Bible in duytsche (Delftse bijbel 1477)

§ Capit .lij.

1

ZEdechias was een kint van een ende twintich iaren doe hi begontste te regneren: ende hi regneerde elf iaer in iherusalem: ende sijnre moeder name was amithal: iheremias dochter van lobna

2

Ende hi dede quaet in des heren oghen na al dat ioachim ghedaen hadde:

3

want des heren gramscap was ieghen iherusalem ende ieghen iudam tot dat hine verdriuen soude van sijnen aensichte. Ende sedechias ghinc of vanden coninc van babilonien.

4

Ende het geuiel inden neghenden iaer van sijnen rike in die thiende maent: op den thienden dach vander maent so quam nabugodonosor die coninc van babilonien ende hi ende alle sijn heer ieghen iherusalem ende beleident: ende si maecten ieghen iherusalem vaste borghen al omme ende omme iherusalem:

5

ende men belacht totten elften iare van sedechias rike.

6

Ende in die vierde maent opten neghenden dach vander maent so behielt die hongher in die stat. Ende den volke vanden lande en was ne ghene spise te eten.

7

Ende die stat wort doer broken. ende alle die mannen hare vechters vloghen: ende sij ghinghen des nachts vter stat doer den wech vander poerten die was tusschen die twee muren ende leit tot des conincs coelhoue waert. daer die caldeeusche beleit hadden die stat al omme ende omme. ende si toghen wech alle den wech die inder wildernissen leedt.

8

Ende der caldeeuscher heer volghede den coninc na: ende sy vinghen sedechiam in die wildernisse die neuen iherico is: ende alle sijn gheselscap vloech van hem.

9

Ende doe si den coninc gheuaen hadden. so voerden si hem tot den coninc van babilonien in reblata die int lant van emath is: ende hi sprac tot hem vonnisse.

10

Ende die coninc van babilonien dode sedechias sonen voer sijnen ogen: mer oec so dode hi alle die princen van iuda in reblata.

11

Ende hi stac sedechias oghen wt ende spanden in boeyen. Ende die coninc van babilonien brachten in babilonien. ende hi leiden in dat huys vanden ker-

[p. *494]

kere totten daghe sijnre doot.

12

Ende in die vijfste maent. inden thienden daghe vander maent. dat is dat neghenthienste iaer nabugodonosors des conincks van babilonien: soe quam nabusardan die maerscalc vanden ridderscap die voer die coninc van babilonien stont in iherusalem:

13

ende hi ontstac des heren huys ende des conincs huys ende alle die husen van iherusalem: ende elc groot huys verbernde hi mitten vyere

14

ende alle die mueren al om ende omme destrueerde al dat heer vanden caldeeuschen dat mitten maerscalc was vanden ridderscap.

15

Ende vanden armen volke ende vanden anderen volke dat in die stat ghebleuen was. ende vanden vluchtigen die ouer gheuloghen waren totten coninc van babilonien ende die ander van der menichte. voerde nabusardan den maerscalc vanden ridderscap:

16

Ende vanden armen volke vanden lande lyet nabusardan die maerscal vanden ridderscap wijngaert mannen ende ackermannen.

17

Ende die caldeeusche braken die metalen columpnen die in des heren huys waren. ende die metalen stapels ende die metalen zee die in des heren huys was: ende si voerden al haer coper in babilonien.

18

Ende die ketelen ende die crauwels ende die psalterien ende die violen ende die mortieren. ende alle die coperen vaten die inden dienst gheweest hadden droghen si wech:

19

ende die vaten daermen die thimiama in hielt: ende die cruesen ende die beckenen ende die candelaren ende die mortiers ende die nappen. Alle die gulden waren namen si gulden: ende di silueren waren silueren.

20

Die maerscalc vanden ridderscap voerde aldus wech twee columpnen ende die metalen zee twaelue metalen calueren die onder die zee waren: dien die coninc salomon in des heren huys ghemaect hadde. En was ne gheen ghewichte des copers van allen desen vaten.

21

Ende vanden columnen: waren in ene columne achtien cubitus in die hoecheit: ende een coerde van twaelf cubitus omwant die columne. Ende die grofheit daer of was van vier vingheren: ende si was binnen ghehoelt.

22

Ende op elke columne was een coperen hoeft. Ende die hoecheit van enen hoefde was van vijf cubitus: ende nettekens ende appelgranaten op die crone al om ende omme. dit al coperen. Ende aldus wast oec in die ander columne ende appelgarnaten.

23

Ende der appel garnaten waren sesse ende tneghentich nederwaert hanghende: ende sy waren al omme ghemaect mit hondert nettekens.

24

Ende die maerscalc vanden ridderscap nam saraiam den eersten priester: ende sophoniam den anderen priester: ende drie hueders van der cleder cameren.

25

Ende hi nam enen gelubden camerlinck vander stat die gheset was bouen die mannen die vechters: ende seuen mannen vanden ghenen die des conincs aensicht saghen diemen in die stat vant: ende enen scribe die prince was vanden ridders die nyewe ridders proefde: ende tsestich mannen van den volke vanden lande diemen in midden die stat vant.

26

Ende nabusardan die maerscalc vanden ridderscap namse: ende hi voerdese tot den coninc van babiloni-

[p. *495]

en in reblatha.

27

Ende die coninc van babilonien ontfincse: ende dodese in reblatha in dat lant van emath. Ende iuda wort ouergheuoert wt sijnen lande.

28

Dit is dat volc dat nabugodonosor oueruoerde inden seuenden iaer: voerde hi ouer drie dusent ioden ende drie ende twintich

29

Inden achtienden iare so voerde ouer nabugndonosor van iherusalem acht hondert ende twee ende dertich zielen.

30

In nabugodonosors drie ende twintichste iaer soe voerde ouer nabusardan die maerscalc vander ridderscap seuen hondert ende vijf ende veertich ioden zielen Dus waren dese zielen alle: vier dusent ende ses hondert.

31

Ende het gheuiel inden seuen ende dertichsten iaer van ioachims des conincs van iuda oueruaert in die twaelfste maent inden vijf ende twintihsten daghe vander maent. soe verhief euilmerodach die coninc van babilonien in dat iaer van sijnen rike. ioachims des conincs van iuda hoeft: ende hi leide hem wt den kerker:

32

ende hi sprac guede woerden mit hem. Ende hi settede sijnen throen bouen der coninghen throen die na hem in babilonien waren

33

Ende hi verwandelde die clederen van sinen kerker: ende hi at altoes voer hem broot alle die daghe sijns leuens.

34

Ende sijne spisen waren ghesette ewelike spisen. ende worden hem ghegheuen van den coninc van babilonien elcs dages: totten dage sijnre doot. alle die dage sijns leuens

§ Hier gaet iheremias wt.