Bible in duytsche (Delftse bijbel 1477)

§ Capit .xlviij.

1

DIt seit die here god van israhel tot moab we op nabo: want het is gewoest ende geschent. Cariathiarin is geuanghen: si die starc was is bescaemt ende beuede.

2

Voertmeer en is gheen verbliden in moab: si pensden quaet ieghen esebon. Coemt ende laetse ons verderuen vanden volke. Hier om swighende sultstu zwigen: ende di sal dat zwaert volghen.

3

Die stemme des geroeps van oronaym: ghewoestheit ende grote bedroeftheit.

4

Moab is te broken: boetscapt sijnen cleynen kinderen dat gheroep.

5

Want alden opganc van luych sal si screyende opgaen in gewene: want inden nederganc van oronaym hoerden die vianden ghehuijlvan bedroeftheden

6

Vliet: ende behout uwe zielen: ende ghi sult sijn als heyde inder wildernissen

7

Om dattu betrouwen hadtste in dijnen vasten steden ende in dijnen tresoren so sultstu oec ghewonnen worden. Ende thamos sal gaen in ouervaren: hare priesteren ende hare princen te gadere.

8

Ende die rouer sal comen te elker poerte: ende en gheen poerte en sal behouden blijuen. Ende die valeyen sullen verderuen: ende die campaengien sullen ghescheiden worden: want die here heuet gheseit.

9

Gheeft moab die bloem: want bloeyende sal si wtgaen: ende sijne steden sullen woest wesen ende datmenre niet in en sal mogen wonen.

10

Vermaledijt si hi die des heren werc loesselijc doet: ende vermaledijt si hi die sijn zwaert verbiet vanden bluede.

11

Moab was drachtich van sijnre ioncheit: ende hi ruste iv sine vuylheden. Ende hi en wort niet vergoten van sijnen vate in een ander vat: ende hi en is niet wechgegaen in ouer varen. Hier om bleef sijn smaec in hem ende sijn roke en verwandelde niet.

12

Hier om siet so comen die dagen seit die here ende ic sal hem senden ordinerers ende setters van putten. ende si sullen

[p. *483]

verstroeyen: ende si sullen sijn vaten wt sceppen ende haer potten sullen si te gader ontween slaen.

13

Ende moab sal geschent worden van chamos: alsoe dat huys van israhel gheschent is van bethel daer hi betrouwen in hadde.

14

Hoe ghesegdi wi sijn starc: ende vrome mannen om te striden?

15

Moab is gewoest ende si hebben sijne steden verbrant: ende sine wtuercoren ionghelinghe ghingen neder in die doetslacht die coninc sprac: here vanden scaren is sijnen name.

16

Dat verderuen van moab is bi dattet comen sal: ende sijn quaet sal seer haestelijc toe loepen.

17

Vertroest hem alle di omtrent hem sijt: ende gi alle die sijnen name weet segt. Hoe is die starcke rode ghebroken: ende die gloriose stoc?

18

Ganc neder vanden glorien: ende sitte in dorste der dochter van dybon woninghe: want moabs woester sal tot di opcomen: hi sal dine vaste steden scheiden.

19

Woninghe van aroer stae inden wech ende besich. Draghet den ghenen die vliet: ende hem die ontlopen is. Segt: wat isser gheuallen?

20

Moab is gheschent want hi is verwonnen. Huylt ende roept. bootscapt in arnon dat moab ghewoest is:

21

ende dat oerdele coemt tot campandien lande waert op elon ende op iasa ende op masphat

22

ende op dybon ende op nabo ende op debsathaims huys

23

ende op cariathiarim ende op bethgamul ende op bethmaon

24

ende op carioch ende op bosra ende op alle die steden van moabs lande di verre ende bi sijn.

25

Moabs horen is afgheslaghen: ende sijn arm is te broken seit die here.

