

22

Siet hi sal opuaren als een aerne. ende sal vlieghen ende sine vloghelen wtspreiden op bosra. Ende der starcker manne van ydumea herte sal wesen in dien dage als eens wijfs herte die in arbeyt van kinde leyt.

23

Tot damascum. Emath is bescaemt ende arphat: want si hebben alten quaden horen ghehoert. Si sijn gestoert in die zee si en mochten niet rusten van sorghen

24

Damascus is ongestade: si is gekeert in vlucht: anxt heuetse bevaen. Vernoey ende rouwe hieldense. Als een wijf die in arbeide vanden kinde leit.

25

Hoe ghelieten si die priselike stat: die poert van bijlscappen?

26

Hier om sullen haer ionghelinghen vallen in haren straten: ende in dien daghe sullen alle die mannen van stride zwighen seit die here vanden scaren.

27

Ende ic sal ontsteken een vyer in die mure van damasco: ende het sal verbarnen benadaps muere vander stat

28

Tot dien van cedar ende totten riken van asor die nabuchodonosor die coninc van babilonien versloech. Dit seit die here. Staet op ende gaet op te cedar: ende woest die kinder van oesten

29

Si sullen vaen haer woninghen ende haer cudden: si sullen wech voeren haer vliesen ende alle haer vaten ende haer kemels: ende si sullen op hem roepen vrese al omme ende omme.

30

Vliet: gaet wech anxtelijc: ghi die tot asor woent sittet inden clouen vanden stenen seit die here. Want nabugodonosor die coninc van babilonien heeft iegen v enen raet aengegaen: ende hi heeft iegen v ghepenst ghepense.

31

Staet op ende gaet op ten rusteliken volke: ende dat sonder vrese woent seit die here. Si en hebben ne gheen dore noch grendele seit die here daer si wonen.

32

Ende haer kemels sullen wesen in roue: ende die menichte van haren beesten in roue. Ende ic salse stroeyen in allen winden die al omme bescoren sijn aen hair haer: ende ic sal op hem brenghen die verderfnisse van allen ziden van hem seit die here.

33

Ende azor sal wesen in woninghe van draken woest tot ewelijc. Daer en sal en gheen man blijuen: noch en gheens menschen sone en salse wennen.

34

Des heren woert dat tot iheremiam den prophete ghedaen was ieghen elam in dat beghinsel van sedechias des conincs van iuda rike ende hi seide.

35

Dit seit die here vanden scaren Siet ic sal ontween breken den boge van elam. ende ic sal anxte nemen:

36

ende ic sal bringhen in op elam die vier winden vanden vier eynden des hemels. ende ic salse driuen in allen desen winden: ende ne ghene lude en sullen wesen daerre niet toe comen en sullen die vluchtige van elam.

37

Ende ic sal elam doen anxt hebben voer haer vianden: ende inder gheenre aenscouwen die haer ziele zoecken. Ende ic sal op hem quaet bringhen: die gramscap mijns torens seit die here. Ende ic sal na hem wtsenden dat zwaert tot dat icse verderft hebben sal

38

ende ic sal mijnen troen setten in elam: ende ic sal wt haer verliesen die coninghen ende die princen seit die here.

39

Ende inden vtersten daghen so sal ic die gheuanghen van elam doen wederkeren seit

[p. *487]

die here.