26

Maecten drocken mitten nappe van des heren gramscap want hi rechte hem op ieghen gode. Ende hi sal moaba hant stoten in sijnen wtspuwen: ende hi sal oec wesen in bespotten.

27

Want hi was di in bespotten israhel: als of dune gevonden hadtste onder dieuen. Hier om dijne woerden die du ieghens den here ghesproken hebtste sulstu gheuanghen gheleit worden.

28

Ghi wonaren van moab laet die stede ende woent inden stenen: ende weest als die duue die haren nest maect inden hoechsten mont vanden gate.

29

Wi hebben moabs houaerdie gehoert. Hi is harde sere houaerdich Sine hoecheit ende sine verweentheit ende houaerdicheit ende die hoecheit sijnre herten weet ic seit die here.

30

Ende sine ouermoedicheit om dat neuen hem niet en is sine cracht: ende dat hi na dat hi vermochte niet en pijnde te doen

31

Hier om sal ic op moab versuchten: ende ic sal tot al moab roepen ende totten mannen vanden aerdenen mueren die wenen

32

Wijngaert van sabama ic sal di gewenen vanden gheween van iazer. Uwe gheslachten hebben die zee ghegaen: totter zee van iazer sijn si ghecomen. Die rouere is gheuallen op dinen ouxt ende dat oplesen vanden wijngaert.

33

Van carmelo ende vanden lande van moab is of genomen die blijscap ende die vroude: ende ic hebbe wech ghedraghen die wijn wt die wijnperssen Die tredere vanden wijndruuen en sel niet singhen den sanc die men pleghet.

34

Si gauen haer stemme van roepe van esebon tot eleale ende iosa: van segor tot oronaym die vaerze van drie iaren: die watere van nem-

[p. *484]

rim sullen oec alte quaet wesen.

35

Ende ic sal wech doen seit die here van moab den ghenen die inden hogeden offert. ende die sijnen goden sacrificie doen.

36

Hier om sal mijn herte tot moab luden als een trompe van copere: ende mijn herte sal gheuen den geluyt van tybien ten mannen waert vanden aerden muere: want hi heeft meer ghedaen dan hij vermochte. daer omme sullen si vergaen.

37

Want elck hoeft sal calu wesen ende elc baert ghescoren. Ende in alle handen te gader bindinge: ende op elke rugge een haren cleet.

38

Alrehande geween sal wesen op alle moabs dake ende in sijnen straten: want ic heb moab ontween gebroken als een onnutte vat seit die here.

39

Hoe is hij verwonnen ende huylden si. Hoe heeft moab sijnen necke neder gheworpen ende is bescaemt? Ende moab sal wesen in bespotten: ende in exempel alle den ghenen die omtrent hem sijn.

40

Dit seit die here. Siet hi sal vlieghen als enen aern: ende hi sal sine vloghele wt spreiden te moab waert.

41

Carioth is ghewonnen: ende sijn bollewercken sijn begrepen: ende in dien dage sal der starcker mannen van moabs herten wesen als eens wijfs herte die in arbeide van kinde leit.

42

Ende moab sal ophouden volc te wesen: want hi verblijde hem ieghen den here.

43

O wonare van moab op di is seit die here: anxt ende gracht ende stricke.

44

Die vlien sal vanden aensichte des anxtes. hi sal in die gracht vallen: ende die opcomen sal vter gracht. hi sal gheuaen worden inden stricke. Want ic sal op moab brenghen dat iaer haerre visiteringhen seit die here.

45

Die vanden stricke vloghen si stonden in die scaduwe van esebon: want wt esebon is gecomen een vyer ende een vlamme van midden seon: ende het sal verteren dat een deel van moab ende der kinderen top vanden gheruchte.

46

Wee di moab: volc van thamos du biste verderft: want dijnen sonen ende dijn dochteren sijn gheuaen in gheuanghenisse.

47

Ende naden vtersten daghen sal ic bekeren moabs gheuanghenisse seit die here. tot hier toe sijnt moabs oerdele.